Mu 2005, mamu mukuabu wa mu Inde diende Sowbhagya wakafuisha bayende. Bayende au uvua umutabalela yeye ne Meghana muanende wa bakaji wa bidimu bisatu bimpe. Sowbhagya ukavua utata bikole bua kupeta bintu bia kudiambuluisha nabi.

 Malu akanyanguka kabidi bikole pakadimona Sowbhagya mulekela kudi bantu bakuabu. Bena mu dîku diabu bavua bamumona yeye ne muanende wa bakaji bu balombi ba ka pa luse. Misangu yonso bavua bamuambila ne: ukavua bujitu kudibu. Sowbhagya wakabanga kubuela mu tshitendelelu kampanda bua kukeba busambi, kadi bena mu tshitendelelu atshi bavua bamupetula bualu uvua mupele. Ke yeye kubanga kukeba mudimu bua apete makuta bua ikale mudikadile. Nansha muvuaye mudienzeje bikole kakapeta mudimu to.

 Sowbhagya udi wamba ne: “Mvua mushikile, ke meme kuangata dipangadika dia kudishipa. Kadi mvua mumanye ne: meme mudishipe, muananyi wa bakaji neashale kabidi kupeta ntatu ya bungi. Nunku ngakangata dipangadika dia kudishipa meme muine ne kushipa muananyi.” Bu muvua Sowbhagya udimona kayi ne mushinga ne kayi munangibue, wakaya kusumba mulungu.

 Dituku dikuabu, pavua Sowbhagya mu kawulu upingana kumbelu, Ntemu mukuabu wa Yehowa diende Elizabeth wakaya kudiye, kutuadijaye kuyukila nende. Pavua Sowbhagya mumumvuije ne: uvua ukeba mudimu, Elizabeth wakamuambila bimpe ne: neamuambuluishe bua kupeta mudimu. Kumuambilaye kabidi ne: uvua uya bua kulongesha muntu Bible. Sowbhagya wakakema bikole bualu nansha mukavuaye mubuele mu bitendelelu bia bungi, kavua muanji kumvua bakula bua bantu bavua balonga Bible to. Ke Elizabeth kuambilaye Sowbhagya ne: neaye kumutangila bua kumuambila malu a bungi adi atangila dilonga dia Bible.

 Pakafika Sowbhagya kumbelu, uvua anu mudisuike bua kudishipa. Kadi mulela wende mukuabu uvua muye ne Meghana mu diendakana. Nunku wakindila too ne pavua muanende wa bakaji au mupingane kumpala kua kukumbajaye tshivua mu meji ende.

 Patshivuaye muindile apu, wakaya kudi Elizabeth, yeye kumuakidila ne disanka dionso. Elizabeth kubabidilaye mpunga au bua kumuleja mukanda wa Bible utu ulongesha tshinyi menemene? Nshapita wa ne: “Bafue batu penyi?” wakakoka ntema ya Sowbhagya. Nshapita au wakamusankisha bikole bualu uvua ufuma ku difuisha bayende. Anu dituku adi, Sowbhagya wakitaba bua kulonga Bible.

 Elizabeth wakabikila Sowbhagya mu mpungilu uvua wenzeka lumingu luvua lulonda. Sowbhagya kuitabaye. Mpungilu au uvua mumukankamije bikole, yeye kudisuika bua kulua Ntemu wa Yehowa. Pakapinganaye kumbelu ufuma mu mpungilu, wakapeta mudimu.

 Sowbhagya wakatungunuka ne kulonga Bible. Mpindieu pamutu pa kukeba kudishipa, ukadi ne tshintu tshidi tshimuambuluisha bua kushala ne muoyo. Wakabatijibua, pashishe Meghana muanende wa bakaji kubatijibuaye pende. Lelu, bonso babidi mbampanda-njila ba pa tshibidilu. Meghana udi wambuluisha ku biro bia dikudimuna bia mu Inde ku bule.

 Sowbhagya ne Meghana badi ne dianyisha dia bungi kudi Elizabeth bua muvuaye musemene kudi Sowbhagya mu kawulu, mumutabalele ne muoyo mujima, ne mumuambile bulelela. Badi kabidi ne dianyisha dia bungi kudi Yehowa. Meghana udi wamba ne: “Bubidi buetu tuvua mua kuikala tukadi bafue kuonso aku bu tuetu katuyi bumvue bakula bua bulelela dituku adi. Lelu tudi ne disanka dia bungi be! Meme ne mamu tudi bindile ne muoyo mujima tshikondo tshituikala mua kuela tatu mu tshitupa, kumulongesha malu a Yehowa, ne kumumvuija muvua Yehowa mutupandishe.”