PADI muena dibaka umue wenda masandi, bitu bitekesha mukuabu ku muoyo bikole. Bulelela, bamue bena dibaka mbamone ne: badi mua kubuikidila muena dibaka nabu uvua munyingalale ne kupingaja malanda abu. * Kadi nansha dibaka diodi difue anyi kadiyi difue, muntu udi ulua kumanya ne: muena dibaka nende mmuende masandi utu ukenga bikole ne kanyinganyinga. Mmunyi mudi muena dibaka wa nunku mua kutantamena kanyinganyinga aku?

Bible mmukoleshe bena dibaka ba bungi badibu bele mâyi ku makasa nansha mudibu ne kanyinganyinga kakole. Mbamone ne: Nzambi udi umona kudila kuabu ne udi uditeka pa muaba wabu.​—Malaki 2:13-16.

“Pavua tunyinganyinga tumpite bukole, wewe wakansamba, wewe kumpesha ditalala.”​—Misambu 94:19.

Bill udi uvuluka wamba ne: “Pamvua mbala mvese eu, mvua mmona Yehowa bu udi wenda untuja muoyo ne bulenga anu mutu tatu wa dinanga wenza.”

“Kudi muntu udi ne lulamatu, wewe udi wenza malu ne lulamatu.”​—Misambu 18:25.

Carmen uvua bayende muende masandi munkatshi mua ngondo ya bungi udi umvuija ne: “Bayanyi kavua ne lulamatu to. Kadi mvua mushindike ne: Yehowa yeye kakundekela to. Kakungela mâyi ku makasa nansha.”

“Kanusamishi mutu bua tshintu nansha tshimue, kadi mu malu onso, ku diambuluisha dia disambila ne disengelela . . . numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu.”​—Filipoyi 4:6, 7.

Sasha udi wamba ne: “Ntu mbala mvese eu misangu ne misangu. Bu mumvua musambile Nzambi bikole wakampesha ditalala.”

Bantu bonso batudi batele aba bavua misangu mikuabu badiumvua bashikile. Kadi bavua beyemene Yehowa Nzambi ne bapetele bukole mu Dîyi diende. Bill udi wamba ne: “Ditabuja dianyi diakakaja nsombelu wanyi pamvua mmona bu ne: malu onso avua manyanguke. Nansha mumvua muendele ‘mu tshibandabanda tshia mîdima mikole’ bua tshikondo kampanda, Nzambi uvua nanyi.”​—Misambu 23:4.