“Mu munya webe tudi tumona munya”

BUTOKE ntshintu tshitutu tumona anu bu tshitu katshiyi ne mushinga. Kadi mushinga wabu utu ulua kumueneka diakamue padi nzembu ikoseka ne tushala mu tshijimajima. Diakalenga, dîba didi dikale bu “ditanda dietu dia nzembu,” didi diodi anu ditema matuku onso. Ku diambuluisha dia butoke budi bufuma ku dîba, tudi tumona, tudia, tupuyakana ne tupeta mushindu wa kuikala ne muoyo.

Bu mudi butoke buambuluisha bua kuikala ne muoyo, kabiena bitukemesha to patudi tubala mu Genese ne: munya anyi butoke buakamueneka mu dituku dia kumpala dia bufuki. “Nzambi wakamba ne, Munya wikale. Ne munya wakikala.” (Genese 1:3) Bantu ba kunemeka bu mudi Mukalenge Davidi bavua misangu yonso bangata Yehowa bu mpokolo wa muoyo ne wa butoke. Davidi wakafunda ne: ‘Kuudi wewe kudi mushimi wa mâyi a muoyo. Mu munya webe, tudi tumona munya.’​—Musambu 36:9.

Mêyi a Davidi aa tudi mua kuumvua mu tshimfuanyi anyi kuumvua mu ngumvuilu mulelela. Tshibungu kampanda tshidi tshileja ne: “Bushuwa, butoke ke budi buambuluisha bua kumona.” Pashishe mukanda eu udi wamba kabidi ne: “Malu a bungi adi afika mu bongo bua muntu ku diambuluisha dia mêsu kupita biumvuilu bikuabu bionso bia mubidi.” (Encyclopædia Britannica) Bu mudi malu a bungi atudi tulonga mikale dijinga ne lumonu ludi Nzambi mutupeshe, luolu palu ludi dijinga ne butoke bua kuenzalu mudimu bimpe. Bible udi wakula kabidi bua munya anyi butoke mu ngumvuilu wa mu tshimfuanyi.

Ke bualu kayi Yezu wakambila bayidi bende ne: “Ndi butoke bua bena panu. Udi undonda, kakuenda mu midima, kadi neapete butoke bua muoyo.” (Yone 8:12, MMM) Butoke bua mu tshimfuanyi buvua Yezu wamba buvua mukenji wa bulelela uvuaye ulongesha, uvua mua kutokesha ngenyi ne mitshima ya bantu bavua bamuteleja. Kunyima kua bamane kuenza bidimu bia bungi mu mîdima ya mu nyuma, balongi ba Yezu bakafika ku diumvua malu adi Nzambi mulongoluele bukua-bantu ne ditekemena dia Bukalenge. Ebu buvua “butoke bua muoyo,” bualu dimanya adi divua mua kufikisha muntu ku muoyo wa kashidi. Yezu wakamba pavuaye usambila Tatuende wa mu diulu ne: ‘Eu udi muoyo wa tshiendelele, bua buobu bakumanye wewe, Nzambi umu’epele mulelela, ne yeye uwakatuma, Yezu Kristo mene.’ (Yone 17:3) Nanku katudidingi nansha kakese bua kuangata butoke ebu bua mu nyuma ne mushinga mukese to!