Mvua muledibue mu Ciudad Mante, tshimenga tshimpe tshia mu provense wa Tamaulipas mu Mexique. Bantu ba bungi ba mu tshimenga etshi batu bapeshangana bintu ne batu ne bulenga. Kadi diakabi, mudi njiwu ya bungi bualu mudi bena tshikisu.

Kuetu tuvua bana ba balume banayi ne meme mvua muibidi. Baledi banyi bakantambuisha mu Katolike, ne pashishe ngakalua umue wa ku bimbi ba misambu. Mvua musue kusankisha Nzambi bikole bualu mvua ntshina bua kalu kundumbuluisha ne kungela mu iferno wa kapia bua kashidi.

Pamvua ne bidimu bitanu, tatuanyi wakatulekela. Biakantonda bikole mu muoyo wanyi ne tshivua ndiumvua kabidi ne mushinga to. Tshivua ngumvua bua tshinyi uvua mutulekele to, petu tuetu bamunange bikole. Maman wanyi uvua wenza mudimu mêba a bungi bua kutudisha.

Bua nsombelu au ngakalekela kalasa ne meme kudia bulunda ne bana bavua bakulumpe kundi. Bakandongesha bua kupendangana, kunua makanya, kuiba ne kututangana mankomo. Bu mumvua musue kuikala ku mutu kua bakuabu, ngakalonga mua kuelangana mbata, miseba, kuluangana mvita ya bibula ne kuasangana bingoma. Ngakalua nsonga wa tshikisu. Misangu ya bungi tuvua tuluangana ne bingoma, imue misangu mvua njikija mvita ne mashi pambidi ne nshala mulale mu njila bu tshitalu. Ndi mvuluka muvuabi bitonde maman wanyi pakampetaye mushindu au, kungambulaye kuya nanyi ne lukasa ku buanga.

Pamvua ne bidimu 16, Jorge mulunda wanyi kampanda wa ku buana wakalua kututangila kuetu. Wakatuambila ne: uvua Ntemu wa Yehowa ne uvua musue kutuambila mukenji muimpe. Wakatuadija kutubadila Bible bua kutumvuija malu avuaye witabuja. Tshivua muanji kumubala kumpala to, ne mvua ne disanka dia kulonga malu avua atangila dîna dia Nzambi ne malu adiye mulongolole. Jorge wakalomba bua tulonge nende Bible. Tuakitaba.

Ngakasanka bikole pangakalonga ne: dilongesha dia iferno wa kapia kaditu mu Bible  to. (Musambu 146:4; Muambi 9:5) Diakamue pangakamanya bualu ebu, tshivua kabidi ntshina Nzambi mu mushindu mubi to. Kadi ngakatuadija kumumona bu Tatu wa dinanga udi musue diakalenga dia bana bende.

Pamvua ngenda nya kumpala ne dilonga dianyi dia Bible, ngakamona ne: bivua bikengela nshintulule bumuntu buanyi. Mvua ne bua kuikala ne budipuekeshi ne kulekela tshikisu. Mubelu udi mu 1 Kolinto 15:33 wakangambuluisha. Udi wa ne: “malunda mabi adi anyanga bibidilu bimpe.” Ngakamona ne: meme musue kushintuluka, mvua ne bua kulekela balunda babi. Nanku ngakalekela balunda banyi ba kale ne kusungula balunda mu tshisumbu tshilelela tshia bena Kristo, bantu bavua bajikija bilumbu biabu ne mêyi manene a mu Bible pamutu pa kubijikija ne makofi anyi ne tshikisu.

Mêyi makuabu a mu Bible akangambuluisha adi mu Lomo 12:17-19, a ne: ‘Kanupingajidi muntu bubi ku bubi. Bikalaku mushindu, nuenze muenu muonso bua kuikala mu ditalala ne bantu bonso. Kanudisombuedi. Bualu mbafunde ne: “Yehowa udi wamba ne: ‘Disombuela ndianyi; meme nemfute.’”’ Ngakitaba ne: Yehowa neajikije tshikisu mu mushindu ne pa dîba didiye musue. Ku kakese ku kakese, ngakalekela tshikisu.

