“Bintu bilengele” bidi biuwula tente mu nzubu wa Yehowa

‘Meme [Yehowa] nennyukule matunga onso, ne bintu bilengele bia mu matunga onso nebikale ne bua kubuela; ne nenguuje nzubu eu tente ne butumbi.’​—HAGAI 2:7, NW.

1. Bua tshinyi dîba dia njiwu tutu tudianjila kutuma meji kudi banangibue betu?

 MBINTU kayi bilengele bidi biuwule mu nzubu muebe? Udi ne bintu bia mu nzubu bia mushinga mukole, televizion wa ku idi mipatuke lelu, peshi mashinyi mapiamapia anyi? Nansha wewe muikale ne bintu bionso ebi, kuenaku mua kuitaba ne: bintu bia mushinga muvule mutambe bidi mu nzubu muebe mbantu badimu, bena dîku diebe anyi? Fuanyikijabi ne: bumue butuku udi ujuuka ku tulu ne umvua mu nzubu mufuima muîshi. Nzubu webe mmukuate kapia, ne udi amu ne minite mikese tshianana bua kupatukamu! Ntshinyi tshiwajinga kupandisha kumpala kua bionso? Mbintu biebe bia mu nzubu anyi? N’televizion webe anyi? Mmashinyi ebe anyi? Kuakutumaku meji ebe kudi banangibue bebe anyi? Bushuwa ke tshiwenza, bualu bantu badi ne mushinga wa bungi kupita bintu.

2. Bufuki bua Yehowa budi bunene kayi, ne ntshitupa kayi tshiabu tshivua Yezu mutambe kunanga?

² Mpindieu ela meji bua bidi bitangila Yehowa Nzambi ne Muanende, Yezu Kristo. Yehowa ke ‘wakafuka diulu ne buloba ne bintu bionso bidimu.’ (Bienzedi 4:24) Wakenza bintu bionso ku butuangaji bua Muanende, “muenji wa mudimu wa dilambu.” (Nsumuinu 8:30, 31, NW; Yone 1:3; Kolosai 1:15-17) Bulelela Yehowa ne Yezu badi bangata ne mushinga bifukibua bionso. (Tangila Genese 1:31.) Kadi buebe wewe, ntshitupa kayi tshia bufuki tshidi ne mushinga wa bungi ku mêsu kuabu​—mbintu anyi bantu? Yezu (bu meji adibu batele mu Nsumuinu) udi wamba ne: “Bintu bimvua munange bivua ne bana ba bantu,” peshi bilondeshile nkudimuinu wa William F. Beck, Yezu uvua “usanka bua bantu.”

3. Mmulayi kayi wakamba Yehowa ku butuangaji bua Hagai?

³ Bulelela Yehowa udi wangata bantu ne mushinga wa bungi. Tshintu tshimue tshidi tshijadika bualu ebu tshidi mu mulayi wakambaye mu tshidimu tshia 520 K.B.B. ku butuangaji bua muprofete Hagai. Yehowa wakamba ne: “Nennyukule matunga onso, ne bintu bilengele bia mu matunga onso nebikale ne bua kubuela; ne nenguuje nzubu  eu tente ne butumbi. . . . Butumbi bua nzubu eu nebulue bunene kupita bua eu wa kale.”​—Hagai 2:7, 9, NW.

4, 5. (a) Bua tshinyi kabiena bia meji bua kukoma ne: “bintu bilengele” bidi bileja butumbi bua bintu bia ku mubidi? (b) “Bintu bilengele” ntshinyi, ne bua tshinyi udi umvuija nanku?

⁴ ‘Mbintu kayi bilengele’ bivua ne bua kuwula tente mu nzubu wa Yehowa ne kubuejamu butumbi bua katshia ne katshia? Mbintu bivule bia mushinga mukole bienza bua kulengeja nabi nzubu anyi? Nngolo, argent anyi mabue a mushinga anyi? Kabiena mua kuikala bia meji bua kuamba nanku to. Vuluka ne: ntempelo wa kumpala uvuabu babanjije bidimu bitue ku nkama itanu bimane kupite, uvua nzubu wa mushinga wa dolare miliyare mipite bungi! * Ee, Yehowa kavua mua kutekemena bua ntempelo eu muibaka kudi bena Yuda bakese aba bakapingana mu ditunga diabu kupitaye ntempelo wa Solomo ku butumbi bua bintu bivuamu to!

