Le kodi mulange ya kutanga Bible ino wazoza mwanda mubakwiya’tu milangwe na ya bano batelwa’ba? Bavule bamonanga’mba kutanga Bible kukokejana. Ino le ukalonga namani shi ubayuka’mba Bible ubwanya kukukwasha wikale na būmi bwa nsangaji ne kuloelelwa? Kadi le ukamona namani shi abakusapwila manwa alengeja butangi bwa Bible bukusangaje? Le ubulwe’po kwikala na mutyima wa kubandaula byobya byobwanya kumwena mu Bible?

Bandaula’tu bidi byobya byanenene bantu bamo bamwenine mu kutanga Bible.

Ezekiel, wa myaka 20 ne musubu, unena’mba: “Mafuku kunyuma, nadi pamo’nka bwa muntu wendeja motoka kwampikwa kuyuka kwaenda. Ino kutanga Bible kwaunkweshe ngikale na kitungo mu būmi. Bible udi na madingi a kamweno ombwanya kwingidija difuku ne difuku.”

Frieda, nandi wa myaka 20 ne musubu, unena’mba: “Nadi nonga bintu na kansontomokela. Inoko pa mwanda wa kutanga Bible, Nefundile muswelo wa kwīfula. Kino kyaunkweshe nekenye makambakano ami, o mwanda pano ngidi na balunda bavule.”

Eunice mwana-mukaji umo wa myaka 50 ne musubu unena pa mwanda wa Bible amba, “Unkwashanga ngikale muntu mulumbuluke ne kushinta bibidiji byami bibi.”

Pamo wa bano batangi, ne bantu bakwabo bavule i bamone amba kutanga Bible kubwanya kukwasha muntu ekale na būmi bwa nsangaji. (Isaya 48:17, 18) Kutentekela pa kino, kubwanya kadi kumukwasha (1) akwate butyibi buyampe, (2) atonge balunda bayampe, (3) alwe na kutyumukwa mutyima, ne (4) kitabukile byonso, i kwifunda bubine butala padi Leza. Madingi a Bible atambanga kudi Leza, nanshi kwialonda kekukakutwalapo ku bibi. Leza kaletangapo nansha dimo madingi mabi.

Pakomanga i pa kushilula. Le i manwa’ka abwanya kukukwasha ushilule butangi bwa Bible ne kwibusangela?