1. Mmalu kayi mimpe adi tshia kupikula natshi bantu tshitupetesha?

MULAMBU udi upikula wa Yezu Kristo udi upetesha bantu mabenesha a bungi. Tshilejilu, tshiakupikula natshi bantu tshidi tshiambuluisha bana ba Adama bonso badi banange buakane bua kuluabu bena mu dîku dia Nzambi dimue dituku. Dibenesha dikuabu ndia ne: tudi mua kushala ne muoyo kashidi ne disanka. Kupita apu, tshia kupikula natshi bantu tshidi tshiambuluisha bua kukumbaja malu adi ne mushinga wa bungi kudi muntu yonso, mu diulu ne pa buloba.​—Ebelu 1:8, 9.

2. a) Mmalu kayi adi ne mushinga wa bungi mu diulu ne pa buloba avua Yezu muambe mu disambila diende? (Tangila tshimfuanyi tshia ntuadijilu tshia tshiena-bualu.) b) Ntshinyi tshituakonkonona mu tshiena-bualu etshi?

² Bidimu bitue ku bibidi kumpala kua lufu luende, Yezu wakalongesha bayidi bende bua kusambila nunku: “Tatu wetu udi mu diulu, dîna diebe ditumbishibue. Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:9, 10) Tukonkononayi mudi tshia kupikula natshi bantu  tshienza bua kutumbishisha dîna dia Yehowa, bua Bukalenge bua Nzambi bukokeshe ne bua disua dia Nzambi dienzeke.

3. Dîna dia Yehowa didi dileja tshinyi? Mmunyi muvua Satana muluishe dîna dia Yehowa?

³ Tshia kumpala, Yezu wakasambila bua dîna dia Yehowa ditumbishibue anyi divuijibue dia tshijila. Dîna dia Yehowa didi dileja tshidi Yehowa yeye nkayende muikale. Udi ne bukole bua bungi, ne m’Muntu muakane mu diulu ne pa buloba. Yezu wakamubikila kabidi ne: “Tatu wa tshijila.” (Yone 17:11) Bu mudi Yehowa wa tshijila, bintu bionso bidiye wenza ne mikenji yonso idiye wela mbia tshijila. Kadi mu Edene, Satana wakelesha mpata muinshi muinshi bukenji budi nabu Nzambi bua kuelela bantu mikenji. Wakashiminyina Yehowa malu ne kuluishaye dîna dia Nzambi anyi lumu luende.​—Genese 3:1-5.

4. Mmunyi muvua Yezu muangate dîna dia Nzambi bu dia tshijila?

⁴ Ku lukuabu luseke, Yezu uvua munange bikole dîna dia Yehowa ne wakenza tshionso tshivuaye mua kuenza bua kuditumbisha. (Yone 17:25, 26) Mushindu kayi? Yezu wakambuluisha bantu kupitshila ku bienzedi biende ne malongesha ende bua kumonabu ne: mikenji ya Yehowa idi miakane ne malu onso adiye utulomba bua kuenza adi bua diakalenga dietu. (Bala Misambu 40:8-10.) Nansha muvua Satana mukengeshishe Yezu ne mumufikishe ku lufu lubi, wakashala anu ne lulamatu. Wakaleja ne: muntu mupuangane udi mua kutumikila Yehowa ne muoyo mujima.

5. Mmunyi mutudi mua kuangata dîna dia Yehowa bu dia tshijila?

⁵ Mmunyi mutudi mua kuleja ne: tudi banange dîna dia Yehowa? Nku bikadilu bietu. Yehowa udi utulomba bua tuikale ba tshijila. (Bala 1 Petelo 1:15, 16.) Bidi biumvuija ne: tudi ne bua kumutendelela anu yeye nkayende ne kumutumikila ne muoyo mujima. Nansha padibu batuluisha, tudi tuenza muetu muonso bua kuenza malu mu mushindu udi Yehowa utulongesha. Patudi tutumikila mikenji ya Yehowa, tudi tutumbisha dîna diende. (Matayi 5:14-16) Tudi tuleja ne: mikenji yende mmimpe, kadi Satana yeye mmuena dishima. Katuena bapuangane to, nanku netuenze anu bilema. Kadi patudi tuenza bilema, tudi tunyingalala ne tuenza muetu muonso bua kubenga kuenza malu adi apendeshisha dîna dia Yehowa.​—Misambu 79:9.

