NDI MULELA mu 1923 mu Hemsworth, tshimenga tshia mu Yorkshire, mu Angleterre. Mvua anu ne mukuluanyi umue diende Bob. Pamvua ne bidimu bitue ku tshitema, tatuetu uvua kayi munange lubombo lua bena mu bitendelelu, wakapeta mikanda kampanda ivua yela ntendelelu wa dishima patoke. Malu avuaye mubale akamukemesha bikole. Bidimu ndambu pashishe, Bob Atkinson wakakokola ku nzubu kuetu ne kutuelelaye muyuki wa muanetu Rutherford ne tshisanji tshia fono. Tuakajingulula ne: muyuki eu uvua muenza kudi bena mu kasumbu kavua kapatule mikanda ayi. Baledi banyi bakalomba muanetu Atkinson bua ikale ulua kudia kuetu dilolo dionso ne wandamuna nkonko yetu ya bungi ya malu a mu Bible. Wakatubikila bua kubuela mu bisangilu kua muanetu kampanda uvua kantanta ne kuetu. Tuakitaba diakamue, ne bakenza kasumbu kakese mu Hemsworth. Matuku makese pashishe, tuvua tuakidila basadidi ba zone (batudi tubikila lelu ne: batangidi ba bijengu) kuetu ne tuvua tubikila bampanda-njila ba mu tshitupa atshi bua kudia netu pamue. Kusomba nabu kuvua bushuwa kunsake bua kubidikija.

Tuakatuadija kamushinga ketu, kadi papa wakambila tutu ne: “Wewe musue kuya kuenza mudimu wa bumpanda-njila, netulekele mudimu eu.” Bob wakitaba, ne wakumbuka kuetu bua kuya kuenza mudimu wa bumpanda-njila pavuaye ne bidimu 21. Bidimu bibidi pashishe, pamvua ne bidimu 16, ngakalua mpanda-njila. Pakumbusha ku ndekelu kua lumingu, mvua ntamba kuyisha nkayanyi ne tuarte tua bumanyishi ne tshisanji tshia fono. Kadi Yehowa wakambenesha, meme kupeta mulongi wa Bible wakalubuluka bimpe menemene. Bena mu dîku dia mulongi eu ba bungi bakalua pabu kuitaba bulelela. Tshidimu tshiakalonda, meme ne Mary Henshall tuakalua bampanda-njila ba pa buabu. Bakatutuma mu teritware uvuabu kabayi banji kuyishamu, mu tshimenga tshia Cheshire.

Tukavua mu Mvita mibidi ya buloba bujima, ne bavua bambile bantu bakaji bua kuambuluisha bavua mu mvita. Bu mutuvua mu mudimu wa ku dîba ne ku dîba, tuetu bampanda-njila ba pa buabu tuvua batekemene ne: nebatulekele bu muvuabu balekela badiambike ba mu bitendelelu bikuabu. Kadi tubadi katuakitaba to, nunku bakankosela buloko bua matuku 31. Tshidimu tshiakalonda, ngakakumbaja bidimu 19 ne ngakadifundisha ku mukanda wa bavua  babenga kubuela mu malu a mvita bua kondo kabu ka muoyo. Bakaya nanyi ku tubadi tubidi, kadi bakalekela tshilumbu tshianyi. Mu tshikondo tshionso tshivua malu aa amfikila, mvua mumanye ne: nyuma muimpe uvua ungambuluisha, kabidi ne: Yehowa uvua munkuate ku tshianza tshianyi, unshindamija ne unkolesha.​—Yesh. 41:10, 13.

