Mikenji ya bikadilu mmikenji idi muntu usungula bua kulonda mu nsombelu wende. Tshilejilu, utu udienzeja bua kuikala ne bululame mu malu onso anyi? Nanku pamuapa udi musue kulongesha bana bebe tshikadilu tshimpe atshi.

Mikenji ya bikadilu idi ikongoloja kabidi mikenji ya tshidi tshimpe ne tshidi tshibi. Tshilejilu, muntu udi ne mikenji mishindame ya tshidi tshimpe ne tshidi tshibi mmuenji wa mudimu, mmuntu muimpe udi utangila malu a bakuabu; eyi nngikadilu idi muntu upeta patshidiye muana.

DÎYI DINENE DIA MU BIBLE: “Longesha muana njila udiye ne bua kulonda; nansha padiye ukola kakumbukamu to.”​—Nsumuinu 22:6, dimanyisha dia kuinshi kua dibeji.

Mikenji ya bikadilu bilenga idi ne mushinga tshikondo tshidi tuamu tubudike etshi. Karyn udi wamba ne: “Bana badi mua kunyanguka dîba dionso ne tuamu ne tablete. Bana betu badi mua kuikala basombe anu ku luseke luetu kadi batangila bintu bibi!”

DÎYI DINENE DIA MU BIBLE: “Bantu bakole . . . badi ne bieledi biabu bia meji bia kujingulula nabi malu bibidija . . . bua kutapulula tshidi tshimpe ne tshidi tshibi.”​—Ebelu 5:14.

Mikenji ya tshidi tshimpe ne tshidi tshibi idi payi ne mushinga. Idi ikongoloja tumalu tukese tua bukalanga (bu mudi kuamba ne: “bua luse” ne “tuasakidila”) ne kuditatshisha bua bantu bakuabu; eu nngikadilu udi mukepele mu bantu bikole bualu badi bamueneka batamba kuditatshisha bua tuamu kupita mudibu baditatshisha bua bantu nabu.

DÎYI DINENE DIA MU BIBLE: “Anu bu munutu basue bua bantu banuenzele malu, nubenzele pabu mushindu wa muomumue.”​—Luka 6:31.

Leja mikenji yebe ya bikadilu bilenga patoke. Tshilejilu, makebulula adi aleja ne: bidi mua kupepela bua bana ba bitende kubenga kusangila kumpala kua kubuela mu dibaka bobu babambile patoke ne: kuenza nanku nkubi.

MUBELU: Londa bualu budi buenzeke bua kubueja muyuki wa mikenji ya bikadilu mu tshialu. Tshilejilu, bobu bakula ku bisanji bua muntu kampanda udi muenzelangana bibi bua lukinu, udi mua kuamba ne: “Bidi bitonda bikole bua mudi bantu benzelangana malu ne tshiji tshia nunku. Udi wela meji ne: mbafike ku dikala nunku bishi?”

Brandon udi wamba ne: “Bitu bitamba kukolela bana bua kusunguluja tshidi tshimpe ne tshidi tshibi bobu kabayi bamanye tshidi tshimpe ne tshidi tshibi.”

Longesha mikenji ya tshidi tshimpe ne tshidi tshibi. Nansha bana batekete badi mua kulonga mua kuamba ne: “bua luse” ne “tuasakidila” ne kunemeka bakuabu. Mukanda kampanda udi wamba ne: “Padi bana kabayi batamba kudimona nkayabu, kadi badimona miaba idi bantu ba bungi bu mudi mu dîku, mu tulasa, anyi muaba udibu basombele, nebatambe kuenza malu mimpe adi ambuluisha bantu bonso, kaayi abambuluisha anu bobu nkayabu to.”​—Parenting Without Borders.

MUBELU: Ikala upesha bana bebe midimu ya kuenza kumbelu bua bamanye mushinga wa kuambuluisha bakuabu.

Tara udi wamba ne: “Bana betu bobu bibidilangane ne midimu ya kumbelu mpindieu, kabiakubatonda pikalabu ku yabu mbanza to, bualu nebikale bamane kuibidilangana nayi.”