Udi mumanye anyi?
Nsunagoga wa mu bidimu lukama bia kumpala: Tshimfuanyi etshi tshidi tshileja bimue bintu bivua bienza nsunagoga wa mu bidimu lukama bia kumpala uvua ku Gamla, ntanta wa kilometre mitue ku 10 ku nord-est kua mbuu wa Galela. Tshidi tshileja muvua nsunagoga ya kale mua kuikala
Nsunagoga ivua mifumine kuepi?
MUAKU “nsunagoga” mmufumine ku muaku wa mu tshiena Greke udi umvuija “tshisumbu” anyi “kudisangisha pamue.” Dîna edi ndikumbane bualu nsunagoga mmiaba itu bena Yuda badisangishila bua kulonga ne kutendelela katshia anu ku kale. Kabena bakula bua nsunagoga mu Mifundu ya mu tshiena Ebelu patoke to, kadi patudi tubala Mifundu ya mu tshiena Greke ya buena Kristo, bidi bimueneka patoke ne: miaba ya masangisha eyi ikavuaku mu bidimu lukama bia kumpala.
Bamanyi ba bungi badi bela meji ne: nsunagoga yakatuadija tshikondo tshivuabu bakuate bena Yuda baye nabu mu Babilona. Mukanda mukuabu udi wamba ne: “Bena Yuda bavua badisangisha ku musangu ne ku musangu bua kubala Mifundu, pamuapa matuku a Nsabatu, bualu bavua dijinga ne busambi mu lutatu luabu bu muvuabu baye nabu mu ditunga dienyi, kabayi ne Ntempelo.” (Encyclopaedia Judaica) Bidi bimueneka ne: pavuabu balekele bena Yuda bapingane kuabu, bakatungunuka ne kudisangisha bua kusambila ne kubala Mifundu, ke kuibakabu nsunagoga miaba yonso ivuabu baya kusombela.
Mu bidimu lukama bia kumpala, nsunagoga ikavua milue miaba ivua bena Yuda badisangishila bua malu a ntendelelu ne malu abu makuabu. Bavua bayibake miaba yonso ivuabu basanganyibua kumpenga kua mbuu wa Mediterane, ku Moyen-Orient kuonso, ne mu Isalele muine. Mulongeshi Lee Levine wa ku Université hébraïque de Jérusalem udi wamba ne: bena Yuda “bavua balongela [ku nsunagoga], badilaku biakudia bia tshijila, balumbuluishilanganaku, belaku makuta, ne badisangishilaku bua malu a tshididi ne malu abu makuabu.” Udi wamba kabidi ne: “Kadi malu a ntendelelu ke avua atamba kuenzekaku.” Nunku kabiena bikemesha bua muvua Yezu ubuela bikole mu masangisha avua enzeka mu nsunagoga mishilashilangane. (Mâko 1:21; 6:2; Luka 4:16) Pavuaye ubuelamu, uvua ulongesha, ubela, ne ukankamija bavuamu. Pakavua tshisumbu tshia bena Kristo tshiledibue, mupostolo Paulo wakayisha pende bikole mu nsunagoga mishilashilangane. Bantu bavua banange malu a Nzambi bavua baya ku nsunagoga. Ke bualu kayi pavua Paulo ubuela mu tshimenga kampanda, uvua ne tshibidilu tshia kuanji kuya ku nsunagoga bua kuyisha.—Bien. 17:1, 2; 18:4.
Mona bikuabu:
TSHIBUMBA TSHIA NSENTEDI
Nsunagoga mmiaba ivua Yezu ne bayidi bende bayisha
YEZU UDI NJILA NE BULELELA NE MUOYO
Mu nsunagoga wa mu Nazaleta
Ntshinyi tshivua Yezu muambe tshivua tshisake bantu ba kuabu bua kujinga bua kumushipa?