⁵ Nenku, “bintu bilengele” bivua ne bua kuwula mu nzubu wa Yehowa mbintu kayi? Bidi bimueneka se: mbantu. Bushuwa, tshidi tshisankisha Yehowa ki mbiamu bia argent ne ngolo to, kadi mbantu badi bamusadila bualu mbamunange. (Nsumuinu 27:11; 1 Kolinto 10:26) Ee, Yehowa udi wangata ne mushinga bantu balume, bantu bakaji ne bana bonso badi bamutendelela mu mushindu udiye wanyisha. (Yone 4:23, 24) Buobu aba ke “bintu bilengele,” ne badi ne mushinga wa bungi ku mêsu kua Yehowa kupita bintu bionso bivua bilengeja nabi ntempelo wa Solomo.

6. Ntempelo wa kale wa Nzambi uvua ne tshipatshila kayi?

⁶ Nansha muvuaku buluishi, bakasulula ntempelo au ne kumujikija mu tshidimu tshia 515 K.B.B. Too ne pakadilambula Yezu, ntempelo wa mu Yelushalema wakatungunuka ne kuikala muaba wa ntendelelu mukezuke bua “bintu bilengele” bienza ne bena Yuda ne bena bisamba bikuabu bavua bitabuje Buena-Yuda. Kadi ntempelo eu uvua uleja tshikuabu tshintu tshia mushinga mukole mutambe, bu mutualua kumona.

Dikumbana dia mu bidimu lukama bia kumpala

7. (a) Ntempelo wa kale wa Nzambi mu Yelushalema uvua mundidimbi wa tshinyi? (b) Amba malu avua muakuidi munene wenza Dituku dia Dibuikidila.

⁷ Ntempelo wa mu Yelushalema uvua mundidimbi wa ndongoluelu munene wa ntendelelu, udi muikale ntempelo wa mu nyuma wa Nzambi, uvua Yehowa muase mu tshidimu tshia 29 B.B., pa kutekamu Yezu bu Muakuidi Munene. (Ebelu 5:4-10; 9:11, 12) Mona muvua midimu ivua muakuidi munene wenza mu Isalele mifuanangane ne malu akenza Yezu. Tshidimu tshionso mu Dituku dia Dibuikidila, muakuidi munene uvua uya ku tshilambuilu tshivua mu lubanza lua ntempelo ne ulambula ngombe bua kubuikidila nende bakuidi mpekatu. Kunyima, uvua ubuela mu ntempelo ne mashi a ngombe au, upita biibi bivua biabulula lubanza ne muaba Munsantu ne pashishe uya dia muamua dia tshilamba (rido) tshivua tshiabulula muaba Munsantu ne eu uvua Mutambe-Bunsantu. Pavuaye ufika munda mua muaba Mutambe-Bunsantu, muakuidi munene uvua usanshila mashi kumpala kua mushete wa tshipungidi. Pashishe, uvua ulambula mbuji umue bua kubuikidila mpekatu ya bisa 12 bia Isalele bivua kabiyi bia bakuidi. (Lewitiki 16:5-15) Ndiumvuangana kayi didi pankatshi pa malu onso aa ne ntempelo wa mu nyuma wa Nzambi?

8. (a) Mmu ngumvuilu kayi muvua Nzambi mulambule Yezu kubangila mu 29 B.B.? (b) Mmalanda kayi a pa buawu avua nawu Yezu ne Yehowa mu mudimu wende wonso wakenzaye pa buloba?

⁸ Ee, ku disua diende, Nzambi wakalambula Yezu ne kumuela manyi a spiritu munsantu dîba dia batismo wende mu tshidimu tshia 29 B.B. (Luka 3:21, 22) Bushuwa, bualu ebu buvua buleja didilambula dia Yezu ne kabidi ntuadijilu wa mudimu wende wakanenga bidimu bisatu ne tshitupa. (Ebelu 10:5-10) Dîba adi, ku mêsu kua Nzambi, Yezu uvua muana muledibue ku spiritu. Bantu bakuabu kabavua mua kujingulula muaba uvua nawu Yezu ku mêsu kua Tatuende wa mu diulu nansha. Bivua anu bu ne: tshilamba tshivua tshibajike bua kabasunguluji malu anu bu muvua tshilamba tshijika bantu bavua mu lubanza lua tabernakle bua kabamonyi muaba Munsantu.​—Ekesode 40:28.