Tuakatuilangana ne Arthur Matthews mu 1946. Yeye mumane kuenza ngondo isatu mu buloko bu muntu udi mubenge kuambuluisha mu mvita bua kondo kende ka muoyo kavua kabenga, wakaya kudi muanabu Dennis uvua mpanda-njila wa pa buende mu Hemsworth. Baledi babu bavua babalongeshe malu a Yehowa katshia ku buana buabu ne bavua batambule patshivuabu bana ba bitende. Matuku makese pashishe, bakatuma Dennis mu Irlande, kushiyaye Arthur kayi ne wa kuyisha nende. Bu muvua baledi banyi banyisha bikole Arthur, nsongalume eu mpanda-njila wa bikadilu bimpe uvua uyisha bikole, bakamubikila bua kusombelaye kuetu. Pangakaya kutangila baledi, meme ne Arthur tuvua tusukula malongo panyima pa didia. Ndekelu wa bionso, tuakatuadija kufundilangana mikanda. Mu 1948, bakakosela kabidi Arthur buloko bua ngondo isatu. Tuakaselangana mu ngondo wa 1 mu 1949 ne tshipatshila tshia kushala bidimu bia bungi mu mudimu wa ku dîba ne ku dîba. Bu muvua Yehowa mutubeneshe ne bu mutuvua tulongolola malu bimpe, mu tshikondo tshia dikisha, tuvua tuenza mudimu wa kupuola bimuma bua kupeta makuta, nunku tuakapeta mushindu wa kutungunuka ne mudimu wa bumpanda-njila.

Tshidimu tshimue pashishe, bakatulomba bua kuya mu Irlande du Nord, kumpalampala mu Armagh ne pashishe mu Newry, bimenga bibidi ebi bivua biuwule tente ne bena Katolike. Buluishi buvua bukole muaba eu, ne tuvua ne bua kuikala ne budimu bua bungi ne busunguluji bua malu patuvua tuyukila ne bantu. Tuvua tuenzela bisangilu kua muanetu wa balume ne mukajende bavua mu ntanta wa kilometre 16 ne muaba utuvua basombele. Bantu batue ku muanda mukulu bavua babuela mu bisangilu. Pavuabu batulomba bua kulala muaba eu butuku, tuvua tulala panshi ne mu dinda tudia biakudia bimpe bipite bungi. Bidi bienza disanka dia bungi bua kumanya ne: kudi mpindieu Bantemu ba bungi mu tshitupa etshi.

Tutuanyi ne mukajende Lottie bakavua benza mudimu wa bumpanda-njila bua pa buabu mu Irlande du Nord, ne mu 1952, bunayi buetu tuakabuela mu mpungilu wa distrike mu Belfast. Muanetu wa balume kampanda wakatuakidila tuetu bonso, pamue ne Pryce Hughes uvua tshikondo atshi musadidi wa Betele mu Grande-Bretagne. Butuku kampanda, tuakayukila bua dipatuka dia kakanda ka La voie de Dieu est une voie d’amour kavuabu bapatule nangananga bua bena mu Irlande. Muanetu Hughes wakaleja muvuabi bikole bua kuyisha bena Katolike bavua mu ditunga dia Irlande. Bavua bapatula bana betu ku nzubu yabu ne babakengesha kudi bisumbu bia bantu bituma kudi bamfumu ba bitendelelu. Pryce wakamba ne: “Tudi dijinga ne bena dibaka badi ne mashinyi bua kuenza kampanye ka pa buaku ka diabanya kakanda aka mu ditunga dijima.” * Tuakandamuna diakamue ne: “Netuenze nanku!” Ke mêyi adi ku ntuadijilu kua muyuki eu.

 Muaba uvua bampanda-njila batamba kutudila mu Dublin nkua Ma Rutland, muanetu wa bakaji wa lulamatu wa bidimu bia bungi. Tuetu bamane kusomba kuende ne bapane bimue bia ku bintu bietu, bunayi buetu tuakadipaya mu moto wa Bob uvua ne kasasa ku luseke, tuenda tukeba mashinyi a kusumba. Tuakapeta mashinyi makumbane akavua menda nawu, tuetu kulomba muasumbishi bua kutuendeshilawu, bualu muntu nansha umue wa kutudi kavua mumanye kuendesha to. Arthur wakapitshisha butuku abu bujima musomba pa bulalu welangana meji a mushindu wa kuludika mashinyi. Pakatshiabu mu dinda, pavuaye ukeba bua kupatula mashinyi muaba uvuabu baateke, misionere mukuabu diende Mildred Willett (wakaluabu kusela kudi John Barr) wakalua muaba au. Bu muvuaye mumanye kuendesha mashinyi, wakamulongesha bua kuendesha! Bu mukavuaye uteta kuendesha, biakakumbana bua tuetu kuya.

