MUTWE WA MWANDA WA PA KIBALU
Lelo Batumoni ba Yehova I Bāni?
“Nadi nshikete na Mike mu bula bwa myaka. I Kamoni wa Yehova. Inoko, mutōtelo wandi nkyadipo newimvwanija. Lelo Yehova i ani? Mwanda waka Batumoni ba Yehova kebaloñangapo mafetyi? Lelo Mike wadi mu katangotango’tu?”—Becky, Californie, mu États-Unis.
“Balunda nami pobashilwile kwifunda Bible na Batumoni ba Yehova, nadi neipangula’mba: ‘Dijina, Batumoni ba Yehova dishintulula bika? Bine dino dyadi dijina dya kipwilo dyonkyatelekele kashā!’”—Zenon, Ontario, mu Kanada.
“Ami ne mukajami twadi tumonanga’mba Batumoni ba Yehova badi betupempula mwanda wa kwitutopeka kitatyi kyoketwadipo twenda ku misa. Twadi tufwatakanya’mba shi kyotukimba tubekibulwe mu bipwilo bikatampe, ketubwanyapo kukekitana mu katangotango keni ka Batumoni ba Yehova.”—Kent, Washington, mu États-Unis.
“Na bubine nkyadipo ngyukile kobatambile ne byobakulupile.”—Cecilie, Esbjerg, mu Danemarke.
Padi kodi mwibamone basapula ku njibo ne njibo, mu bifuko bya bantu bavule, babanya mabuku esambila pa Bible ne kufundija bantu Bible ku bitupu. Padi wapelwe dino dipepala na Kamoni wa Yehova. Kadi, padi kodi mwiipangule amba, Batumoni ba Yehova i bāni? Pakwabo padi udi na mulangwe na wa bano batelwa kūlu’ba.
Shi wiipangulanga bino bipangujo, le i kwepi kobwanya kutana malondololo? I muswelo’ka okayuka byobya bikulupile Batumoni ba Yehova, kobalupula lupeto lukwasha mu mwingilo wabo ne pa bifuko byobatōtela’po, ne kine kyobemupempwilanga ku mobo ne mu bitango bya bantu?
Cecilie utelelwe kūlu’ku unena amba, “Ntañanga myanda mivule pa Entelenete ya Batumoni ba Yehova. Ntelekanga myanda imo ya amba amba ibatala ne kwivwana bebafwatakenya bibi. Ye kyonaikadile na mumweno mubi pobadi.” Inoko, mwenda mafuku washilula kwifunda na Batumoni ba Yehova ne kutana malondololo mafike’po ku bipangujo byandi.
Lelo nobe usakanga kutana malondololo a bine ku bipangujo byobe bitala padi Batumoni ba Yehova? Tukulomba utane malondololo makunkane ku bene balupwile dino dipepala—ke Batumoni ba Yehova kadi. (Nkindi 14:15) Shi ke pano, tubakulupila’mba bishinte bilonda’ko bikakukwasha wituyuke ne kuyuka byobya byotukulupile ne kumvwanija mwingilo otwingila.