9. Bua tshinyi Yezu kavua mua kubuela mu diulu ne mubidi wa bumuntu, ne mmunyi muakalongololabu bualu ebu?

 ⁹ Nansha muvuaye Muana wa Nzambi muela manyi a spiritu, Yezu mutshikale pa buloba kavua mua kupeta muoyo wa mu diulu nansha. Bua tshinyi? Bualu mubidi ne mashi kabiena mua kupiana Bukalenge bua Nzambi to. (1 Kolinto 15:44, 50) Bu muvua mubidi wa bumuntu wa Yezu muikale bu tshintu tshivua tshijika, uvua tshimfuanyi tshia rido anyi tshilamba tshivua tshiabulula muaba Munsantu ne muaba Mutambe-Bunsantu mu ntempelo wa kale wa Nzambi. (Ebelu 10:20) Kadi matuku asatu kunyima kua lufu luende, Nzambi wakabiisha Yezu katshiyi ne mubidi wa bumuntu. (1 Petelo 3:18) Dîba adi uvua mua kubuela mu muaba Mutambe-Bunsantu wa ntempelo wa mu nyuma wa Nzambi, mu diulu mene. Ne ke tshiakenzeka. Paulo udi ufunda ne: ‘Kristo kakabuela mu muaba wa tshijila [mbimueneka ne: udi utuma lungenyi ku muaba Mutambe-Bunsantu] muasa ne bianza, mufuanangane ne muaba mulelela; kadi wakabuela mu diulu muine, bua kumuenekaye mpindieu kumpala kua Nzambi bua bualu buetu.’​—Ebelu 9:24.

10. Ntshinyi tshiakenza Yezu diakamue pakapinganaye mu diulu?

¹⁰ Mu diulu, Yezu ‘wakasanshila mashi’ a mulambu wende pa kufila kudi Yehowa mushinga wa tshia-bupikudi wa mashi ende adi afila muoyo. Kadi Yezu kakashikidila anu apu to. Katupa kîpi kumpala kua lufu luende, wakambila bayidi bende ne: “Mpindiewu ndi nya kunulongoluela muaba. Pangikala muye kunulongoluela muaba, nempingane bua kunuangata, nuikale muaba undi meme.” (Yone 14:2, 3, MMM) Nenku, pakabuelaye mu muaba Mutambe-Bunsantu, peshi mu diulu, Yezu wakunzuluila bantu bakuabu njila bua kumulondabu. (Ebelu 6:19, 20) Bungi buabu buvua ne bua kuikala bua bantu 144 000 bavua ne bua kusadila bu bakuidi bindondi mu ntempelo wa mu nyuma wa Nzambi. (Buakabuluibua 7:4; 14:1; 20:6) Anu bu muvua muakuidi munene mu Isalele ubuela kumpala ne mashi a ngombe mu muaba Mutambe-Bunsantu bua kubuikidila mpekatu ya bakuidi, bakenza mudimu ne mushinga wa mashi avua Yezu mupuekeshe bangabanga bua bakuidi bindondi aba 144 000. *

“Bintu Bilengele” bia matuku etu aa

11. Muakuidi munene mu Isalele uvua ulambula mbuji bua banganyi, ne bivua mundidimbi wa tshinyi?

¹¹ Bidi bimueneka ne: disangisha dia bela manyi bonso diakajika pabuipi ne tshidimu tshia 1935. * Kadi Yehowa wakatungunuka ne kupesha nzubu wende butumbi. Eyowa, “bintu bilengele” bitshivua ne bua kubuelamu. Vuluka ne: muakuidi munene mu Isalele uvua ulambula nyama ibidi: ngombe bua mpekatu ya bakuidi ne mbuji bua mpekatu ya bisa bivua kabiyi bia bakuidi. Bu muvua bakuidi bikale tshimfuanyi tshia bela manyi  bavua ne bua kuikala ne Yezu mu Bukalenge bua mu diulu, bisa bivua kabiyi bia bakuidi biobi bivua bileja banganyi? Diandamuna didi mu mêyi a Yezu mafunda mu Yone 10:16 ne: ‘Ndi ne mikoko mikuabu idi kayiyi ya mu lupangu elu; bundi nabu mbua kulua nayi, neyumvue dîyi dianyi; neyilue tshisumbu tshimue, ne mulami umue.’ Nunku, mashi avua Yezu mupuekeshe adi bua bisumbu bibidi bia bantu. Tshia kumpala: tshia bena Kristo badi ne ditekemena dia kukokesha pamue ne Yezu mu diulu. Tshibidi: tshia bantu badi batekemene bua kuikala ne muoyo wa kashidi mu mparadizu pa buloba. Bushuwa, tshisumbu tshia bantu etshi tshibidi ke tshivua tshileja mu tshimfuanyi kudi “bintu bilengele” bia mu mulayi wa Hagai.​—Mika 4:1, 2; 1 Yone 2:1, 2.

