KINE KITATENA BANTU BAMO: Kukwatañana na bwifundi bwa panopano, mu kisansa’tu kyetu kimo kya ñenyenye mubwanya kutwela imbuo midiyo 100. Bantu bavule pa kumona bukatakata bwa diulu ne ntanda beipangulanga’mba, ‘mwanda waka Umpangi mwine bukomo bonso ufwaninwe kutala byobya bilonga bantu ba bitupu badi mu ka umbuo katyutyutyutyu?’

BYOBYA BIFUNDIJA KINENWA KYA LEZA: Leza ketupelepo’tu Bible ne kuleka’byo kwituta mutyima. Ino Yehova witukulupija amba: “Nkakupanga ñeni ne dīso dyami ponka padi abe”—Ñimbo 32:8.

Tulangulukilei bidi pa kimfwa kya Hakala, mwana-mukaji mwine Edipito wa mu myaka katwa ka 20 K.K.K. Hakala kādipo ulēmekele Salai waādi wingidila, ebiya Salai nandi wāmufwija bumvu, kupwa Hakala wāenda muntanda mutuputupu. Hakala byaālongele kilubo, lelo Leza kāmutelepo mutyima? Bible unena amba: “Mwikeulu wa Yehova wamutana.” Uno mwikeulu wākulupije Hakala amba: “Yehova wamone malwa obe.” Ebiya Hakala wānena Yehova amba: “Abewa udi Leza umwene.”—Ngalwilo 16:4-13.

“Leza umwene” kadi ukumwene ne abe. Tulete kimfwa: Inabana wa buswe ukengelelanga nakampata bandi bana banuke, mwanda shi mwana i mwanuke bininge, usakilwanga kutebwa mutyima na bambutwile bandi. Mo monka ne Leza nandi witutalanga kitatyi kyotudi mu ngikadilo mibi ne ya buzoze. Yehova unena amba: “Ngikalanga mūlu mulampe muntu mukola, ne na yewa udi ne mushipiditu wa kwisasa ne wa kwiubija, kusangula mushipiditu wa wakwiubija ne kusangula mutyima wa bakwisasa.”—Isaya 57:15.

Inoko, ubwanya kwiipangula amba: ‘Lelo Leza untalanga namani? Lelo untyibilanga mambo kupityila ku mumwekelo wami’ni nansha utalanga kupita pa kilungi kya mpala ne kwivwana mongikadile?’