Ki mbibi bua kudiebeja ne: bua tshinyi bantu badi bafua, nangananga patudi tufuisha muntu utudi banange. Bible udi wamba ne: “Kalonda kadi kakebesha lufu mmpekatu.”​—1 Kolinto 15:56.

Bua tshinyi bantu bonso badi benza mpekatu ne bafua?

 Adama ne Eva, bantu ba kumpala bakafua, bualu bakenzela Nzambi mpekatu. (Genese 3:17-19) Lufu ke tshipeta tshimuepele tshivuabu bapete bua muvuabu batombokele Nzambi, bualu kudi yeye nkudi “mpokolo wa muoyo.”​—Misambu 36:9; Genese 2:17.

 Adama wakasambulujila ndelanganyi yende yonso mpekatu. Bible udi wamba ne: ‘Mpekatu wakabuela mu ba pa buloba kupitshila kudi muntu umue, ne lufu luakabuela bua mpekatu, ne mushindu eu lufu lutampakane kudi bantu bonso bua muvuabu bonso benze mpekatu.’ (Lomo 5:12) Bantu bonso badi bafua bualu mbenze bonso mpekatu.​—Lomo 3:23.

Muikala lufu mua kujika

 Nzambi mmulaye ne: “Neamine lufu kashidi.” (Yeshaya 25:8) Kumpala kua yeye kumbusha lufu, neanji kumbusha mpekatu udi ulukebesha. Nzambi neakumbaje bualu ebu ku butuangaji bua Yezu Kristo udi “umbusha mpekatu wa ba pa buloba.”​—Yone 1:29; 1 Yone 1:7.