12. Mmunyi mudi “bintu bilengele” bia bungi bikokibua mu nzubu wa Nzambi lelu’eu?

¹² “Bintu bilengele” ebi bitshidi anu biuwula mu nzubu wa Yehowa. Mu bidimu biashadi ebi, mbanyishe mudimu wetu ku Mputu wa ku Est, mu bimue bitupa bia Afrike ne mu matunga makuabu, ne muanda eu mmuambuluishe bua lumu luimpe lua Bukalenge bua Nzambi bukadi bukokesha kumvuikalu too ne miaba ivualu kaluyi luanji kufika. Bua kutumikila dîyi divua Yezu mutume, bantu balengele aba padibu babuela mu ntempelo wa Nzambi, badi pabu benza madikolela bua kuvuija bakuabu ba bungi bayidi. (Matayo 28:19, 20) Padibu benza madikolela a nunku, badi bapeta bantu ba bungi, bakulumpe ne bana, badi mua kulua “bintu bilengele” bialua kuwuja butumbi mu nzubu wa Yehowa. Tangila bilejilu bikese patupu bia mushindu udi mudimu eu wenzeka.

13. Ntshinyi tshivua muana wa bakaji mukese wa mu Bolivie muenze bua kumuangalaja mukenji wa Bukalenge ne lukunukunu?

¹³ Mu ditunga dia Bolivie, muana wa bakaji wa bidimu bitanu udi baledi bende bikale Bantemu wakalomba dianyisha kudi mulongeshi bua yeye kupumbisha mu kalasa lumingu luvua mutangidi wa tshijengu ne bua kulua mu tshisumbu tshiabu. Bua tshinyi? Bualu uvua usua kupatuka mu buambi lumingu alu lujima lua mudimu lua pa bualu. Baledi bende bakakema bikole, kadi e kusanka bua mmuenenu wende au mulenga. Muana eu mukese wa bakaji udi mpindieu ulombola malonga a Bible atanu, ne bamue ba ku badiye ulonga  nabu bakadi batuadije kubuela mu bisangilu bia bena Kristo. Nansha mulongeshi wende wakaya nende too ne ku Nzubu wa Bukalenge. Pamu’apa kunyima kua matuku, bamue ba ku balongi bende ba Bible nebalue “bintu bilengele” bialua kuwuja butumbi mu nzubu wa Yehowa.

14. Mu Corée, muanetu wa bakaji wakasuminyina bua kuyisha muntu uvua umueneka kayi usankidila bulelela wakapeta bipeta kayi bimpe?

¹⁴ Pavuaye windila ku ngala wa kawulu, muntu mukaji kampanda muena Kristo wa mu ditunga dia Corée wakasa diyuki ne mulongi uvua ne kasanji kende ka mu matshi uteleja mijiki. Wakamukonka ne: “Utu utendelela anyi?” Mulongi kumuandamuna ne: “Malu a Nzambi kaatu ansankisha to.” Muanetu wa bakaji kakapuwa to. Wakatungunuka wamba ne: “Padi bidimu bienda biya, muntu udi mua kusua bua kusungula tshiende tshitendelelu. Kadi bikalaye kayi mumanye malu a bitendelelu, udi mua kufika ku disungula tshidi tshibi.” Mpala wa mulongi e kushintuluka, diakamue kutuadijaye kuteleja muanetu wa bakaji eu ne ntema. Wakamupesha mukanda wa Y a-t-il un Créateur qui se soucie de vous? ne kumuambilaye ne: mukanda eu uvua ne bua kumuambuluisha bikole pajingaye bua kusungula tshiende tshitendelelu. Kakelakana bua kuangata mukanda eu to. Lumingu luvua lulonda, wakatuadija kulonga Bible ne Bantemu ba Yehowa, ne patudi tuamba apa ukadi ubuela mu bisangilu bionso bia tshisumbu.

15. Mmunyi mutu muana wa bakaji mukuabu wa mu Japon utuadija malonga a Bible, ne mmunyi mudi madikolela ende mafutshibue?