6. Bua tshinyi Yehowa udi utuangata bu bakane nansha mutudi bena mibi?

⁶ Nansha tuetu bikale bela manyi anyi “mikoko mikuabu,” Yehowa udi utubuikidila mibi yetu tuetu bikale ne ditabuja mu tshia kupikula natshi bantu. Udi wangata badi badilambule kudiye bu batendeledi bende. Udi wangata bena Kristo bakane badi bela manyi bu bana bende, ne ‘mikoko mikuabu’ idi miakane bu balunda bende. (Yone 10:16; Lomo 5:1, 2; Yakobo 2:21-25) Nunku nansha lelu, tshia kupikula natshi bantu tshidi tshitupetesha mushindu wa kudia malanda mimpe ne Tatu wetu ne kutumbisha dîna diende.

7. Mmasanka kayi adi tshia kupikula natshi bantu tshitupetesha?

⁷ Yezu wakamba mu disambila dia tshilejilu ne: “Bukalenge buebe bulue.” Mmunyi mudi tshia kupikula natshi bantu tshiambuluisha bua Bukalenge bua Nzambi kuluabu? Bukalenge anyi mbulamatadi wa Nzambi mmuenza ne Yezu ne bantu 144 000 basungula pa buloba. Tshia kupikula natshi tshidi tshipetesha bantu aba mushindu wa kubika ku  lufu bua kuya mu diulu. (Buakabuluibua 5:9, 10; 14:1) Nebikale bakalenge ne bakuidi ne nebakokeshe buloba pamue ne Yezu bua bidimu tshinunu. Mu tshikondo atshi, Yehowa neenze mudimu ne Bukalenge bua kuvuija buloba mparadizu ne bua kuambuluisha bantu bonso bua kuluabu bapuangane. Batendeledi ba Yehowa ba mu diulu ne ba pa buloba nebalue ndekelu wa bionso bena mu dîku dimue. (Buakabuluibua 5:13; 20:6) Yezu neabutule Satana ne neajikije ntatu yonso idiye mukebeshe.​—Genese 3:15.

8. a) Mmunyi muvua Yezu muambuluishe bayidi bende bua kumvuabu ne: Bukalenge bua Nzambi budi ne mushinga? b) Mmunyi mutudi tutua Bukalenge ebu nyama ku mikolo lelu?

⁸ Yezu wakambuluisha bayidi bende bua kumvuabu mushinga udi nawu Bukalenge bua Nzambi. Mushindu kayi? Diakamue Yezu mumane kutambula, wakatuadija kuyisha “lumu luimpe lua Bukalenge bua Nzambi” muaba onso uvuaye uya. (Luka 4:43) Wakambila kabidi bayidi bende bua kuikala bantemu bende “too ne ku ntengu ya buloba.” (Bienzedi 1:6-8) Lelu, ku diambuluisha dia mudimu wa kuyisha Bukalenge, bantu mbapete mpunga wa kulonga malu a tshia kupikula natshi bantu ne mbalue bena Bukalenge bua Nzambi. Tudi tuleja ne: tudi bena dia Bukalenge ba lulamatu patudi tuambuluisha bela manyi bua kuyisha lumu luimpe pa buloba bujima.​—Matayi 24:14; 25:40.

9. Bua tshinyi tudi bajadike ne: Yehowa neakumbaje malu adiye mulongolole bua bantu?

⁹ Ntshinyi tshivua Yezu usua kumvuija pakaluaye kuamba ne: “Disua diebe dienzeke”? Padi Yehowa wamba ne: bualu kampanda nebuenzeke, nebuenzeke anu. (Yeshaya 55:11) Buntomboji bua Satana kabuakupangisha Yehowa bua kuenza tshidiye musue to. Ntshinyi tshivua disua dia Yehowa bua buloba? Uvua musue bua Buloba buwule ne bana bapuangane ba Adama ne Eva. (Genese 1:28) Bu Adama ne Eva bafue kabayi balele bana, tshivua Nzambi mulongolole bua kuwuja buloba ne bana babu tshivua mua kuya mu mâyi. Nunku Yehowa wakabanyishila bua kulelabu bana. Tshia kupikula natshi tshidi tshipesha bantu bonso badi baleja ditabuja mushindu wa kulua bapuangane ne kushala ne muoyo bua kashidi. Yehowa mmunange bantu ne mmusue bua tuikale ne nsombelu muimpe udiye mutulongoluele.

