Bulongolodi bua Bantemu ba Yehowa bua matuku etu aa mbutuadije ku ndekelu kua bidimu bia 1800. Tshikondo atshi, kasumbu kakese ka balongi ba Bible bavua basombele pabuipi ne tshimenga tshia Pittsburgh, mu Pennsylvanie, mu États-Unis, bakatuadija kukonkonona Bible bimpe bimpe. Bavua bafuanyikija malongesha a mu bitendelelu ne tshivua Bible ulongesha menemene. Bakatuadija kupatula malu avuabu balonge au mu mikanda, mu bikandakanda ne mu tshibejibeji tshitudi tubikila lelu ne: Tshibumba tshia Nsentedi tshidi tshimanyisha Bukalenge bua Yehowa.

 Mu bantu bavua balonga Bible ne muoyo mujima abu muvua muntu mukuabu diende Charles Taze Russell. Nansha muvua Russell ulombola mudimu wa dilongeshangana Bible tshikondo atshi ne muikale muntu wa kumpala uvua mupatule Tshibumba tshia Nsentedi, yeye ki nguvua muenze tshitendelelu tshipiatshipia atshi to. Tshipatshila tshia Russell ne Balongi ba Bible bakuabu (muvuabu babikila kasumbu aku tshikondo atshi) tshivua tshia kumuangalaja malongesha a Yezu Kristo ne kulonda malu a mu tshisumbu tshia bena Kristo tshia mu bidimu lukama bia kumpala. Bu mudi Yezu ke udi Mutuadije ne buena Kristo, tudi tumumona yeye bu mfumu wa bulongolodi buetu.​—Kolosayi 1:18-20.