¹⁵ Mu ditunga dia Japon, Megumi, muana wa bakaji wa bidimu 12, udi wangata tshilongelu tshiende bu muaba muakanyine bua kuyisha ne kulongesha Bible. Mmufike mene ne ku dituadija malonga a Bible a bungi. Mmunyi mutu Megumi wenza? Bu mutuye ubala Bible anyi ulongolola bisangilu dîba didibu balongolole bua kudia, bana ba mu kalasa kabu batu misangu mivule bamukonka tshituye wenza. Bamue batu bebeja Megumi bua tshinyi katu ubuelakana mu amue malu atu enzeka mu kalasa. Megumi utu wandamuna nkonko yabu kabidi ubambila ne: Nzambi utu ne dîna. Misangu mivule bitu bijula bamuteleji dijinga dia kumanya bia bungi. Pashishe utu ubalomba bua kulongabu nende Bible. Megumi udi ulombola mpindieu malonga 20​—18 a kudiwu ne bana ba mu kalasa kabu.

16. Mmunyi muakapeta muanetu wa mu Cameroun mushindu wa kutuadija malonga a Bible ne bamue bantu bavua bamuseka?

¹⁶ Mu ditunga dia Cameroun, bantu muanda-mukulu bavua benza mudimu muaba kampanda bakabikila muanetu mukuabu uvua ufila mikanda idi yumvuija Bible kudi bapitshi ba njila. Bu muvuabu bajinga bua kumuseka, bakamuebeja bua tshinyi katu witabuja dilongesha dia Busatu Bunsantu, kapia ka inferno anyi dibenga kufua dia anyima. Muanetu eu wakenza mudimu ne Bible bua kuandamuna nkonko yabu. Nenku, basatu ba kudibu bakitaba bua kulonga Bible. Daniel, umue wa ku bantu aba wakatuadija kubuela mu bisangilu ne kuosha bintu biende bionso bia bumpaka-manga. (Buakabuluibua 21:8) Tshidimu tshimue katshiakapita, Daniel e kutambula.

17. Mmunyi muvua bamue bana betu ba mu El Salvador baleje budimu bua kuyisha muntu uvua kumpala kayi usua bua kuteleja mukenji wa Bukalenge?

¹⁷ Mu ditunga dia El Salvador, muntu mukuabu uvua usuikila mbua wende wa luonji ku tshiibi dîba dionso divuaye umona Bantemu ba Yehowa benda balua. Uvua windila too ne pavuabu bapita, ne kunyima upingaja mbua mu nzubu. Bana betu kabavua ne mushindu wa kuyikila ne muntu eu to. Nunku, dimue edi bakateta mushindu mukuabu wa kutuadija diyuki. Bu muvuabu bamanye ne: muntu eu uvua mua kubateleja, bakapangadija  bua kuyisha mbua wende. Bakaya ku nzubu au, kuela mbua muoyo ne kumuambila muvuabu ne disanka dia kuyikila nende. Bakamulondela bua tshikondo tshikala mparadizu pa buloba, tshikondo tshikala muntu nansha umue kayi ne tshiji​—eyowa, tshikondo tshikala nansha nyama mu ditalala. Pashishe bakalaya mbua ne kanemu kuonso ne kuasabu luendu. Bualu bua dikema, muntu eu wakapatuka mu nzubu ne wakabalomba luse bua muvuaye kayi muanji kupesha Bantemu mpunga bua kuyikilabu nende. Wakangata bibejibeji ne bakatuadija kulonga nende Bible. Mpindieu ukadi muanetu ne mmulue umue wa ku “bintu bilengele”!

“Kanutshinyi”

18. Nntatu kayi idi bena Kristo ba bungi bapeta, kadi mmunyi mutu Yehowa wangata bantu badi bamutendelela?

¹⁸ Wewe pebe udi wenza mudimu wa mushinga mukole wa diyisha Bukalenge ne dienza bayidi anyi? Bikalabi nanku, bulelela udi wa diakalenga. Bushuwa, ku mudimu eu wa diyisha ke kudi Yehowa ukokela “bintu bilengele” mu nzubu wende. (Yone 6:44) Anu mutubi bienzeka, ku misangu udi mua kutshioka anyi kuteketa mu maboko. Imue misangu, nansha bamue basadidi ba Yehowa ba lulamatu batu badimona bu badi kabayi ne mushinga. Kadi kolesha muoyo! Yehowa udi wangata muntu yonso udi umutendelela bu mulengele, ne udi uditatshisha menemene bua lupandu luebe.​—2 Petelo 3:9.