Tshiakupua muoyo bualu buakangenzekela dituku kampanda pamvua mpingana kumbelu to. Bansonga bena tshikisu batuvua tuluishangana nabu bakambunda, ne mfumuabu wakankuma tshintu pa nyima, wela dîyi ne: “Disungile aku!” Meme kuenza disambila dîpi bua Yehowa angambuluishe bua kutantamena buluishi abu. Nansha mumvua mumvue dijinga dikole dia kualuja, ngakumbuka. Dituku diakalonda ngakapetangana ne mfumuabu au nkayende. Ngakumvua tshiji tshikole, kujinga bua kumualujila, kadi ngakasambila Yehowa mundamunda bua angambuluishe bua kudikanda. Yeye kulua kundi ne kungambila ne: “Mfuile luse bua tshimvua mukuenzele malaba. Mu bulelela ndi musue kukufuana. Ndi musue kulonga Bible.” Biakankemesha bikole. Mvua mumvue disanka bua mumvua mudikande tshianyi. Tuakatuadija kulonga nende Bible.

Diakabi, musangu au bena mu dîku dianyi bakalekela kulonga Bible. Kadi ngakangata dipangadika dikole dia kutungunuka ne kulonga ne kubenga kulekela tshintu anyi muntu nansha umue ungaluja tshianyima. Mvua mumanye ne: kuikala ne tshibidilu tshia kudisangisha ne bantu ba Nzambi kuvua ne bua kuondopa mputa ivua ku muoyo wanyi ne kumpesha dîku dimvua nkeba. Ngakatungunuka ne kuya kumpala, ne mu 1991, meme kutambula kulua Ntemu wa Yehowa.

Mvua ne kanyinganyinga ka mu mutshima, musue kuikala ku mutu kua bakuabu ne mvua muena tshikisu. Dîyi dia Nzambi ndinshintulule bikole menemene. Mpindieu ndi mmanyisha mukenji wa ditalala kudi bantu bonso badi basue kuwuteleja. Mvua ne diakalenga dia kuenza mudimu wa kuyisha mêba a bungi munkatshi mua bidimu bipite pa 23.

Tshikondo kampanda, ngakenza mudimu wa budisuile ku Betele wa Bantemu ba Yehowa mu Mexique. Kuine aku, ngakatuilangana ne Claudia, nsongakaji muena Kristo wa bikadilu bimpe bitambe, ne tuakaselangana mu 1999. Ndi ne dianyisha dia bungi kudi Yehowa bua kumbenesha pa kumpesha mukajanyi wa malu malenga eu!

Tuakenza mudimu mu tshisumbu tshia tumama mu Mexique, tuambuluisha tumama bua kulonga malu a Yehowa. Pashishe bakatulomba bua kuya mu Belize bua kulongesha benamu Bible. Nansha mutudi bapepeje nsombelu wetu, tudi ne bionso bidi bikengela bua kuikala ne disanka. Katuena mua kumushintakaja ku tshintu nansha tshimue.

Panyima pa matuku, maman wanyi wakatuadijilula kulonga Bible ne kutambulaye. Bakulu banyi ba balume babidi ne bakaji babu ne bana babu badi pabu mpindieu Bantemu ba Yehowa. Bamue ba ku balunda banyi ba kale batuvua tulonga nabu Bible badi pabu benzela Yehowa mudimu.

Diakabi, bamue bena mu dîku dietu bakadi bafue bualu kabavua balekele tshikisu to. Bu meme mutungunuke mu njila au, pamuapa mvua mua kuikala nkadi panyi mufue. Ndi ngela Yehowa tuasakidila bua kunkoka kudiye ne kudi batendeledi bende, badi bandongeshe ne lutulu ne bulenga bua kutumikila mêyi manene a mu Bible.