10. Mmunyi mudi tshia kupikula natshi tshiambuluisha bantu bakadi bafue?

¹⁰ Netuambe tshinyi bua miliyo ya bungi ya bantu bakadi bafue bavua kabayi ne mpunga wa kumanya Yehowa? Yehowa mmusue bua bantu bikale ne muoyo. Nunku neabishe bantu bakadi bafue. Tshia kupikula natshi bantu tshidi tshibapetesha mushindu wa kupetulula muoyo. Pashishe, nebalonge malu a Yehowa ne nebashale ne muoyo bua kashidi. (Bienzedi 24:15) Yehowa Mmpokolo wa muoyo. Padi Yehowa upeshilula bantu bakadi bafue muoyo, udi ulua Tatu wabu. (Misambu 36:9) Yezu wakaleja mu disambila dia tshilejilu ne: Yehowa udi “Tatu wetu udi mu diulu.” (Matayi 6:9) Yehowa mmupeshe Yezu mudimu wa mushinga mukole wa kubisha bafue. Yezu wakamba ne: “Meme ndi dibika ne muoyo.”​—Yone 6:40, 44; 11:25.

11. Ntshinyi tshidi disua dia Nzambi bua “musumba munene”?

¹¹ Yezu wakamba kabidi ne: “Muntu yonso udi wenza disua dia Nzambi, yeye ke muanetu wa balume, ke muanetu wa bakaji, ke mamu wanyi.” (Mâko 3:35) Disua dia Nzambi ndia ne: bantu ba mu matunga onso, bisamba bionso ne miakulu yonso balue batendeledi bende. Badi bababikila ne: “musumba munene  wa bantu bavua muntu kayi mua kubala.” Badi ne ditabuja mu tshia kupikula natshi bantu ne mbasue kutumikila Nzambi. Badi bamutumbisha bamba ne: “Lupandu luetu ludi lufumina kudi Nzambi wetu udi musombe mu nkuasa wa bukalenge ne kudi Muana wa mukoko.”​—Buakabuluibua 7:9, 10.

12. Ntshinyi tshidi disambila dia Yezu ditulongesha bua malu avua Yehowa mulongoluele bantu?

¹² Mu disambila dia Yezu dia tshiljeilu, tudi balonge malu a bungi bua Yehowa ne bua malu adiye mulongoluele bantu. Bualu bua kumpala, tudi ne bua kuenza tshionso tshitudi mua kuenza bua kutumbisha dîna dia Yehowa ne kumunemeka. (Yeshaya 8:13) Mulambu wa Yezu udi upikula, udi wambuluisha bua kusungidibua, udi kabidi utumbisha dîna dia Nzambi. Bushuwa, dîna mene dia Yezu didi diumvuija ne: “Yehowa udi lupandu.” Bualu buibidi, Yehowa neenze mudimu ne Bukalenge buende bua kutuadila bantu badi batumikila masanka onso a tshia kupikula natshi. Bualu buisatu, tudi batuishibue ne: kakuena tshiapangisha Yehowa bua kuenza disua diende.​—Misambu 135:6; Yeshaya 46:9, 10.

13. Bua tshinyi tudi tutambula?

¹³ Mushindu munene utudi tuleja ne: tudi ne dianyisha bua tshia kupikula natshi bantu, mpatudi tudilambula kudi Yehowa ne tutambula. Patudi tuenza nunku tudi tuleja ne: tudi ne ditabuja mu tshia kupikula natshi bantu ne “tudi bantu ba Yehowa.” (Lomo 14:8) Patudi tutambula, tudi tulomba Yehowa “kondo ka muoyo kimpe.” (1 Petelo 3:21) Yehowa udi utuandamuna padiye utupetesha mabenesha adi afumina ku tshia kupikula natshi bantu. Tudi batuishibue ne muoyo mujima  ne: neatupeshe tshintu tshionso tshidiye mutulaye.​—Lomo 8:32.