19. Ndikankamija kayi diakafila Yehowa ku butuangaji bua Hagai, ne mmunyi mudi mêyi aa mua kutupesha makanda?

¹⁹ Padi mu maboko mututekete, nansha bua ditukengesha peshi bua malu makuabu adi kaayi atusankisha, mêyi avua Yehowa muambile bena Yuda bakapingana mu buloba buabu adi mua kutupesha makanda. Mu Hagai 2:4-6, tudi tubala ne: ‘Kadi Yehowa udi wamba ne: Kolesha mutshima webe mpindieu, Zelubabela; wikale ne mutshima mukole, wewe Yoshua, muana wa Yehosadaka, muakuidi munene; koleshayi mitshima yenu, nuenu bantu bonso ba mu buloba ebu; enzayi mudimu kabidi, bualu bua Yehowa wa misumba udi wamba ne: Meme ndi n’enu. Dîyi dingakapunga n’enu panuakalopoka mu Ejipitu didi dijalame. Nyuma wanyi neikale munkatshi muenu; kanutshinyi. Bualu bua Yehowa wa misumba udi wamba ne: Papita tshikondo tshîpi, nenzakaje diulu ne buloba, mâyi manene ne buloba bûme.’ Tangila, Yehowa udi utukankamija bua tukoleshe ku muoyo, ne kabidi udi utupesha bintu bidi mua kutupesha makanda. Mushindu kayi? Mona mêyi aa adi akankamija: “Meme ndi n’enu.” Mmunyipu mudibi bikolesha ditabuja dietu patudi tumanya se: nansha tuetu mua kupeta ntatu ya mushindu kayi, Yehowa udi n’etu!​—Lomo 8:31.

20. Mmunyi mudi butumbi bua katshia ne katshia buwula mpindieu mu nzubu wa Yehowa?

²⁰ Yehowa mmuleje menemene ne: katu ulekela bantu bende to. Wakamba ku butuangaji bua muprofete Hagai ne: ‘Butumbi bua nzubu eu bua matuku alualua nebupite butumbi buende bua diambedi bunene; mu muaba eu nempeshe bantu ditalala.’ (Hagai 2:9) Eyowa, lelu’eu butumbi butambe bunene budi mu ntempelo wa mu nyuma wa Yehowa. Ke bua tshinyi ku tshidimu tshionso bantu binunu nkama mivule badi babuela mu ntendelelu mulelela. Badi babadiisha bimpe mu nyuma ne nansha mudi malu a pa buloba apa manyanguke, badi ne ditalala dialua kuvula mu bukua-panu bupiabupia bua Nzambi.​—Yeshaya 9:6, 7; Luka 12:42.

21. Ndipangadika kayi ditudi ne bua kuikala nadi?

²¹ Yehowa ukadi pa kunyukula matunga ku Armagedone. (Buakabuluibua 16:14, 16) Nenku tuangatayi dîba didi dishale bua kupandisha bantu ba bungi. Tukoleshayi mitshima yetu ne tueyemenayi anu Yehowa. Tupangadijayi bua kutungunuka ne kutendelela mu ntempelo wende munene wa mu nyuma, tumuwuja tente ne bikuabu “bintu bilengele” too ne padi Yehowa wamba ne: mudimu wetu wajiki.

[Mêyi adi kuinshi]

Udi muvuluke anyi?

• Ntshinyi tshidi ne mushinga wa bungi ku mêsu kua Yehowa kupita bintu?

• Yezu wakapuekesha mashi ende bua bisumbu kayi bibidi?

• Mbanganyi badi “bintu bilengele” bivua ne bua kuwuja nzubu wa Yehowa ne butumbi?

• Ntshijadiki kayi tshitudi natshi tshia se: mulayi wa Hagai udi wenda ukumbana lelu?

[Nkonko ya dilonga]

[Diumvuija dia bidi mu tshimfuanyi tshia mu dibeji 16]

(Bua kumona malu bimpe, tangila mu mukanda)

Udi mumanye diumvuija dia mu tshimfuanyi dia ntempelo wa kale wa Yehowa anyi?

Tshilamba tshikudika

Munsantu

Tshilambuilu

Mutambe-Bunsantu

Lutanda

Lubanza

[Tshimfuanyi mu dibeji 17]

Muakuidi munene uvua ulambula ngombe bua mpekatu ya bakuidi ne mbuji bua mpekatu ya bisa bia Isalele bivua kabiyi bia bakuidi

[Tshimfuanyi mu dibeji 18]

Mudimu wa pa buloba bujima wa diyisha Bukalenge udi ukoka misumba ya bantu mu nzubu wa Yehowa