Padi umwene amba Kinenwa kya Leza i kya pa bula, ne bine ye mwikadile Bible. Midiyo ne midiyo ya Mabible ke matampwe mu tutwa na tutwa twa ndimi. Tunangu tudi mu Bible tudi na bukomo bwa kushinta bantu bekale biyampe.​—Tanga 1 Tesalonika 2:13; 2 Temote 3:16.

Twitabije amba Bible utambile kudi Leza, mwanda wa kufikidila kwa bintu bya kumeso byalaya. I kutupu muntu nansha umo ubwanya kwibilonga ku bukomo bwandi. Tala, kimfwa, mukanda wa Isaya. Uno mukanda wālembelwe myaka katwa ne kupita kumeso kwa Yesu kubutulwa, wātenwe mu mutá udi kubwipi na Dijiba Difwe. Unena amba kibundi kya Babiloni kekikashikatwa’mopo kadi. Buno bupolofeto bwāfikidile ke papite myaka mivule pa kupwa kwa mwingilo wa Yesu pano pa ntanda.​—Tanga Isaya 13:19, 20; 2 Petelo 1:20, 21.

Bible yense mutuntulu wāsonekelwe mu myaka 1600 ne kupita. Kwādi kintu kya balembi 40 ba Bible, kadi bālembele myanda na kulama mutwe umo onka wa mwanda pa kubulwa kwipatanya. Le kino kyābwanikile namani? Leza wāludikile bilembwa byabo.​—Tanga 2 Samwele 23:2.

Kyaba kimo Leza wādi wisamba na balembi ba Bible kupityila ku bamwikeulu, bimonwa, nansha bilotwa. Divule dine, Leza wādi utūla milangwe yandi mu ñeni ya balembi ne kwibaleka abo bene batonge binenwa bifwaninwe pa kulemba musapu wa Leza.​—Tanga Kusokwelwa 1:1; 21:3-5.