14. Bua tshinyi Yehowa udi utulomba bua kunanga bantu bakuabu?

¹⁴ Bualu buonso budi Yehowa wenza udi ubuenza bualu udi ne dinanga. Disua diende ndia ne: batendeledi bende bamuidikije ne banangangane. (1 Yone 4:8-11) Patudi tunanga bantu, tudi tuleja ne: tudi basue kuikala “bana ba Tatu wenu wa mu diulu.” (Matayi 5:43-48) Kudi mikenji mitambe bunene ibidi: wa kumpala, kunanga Yehowa, ne muibidi, kunanga bantu bakuabu. (Matayi 22:37-40) Umue mushindu utudi tuleja mutudi banange bantu mpatudi tubayisha lumu luimpe lua Bukalenge bua Nzambi. Tuetu tutumikila mukenji wa Yehowa wa kunanga bantu bakuabu, nangananga bena Kristo netu, dinanga ditudi bamunange nadi ‘nedivuijibue dipuangane.’​—1 Yone 4:12, 20.

15. a) Mmasanka kayi atudi tupetela kudi Yehowa lelu? b) Mmasanka kayi atuapeta kumpala eku?

¹⁵ Yehowa udi utujadikila ne: bu mutudi ne ditabuja mu tshia kupikula natshi bantu, mibi yetu ‘neyijimijibue.’ Udi mua kutubuikidila mibi yetu yonso. (Bala Bienzedi 3:19-21.) Anu mutuvua bambe ku ntuadijilu, ku diambuluisha dia tshia kupikula natshi bantu, Yehowa udi wangata bamue bantu bua bikale bana bende mu diulu. Bana bende aba mbela manyi. (Lomo 8:15-17) Udi ulomba bena mu “mikoko mikuabu” bua bikale bena mu dîku diende pa buloba. Bobu bamane kulua bapuangane, nekulue diteta dia ndekelu. Bobu bashale ne lulamatu kudi Yehowa, dîba adi neabangate pabu bu bana bende. (Lomo 8:20, 21; Buakabuluibua 20:7-9) Yehowa neatungunuke anu ne kunanga bana bende bonso. Tshia kupikula natshi bantu netshitungunuke anu ne kutuadila bantu masanka bua kashidi. (Ebelu 9:12) Yehowa mmutupeshe dipa dia mushinga mukole edi, kakuena muntu nansha umue udi mua kutunyengadi.

16. Mmunyi mudi tshia kupikula natshi bantu tshituambuluisha bua kupeta budikadidi?

¹⁶ Tuetu banyingalale bua mibi yetu, kakuena bualu nansha bumue budi Diabolo mua kuenza bua kutupangisha bua tuetu anu kulua bena mu dîku dia Yehowa to. Yezu wakafua “musangu umue bua kashidi.” Tshia kupikula natshi bantu etshi tshiakafutshibua bua kashidi. (Ebelu 9:24-26) Adama wakatutuadila lufu, kadi mulambu wa Yezu neututuadile muoyo wa tshiendelele. Tshia kupikula natshi bantu etshi tshidi mua kutupikula ku bulongodi bua Satana ne ku ditshina dia lufu.​—Ebelu 2:14, 15.

17. Dinanga dia Yehowa didi ne mushinga kayi kuudi?

¹⁷ Milayi ya Nzambi neyikumbane anu kukumbana. Anu bu mudi mikenji idi Yehowa muelele bintu bidiye mufuke kayiyi mua kushintuluka, Yehowa pende kakushintuluka nansha kakese. Kakutuela mâyi ku makasa to. (Malaki 3:6) Yehowa udi utupesha bintu bia bungi pa kumbusha dipa dia muoyo. Mmutunange. “Tudi bamanye ne bitabuje dinanga didi Nzambi nadi buetu tuetu. Nzambi udi dinanga.” (1 Yone 4:16) Milayi yende itu anu ikumbana. Mu katupa kîpi emu, buloba nebulue mparadizu mulenga. Bantu bonso badi ne muoyo nebidikije Yehowa ne nebikale banangangane. Pashishe batendeledi bende bonso ba mu diulu ne ba pa buloba nebambe ne: “Dibenesha ne butumbi ne meji ne disakidila ne bunême ne bukole ne makanda bikale kudi Nzambi wetu kashidi ne tshiendelele. Amen.”​—Buakabuluibua 7:12.