Pashishe, tuvua dijinga ne miaba ya kusombela. Bavua batubele bua kubenga kusombela mu kazubu katubu benda naku ku mashinyi bualu baluishi betu bavua mua kukatua mudilu, nunku tuakakeba nzubu, kadi katuakapeta to. Butuku abu, tuakalala mu mashinyi bunayi buetu. Dituku diakalonda, tuakapeta anu kazubu kakese ka kuenda naku ku mashinyi kikale ne tulalu tubidi tulamakaja tuashila munda. Kakalua muaba wetu wa kusombela. Bualu bua dikema, katuvua ne lutatu lua kukateka mu mpata ya babidime batuvua bamanyangane nabu to. Tuakayisha mu teritware uvua ne kilometre 16 mu butshiama ne 24 mu bule. Tuetu bamane kuya, tuvua tupinganyina bantu ba muaba utuvua batudile bua kubayisha.

Tuakayisha nzubu yonso ya ku sud-est wa Irlande kakuyi ntatu ya bungi to, tuetu kuabanya tukanda tupite pa binunu 20 ne kutumina Betele wa mu Grande-Bretagne mêna a bantu bavua banyishe bulelela. Ndibenesha dinene bualu lelu mu ditunga edi mudi Bantemu nkama ya bungi!

Pakapita matuku, bakatutuma ku sud kua Londres. Mu mbingu mikese, bakela Arthur nshinga ku Betele wa mu Grande-Bretagne, bamulomba bua kutuadija mudimu wa butangidi bua tshijengu dituku divua dilonda! Bobu bamane kumulongesha lumingu lujima, tuakaya mu tshijengu tshietu mu Écosse. Arthur kavua ne dîba dia kulongolola miyuki yende to, kadi dikala diende mudiakaje bua kutantamena ntatu mu mudimu wa Yehowa diakankolesha bikole. Tuvua bushuwa banange mudimu wetu wa butangidi bua tshijengu. Tuvua bayishe mu teritware nkayetu munkatshi mua bidimu ndambu, kadi mpindieu tudi ne diakalenga dinene dia kuikala munkatshi mua bana betu ba balume ne ba bakaji bapite bungi.

Pakabikilabu Arthur bua kubuela mu kalasa ka Gilada bua ngondo dikumi mu 1962, tuakadimona kumpala kua dipangadika dinene dia kuangata. Tuakafika ku dimona ne: nansha muvua Arthur ne bua kunshiya, bivua bimpe bua kuitaba diakalenga edi. Bu mumvua mushale nkayanyi, bakantuma mpanda-njila wa pa buende mu Hemsworth. Pakapingana Arthur panyima pa tshidimu tshijima, bakatutuma mu mudimu wa butangidi bua distrike mu Écosse, ku nord kua Angleterre ne ku nord kua Irlande.

Mu 1964, Arthur wakalua musadidi wa Betele mu Irlande. Tuvua banange mudimu wa butangidi buena  ngendu bikole, kadi biakanji kuntonda bikole bua kushintulula mudimu. Pandi mpingaja meji panyima, ndi mpindieu ne dianyisha bua diakalenga dia kuenza mudimu ku Betele. Ndi mutuishibue ne: wewe muitabe mudimu udibu bakupesha nansha wowu kawuyi ukusankisha menemene bua kuwenza, Yehowa neikale anu mua kukubenesha. Matuku onso mvua ngenza midimu ya mu biro, nkanga mikanda, ndamba ne nteka mankenda mu nzubu. Bua tshikondo kampanda, tuvua kabidi tuya kuenza mudimu wa butangidi bua distrike ne tuvua tutuilangana ne bana betu ba mu ditunga dijima. Kuenza mudimu eu ne kumona muvua balongi betu ba Bible baya kumpala, kuakakolesha malanda etu ne bena mu dîku dietu dia mu nyuma ba mu Irlande. Ndibenesha dia dikema!

