Ngenze tshinyi bua kulua Ntemu wa Yehowa?
Mu Matayi 28:19, 20, Yezu mmuleje malu a kuenza bua muntu kuluaye Ntemu wa Yehowa. Mvese eu udi uleja tshidi muntu ne bua kuenza bua yeye kulua muyidi wa Kristo. Abi bidi bilomba bua akule anyi afile bumanyishi bua malu a Yehowa.
Bualu bua kumpala: Longa tshidi Bible ulongesha. Yezu wakambila bayidi bende bua ‘bavuije bantu bayidi, babalongesha.’ (Matayi 28:19, 20) Muaku udibu bakudimune ne: “muyidi” udi umvuija ku muaku ku muaku “mulongi.” Malu adi mu Bible, nangananga malongesha a Yezu Kristo adimu adi aleja tshidi tshikengela kuenza bua kuikala ne disanka ne nsombelu muimpe. (2 Timote 3:16, 17) Tudi ne disanka dia kukulongesha Bible kuyi ufuta makuta bua umanye tshidi Bible ulongesha.—Matayi 10:7, 8; 1 Tesalonike 2:13.
Bualu buibidi: Tumikila biudi ulonga. Yezu uvua muambe ne: bantu badi balonga badi kabidi ne bua ‘kutumikila malu onso avuaye mubalongeshe.’ (Matayi 28:20) Abi bidi biumvuija ne: kuena anu ne bua kulonga Bible bua kupeta dimanya patupu to, bidi mua kukulomba bua ushintulule ngelelu webe wa meji ne bikadilu biebe bikole. (Bienzedi 10:42; Efeso 4:22-29; Ebelu 10:24, 25) Padi bantu batumikila mêyi a Yezu, bidi bilua kubasaka bua kudiangatshila dipangadika dia kudilambula kudi Yehowa Nzambi bua kulonda Yezu.—Matayi 16:24.
Bualu buisatu: Batijibua. (Matayi 28:19) Mu Bible, badi bafuanyikija batismo ne dijikibua. (Tangila kabidi Lomo 6:2-4.) Batismo udi tshimfuanyi tshia kufua mu nsombelu wetu wa kale bua kutuadija nsombelu mupiamupia. Paudi ubatijibua, udi uleja patoke ne: udi mukumbaje malu a kumpala abidi avua Yezu muleje ne udi ulomba Nzambi kondo ka muoyo kimpe.—Ebelu 9:14; 1 Petelo 3:21.
Mmunyi mundi mua kumanya ne: nkadi pabuipi bua kubatijibua?
Yukila ne bakulu ba tshisumbu tshienu. Nebayukile nebe bua kumanya ni udi umvua tshidi Batismo umvuija, udi utumikila biudi mulonge, ne ni ukadi mudilambule kudi Nzambi ku budisuile.—Bienzedi 20:28; 1 Petelo 5:1-3.
Bana ba Bantemu badi pabu ne bua kutumikila malu aa anyi?
Eyowa. Tudi tukolesha bana betu “ne mibelu ne didimuija bia Yehowa,” anu mudi Bible mutume dîyi. (Efeso 6:4) Kadi padibu bakola, badi ne bua kudiangatshila dipangadika dia kulonga tshidi Bible ulongesha, kutshitaba, ne ku tshitumikila kumpala kua bobu kufika ku dibatijibua. (Lomo 12:2) Ndekelu wa bionso, muntu ne muntu udi ne bua kudiangatshila dipangadika dia kulua mutendeledi wa Nzambi.—Lomo 14:12; Galatiya 6:5.
Mona bikuabu:
MALU ETU
Mmushindu kayi utu dilonga dia Bible dienzeka?
Pa buloba bujima, Bantemu ba Yehowa mbamanyike bua mudimu wabu wa dilongesha bantu Bible kabayi babafutshisha kantu. Dimuena nkayebe.
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
MANDAMUNA A NKONKO YA MALU A MU BIBLE
Bidi ne mushinga bua kuikala mu tshitendelelu kampanda anyi?
Muntu udi mua kutendelela Nzambi nkayende anyi?
MALONGESHA A MU BIBLE
Tetabi programe wetu wa dilonga dia Bible
Londa programe wa dilonga dia Bible dia nuenda nuyukila ne muntu udi ukulongesha.