Bible ke ututu tuangata bu tshimamuende wa malongesha etu, nunku tudi bakaje malu atudi tuitabuja bualu ngumvuilu wetu wa Mifundu mmutokesha bimpe. a

 Dishintulula malu edi ndienzeke bilondeshile dîyi dinene dia mu Bible didi mu Nsumuinu 4:18 didi diamba ne: “Njila wa bantu bakane udi bu butoke bua bukenke bua mu dinda dinda budi buenda butoka anu kutoka too ne padi munda munya mukumbana.” Anu mutu dîba ditshidi dipatukilaku, bintu bituadija kumueneka ku kakese ku kakese padidi dienda dibanda, Nzambi udi utupesha ngumvuilu wa bulelela buende ku kakese ku kakese mu tshikondo tshiakanyine. (1 Petelo 1:10-12) Anu mukavua Bible muambe, Nzambi mmuyishe malu lukasa bua kutokesha ngumvuilu wetu wa bulelela mu “tshikondo tshia ku nshikidilu” etshi.​—Danyele 12:4.

 Diakaja ngumvuilu wetu edi kadiena ne bua kutukemesha anyi kutulubakaja to. Batendeledi ba Nzambi ba kale bavua bumvue pabu malu kampanda bibi ne batekemene avua kaayi malelela to, bobu kushintulula ngumvuilu wabu au.

•   Mose wakadileja bu musungidi wa tshisamba tshia Isalele bidimu 40 kumpala kua tshikondo tshivua Nzambi musungule.​—Bienzedi 7:23-25, 30, 35.

•   Bapostolo bakapanga mua kumvua mêyi a tshiprofete avua madianjile kuakula bua lufu lua Masiya ne dibishibua diende ku lufu.​—Yeshaya 53:8-12; Matayi 16:21-23.

•   Bena Kristo bakuabu ba mu bidimu lukama bia kumpala bavua bumvue bibi bualu bua tshikondo tshia “dituku dia Yehowa.”​—2 Tesalonike 2:1, 2.

 Nzambi wakalua kuakaja ngumvuilu wabu mubi au, ne tudi tusambila bua atungunuke ne kutuenzela petu bia muomumue.​—Yakobo 1:5.