Mpungilu wa kumpala wa bantu bafumine mu matunga a bungi wa mu Irlande wakenzekela mu Dublin mu 1965. * Nansha muvuaku buluishi bukole bufumina eku ne eku, mpungilu wakapita bimpe. Bantu 3 948 bakabuelamu ne bantu 65 bakabatijibua. Bakatumina muntu yonso uvua muakidile umue wa ku batumibue 3 500 mukanda bua kumuela tuasakidila. Bana betu bavua bakidile batumibue aba bakanyisha pabu bikadilu biabu. Tshivua bushuwa bualu bunene buvua buenzeke mu Irlande.

Mu 1966, bakenza bua Betele wa mu Dublin ikale ulombola midimu ya mu Irlande du Nord ne mu Irlande du Sud, dishilangana dinene ne bisumbu bia tshididi ne bitendelelu bia mu tshidiila etshi bidi bitapulukangane. Tuvua ne disanka dia bungi bua muvua bena Katolike ba bungi bitaba bulelela ne benza mudimu pamue ne bena Kristo netu bavua kumpala bena Mishonyi.

Mu 2011, nsombelu wetu wakashintuluka bikole pavuabu basangishe Betele wa mu Grande-Bretagne ne wa mu Irlande pamue, ne bakatutuma mu Betele wa mu Londres. Ngakapeta lumu elu tshikondo tshimvua mutuadije kuditatshisha bua kusama kua Arthur. Bavua bamukuate ne disama dia Parkinson ditu dizakeja mubidi. Mu dia 20/5/2015, muena dianyi utuvua benze nende mudimu munkatshi mua bidimu 66 eu wakafua.

Mu bidimu bikese bishale ebi, mvua ne dibungama ne kanyinganyinga kakole ku muoyo. Kumpala Arthur uvua misangu yonso ungambuluisha. Mpindieu katshienaku to! Kadi paudi utuilangana ne nsombelu ya nunku, udi usemena bikole pabuipi ne Yehowa. Biakankolesha ku muoyo pangakamanya ne: bantu ba bungi bavua banange Arthur bikole. Balunda betu ba mu Irlande, mu Grande-Bretagne, nansha ba mu États-Unis bakamfundila mikanda. Mikanda eyi ne dikankamija dimvua mupete kudi Dennis muanabu ne Arthur ne mukajende Mavis ne kudi Ruth ne Judy bana ba tutuanyi, biakangambuluisha bikole menemene.

Mvese uvua munkankamije bikole ngua Yeshaya 30:18. Udi wamba ne: ‘Yehowa udi windila bua kunuleja dinanga diende; ne bua muanda eu neadibishe bua kunuleja luse; bualu bua Yehowa udi Nzambi udi ulumbulula biakane; bonso badi bamuindila badi bavudijibue disanka.’ Ngakakoleshibua pangakamanya ne: Yehowa udi windila ne lutulu bua kuakaja malu ne bua kutupesha midimu mimpe mu bulongolodi bupiabupia.

Pandi mvuluka nsombelu wetu, ndi mmona mudi Yehowa mulombole mudimu utudi benze mu Irlande ne muwubeneshe! Ndi ndiumvua ne disanka bua mundi munkatshi mua bantu ba bungi badi bambuluishe mu mudimu eu. Kakuyi mpata, kuenza malu adi Yehowa utulomba kutu misangu yonso kutupetesha mabenesha.