“Ditabuja ndindila dishindame dia tshitudi batekemene, dileja patoke dia malu malelela adi kaayi amueneka.”​—Ebelu 11:1, Nkudimuinu wa bulongolodi bupiabupia.

 “Ditabuja didi dimanya dia malu atudi tutekemena ne didi dijadika dia malu atudi katui bamone.”​—Ebelu 11:1, Mukanda wa Nzambi.

 Mvese eu udi ne diumvuija dimpe menemene didi Bible ufila bua ditabuja, udi uleja kabidi ne: ditabuja didi dikongoloja malu a bungi kupita kuitabuja Nzambi patupu.

 “Ditabuja ndindila dishindame dia tshitudi batekemene.” Mu mifundu ya ntuadijilu, muaku wa tshiena Greke udibu bakudimune ne: “ditabuja” mu Ebelu 11:1, udi ne lungenyi lua dishindika, dieyemena, anyi ditabijija dishindame. Ditabuja dia nanku ki ndishindamene pa majinga a patupu to; kadi “ndindila dishindame.” Tshiambilu tshia mu tshiena Greke tshidibu bakudimune ne: “dindila dishindame” a badi mua kutshikudimuna kabidi ne: mukanda wa lupangu udi upesha muntu bukenji, umujadikila ne: lupangu alu nduende.

 “Ditabuja . . . [ndileja] patoke [anyi, “tshijadiki tshidi tshitabijija,” dimanyisha dia kuinshi kua dibeji] dia malu malelela adi kaayi amueneka.” Ditabuja ndishindamene pa bijadiki bilelela. Bijadiki bia nanku mbia bushuwa menemene, bituishisha muntu ne: tshintu kampanda tshidiku nansha yeye kayi mutshimone.

 Mukanda wa Ebelu mmukanda uvua mupostolo Paulo mufundile bena Kristo ba mu bidimu lukama bia kumpala bavua basombele mu Yelushalema ne pabuipi apu. Mu tshitupa tshia mukanda eu, Paulo wakaleja mushinga udi nawu ditabuja. Tshilejilu, wakafunda ne: “Kuoku kakuyi ditabuja kakuena mushindu wa kusankisha Nzambi bimpe to, bualu muntu yonso udi usemena kudi Nzambi udi ne bua kuitaba ne: yeye udi ne udi ulua mufutshi wa badi bamukeba ne muoyo mujima.” (Ebelu 11:6) Yeye mumane kumvuija ditabuja mu Ebelu 11:1 wakafila bilejilu bia balume ne bakaji badibu bakuile mu Bible bavua baleje ngikadilu au. Wakalonda muvuabu baleje ditabuja diabu pavuabu benze malu mu diumvuangana ne disua dia Nzambi.​—Ebelu 11:4-38.