Buloba mmuaba wa mateta anyi?

NDISULAKANA kayipu! Mmukuate mateta. Mulongi uvua muenze mateta munkatshi mua mbingu ibidi mijima ndekelu wa bionso mmupete bipeta bimpe. Mpindieu uvua mua kubanga mudimu uvuaye ujinga katshia kuonso aku.

Ke mushindu utu bantu ba bungi bamona muoyo pa buloba. Badi bawangata bu diteta dia kumpala didi bantu bonso ne bua kuanji kuenza. Bantu badi “bakuata” mateta aa badi baya muaba kampanda mulenga kunyima kua lufu luabu. Kadi netshikale bualu bua dibungama bu biobi mua kuikala ne: anu muoyo utudi nawu mpindieu ke umuepele udi mutambe buimpe. Nansha muvua Yobo ne bukole bua mubidi ne bubanji bua bungi mu matuku a bungi a muoyo wende, wakamba ne: ‘Muntu udi muledibue kudi mukaji udi ne matuku makese a muoyo wende ne mûle tente ne ntatu.’​—Yobo 14:1.

Tshibungu tshikuabu tshidi tshileja lungenyi lutu nalu bantu ba bungi, tshiamba ne: “Butumbi bua mu diulu mbualu budi Nzambi mumane kulongoluela muntu. . . . Muntu udi mua kuikala ne disanka anu yeye mupete diakalenga dia mu diulu.” (New Catholic Encyclopedia) Nkonko ivuabu bele bena mu tshitendelelu tshidibu babikila ne: Ekeleziya wa Kristo (tshia mu États-Unis) yakaleja ne: bantu 87 pa lukama badi bitaba ne: badi mua kuya mu diulu padibu bafua.

Nansha bantu ba bungi badi kabayi bena Kristo batu pabu batekemene bua kuya muaba kampanda mutambe buimpe kunyima kua lufu luabu. Tshilejilu, Ba-mizilman batu batekemene bua kuya mu mparadizu mu diulu. Bena mu tusumbu tua nzambi tua Buloba Bulengele tua bena Buddha ba mu ditunga dia Chine ne dia Japon batu bela meji ne: buobu bambulula njila ne njila muaku eu: “Amitabha,” udi muikale dîna dia Buddha wa Butoke budi Kabuyi Bubuitshidila, nebaledibue tshiakabidi mu Buloba Bulengele anyi mu Mparadizu wa ku luseke ludi dîba dibuelela, muasombabu ne disanka kadiyi kumvuija.

Bualu bua dikema, Bible (mukanda munsantu udibu batambe kukudimuna mu miakulu mivule ne udi nawu bantu ba bungi pa buloba bujima) kêna wamba ne: buloba mmuaba wa kupitshila bua kumona mua kufika ku disanka nansha. Tshilejilu, udi wamba ne: ‘Bantu bakane nebapiane buloba, nebashikamepu tshiendelele.’ (Musambu 37:29) Bible udi kabidi ne mêyi a mushinga atu Yezu muambe a se: ‘Badi ne mitshima mipuekele badi ne disanka, bua buobu nebapiane buloba.’​—Matayo 5:5.

Lungenyi ludi lutangalake lua se: pa buloba apa tudi benyi ne bena luendu ludi luleja ne: lufu nnjila udi ufikisha ku diakalenga. Bikala bualu ebu bulelela, nanku lufu ndibenesha dia bushuwa. Kadi bantu batu bamona lufu mushindu’au anyi, peshi batu bakeba bua kulepesha matuku a muoyo wabu? Malu mamona adi aleja ne: patu bantu bikale nshinshinshi ne basombe ku matshi talalaa, kabatu basue kufua to.

Kadi, bu mudi muoyo pa buloba mûle tente ne malu mabi ne makenga, bantu ba bungi batshidi bamona ne: diulu ke muaba umuepele wa kupetela ditalala ne disanka dilelela. Diulu didi patupu muaba wa ditalala, kawuyi malu mabi ne nsombelu wa tshimvundu anyi? Muaba udi bantu ne bua kutungunukila ne muoyo kunyima kua lufu luabu udi ne bua kuikala anu mu diulu anyi? Pamu’apa mandamuna adi Bible ufila adi mua kukukemesha. Nanku, tudi tukulomba bua ubale tshiena-bualu tshidi tshilonda.