Tshipatshila ki nganu bualu kampanda butudi tujinga bua bukumbane to. Bipatshila bilelela bidi bilomba kudilongolola, kushintulula malu bilondeshile nsombelu, ne kuenza mudimu mukole mubidi bikengela.

Kudi bipatshila bidi bilomba matuku makese, bikuabu ngondo, ne bikuabu bilomba bidimu. Tudi mua kukumbaja bipatshila bidi bilomba bidimu ku diambuluisha dia bipatshila bia bikese.

Kukumbaja bipatshila kudi mua kukupesha dikima, kukolesha bulunda buebe ne bantu bakuabu, ne kukuvudijila disanka.

Dikima: Paudi udifundila bipatshila bikese ne ubikumbaja, udi upeta dikima dia kudifundila bia binene. Udi upeta kabidi dikima paudi utuilangana ne ntatu ya buatshia buila, bu mudi kukandamena malu mabi adi bena mulongo nebe bakusaka bua kuenza.

Bulunda: Bantu batu basue kusomba ne bantu badi bamanye tshidibu bajinga ne basue kuenza muabu muonso bua kutshikumbaja. Bualu bukuabu, umue mushindu munene wa kukolesha bulunda nkueleshangana diboko ne muntu mukuabu bua kukumbaja tshipatshila tshidiye pende natshi.

Disanka: Paudi udifundila bipatshila ne ubikumbaja, udi umvua disanka dia muudi mubikumbaje.

Christopher udi wamba ne: “Ntu musue kudifundila bipatshila. Bidi bienza bua ngikale anu ne tshia kuenza ne tshia kuipatshila. Paudi ukumbaja tshipatshila, udi umvua disanka dia kutangila tshiudi muenze, udiambila ne: ‘Kah, ngakokeshi! Ndi mukumbaje tshimvua mudifundile.’”

DÎYI DINENE DIA MU BIBLE: “Muntu udi utshina lupepele ne mvula, kena ukuna nansha unowa bia pa madimi.”​—Muambi 11:4, Mukanda wa Mvidi Mukulu (Mishonyi).

Enza malu adi alonda aa bua kudifundila bipatshila ne kubikumbaja.

Anji bimanya. Funda bipatshila biudi mua kukumbaja ne ubilonge bilondeshile biudi musue kutuadija nabi, bidi bilua muaba muibidi, muaba muisatu, anu nanku.

Longolola malu. Bua tshipatshila tshionso, enza malu adi alonda aa:

• Difundila tshikondo tshiudi musue kutshikumbaja.

• Longolola malu audi ne bua kuenza bua kutshikumbaja.

• Ela meji ku malu adi mua kukupangisha ne mushindu uudi mua kupita nawu.

Tuadija. Kuindidi too ne pawamanya tshia kuenza mu bualu ne bualu buonso bua kutuadija to. Diebeja ne: ‘Mbualu kayi bua kumpala bundi ne bua kuenza bua kukumbaja tshipatshila tshianyi?’ Buenza. Londesha muudi wenda ukumbaja bualu ne bualu buonso.

DÎYI DINENE DIA MU BIBLE: “Malu adi bantu badi benza mudimu ne muoyo mujima balongolola adi bushuwa afika ku dikumbana.”​—Nsumuinu 21:5.