Tshishishi tshidibu babikila bu concombre de mer mu Mfualansa ntshishi tshitu muinshi mua mâyi ne pa bibuabuabua bia mu mâyi. Kadi bitu bikudimukangana dikema, bilua binefuke anu bu budimbu anyi bishilakane anu bu dibaya mu mupodi wa dîsu. Dikudimukangana diabi adi ditu dibiambuluisha bua kudibonda kubuela nansha mu mitanta mikese ya mu mabue, pashishe bilua kushilakana kabidi bua ne: biluishi biabi bitu bibidia kabimonu mua kubipatula mu mabue amu to. Dikoba dia dikema dia bishishi ebi ke didi dibiambuluisha bua kukudimukangana nanku.

 Elabi meji: Dikoba dia concombre de mer didi dikudimukangana mu bitupa bisatu: didi dishilakana, dienza bu didi diteketa kakese, ne dilua dinefuke. Bua kukudimukangana mu bitupa bionso ebi, bishishi ebi bitu bilamakaja anyi bitulakaja tusunyasunya tua mu makoba abi. Bitu bienza nanku ku diambuluisha dia bidishi bia mubidi anyi proteyine mishilashilangane itu ivuija mubidi wabi munefuke anyi mûmakane.

 Proteyine itu ibivuija biumakane ayi itu ilua bu tubilamba anyi tushene tukese tudi tulamakaja tusunyasunya tua mu makeyikeyi (makesekese) a munda mua bishishi ebi, ivuija dikoba diabi dishilakane bibi. Kadi proteyine itu ibivuija binefuke itu yoyi itulakaja tusunyasunya atu, dikoba diabi dilue dinefuke bikole. Dikoba dia bishi ebi ditu dipueteta dia wamba anu ne: didi dienguluka.

 Bamanyi ba malu a bia panu mbaditue mu dienza bintu bidibu batentuila pa bukokeshi bua dikudimukangana dia dikoba dia concombre de mer edi. Tshimue tshia ku bipatshila biabu ntshia kuenza tuntu tua nzembu tuambuluisha mu mudimu wa luondapu wa dipanda buongo tudi tushilakane tukumbane kutekibua anu kaba kajalame tshibi tuikala kabidi pashishe mua kulua kunefuka. Tuamu atu tuotu tukokeshe mua kukudimukangana mushindu au, ntufuane kuambuluisha mubidi padibu bawupanda bua kutuitaba bipepele.

 Udi umona bishi? Dikoba dia dikema dia tshishishi tshia concombre de mer didi mua kuikala didienzekele nkayadi nanku anyi mbadifuke?