FWENAI KUDI LEZA

‘Yehova Wēmulekēle’

“Yewa kabwanyapo kulekela bakwabo utyumunanga kilalo pafwaninwe kupityila.” Bino binenwa bya Edward Herbert mulembi wa mānga mwine Beletanye wa mu myaka katwa ka 17, bilombola bubinga bumo bwine botufwaninwe kulekedila bakwetu amba: Panopano nansha mwenda mafuku netu tukasakilwa padi kunena bakwetu betulekele. (Mateo 7:12) Inoko, kudi bubinga bukatampe botufwaninwe kwikadila na lulekelo. Tala binenwa bya mutumibwa Polo bidi mu Kolose 3:13.​—Tanga.

Byotudi bakubulwa kubwaninina batwe bonso, tubwanya kulobeja nansha kulubila bakwetu, kadi nabo babwanya kwitulongela uno muswelo. (Loma 3:23) Le i muswelo’ka otukokeja kulama ndoe na bantu-netu bakubulwa kubwaninina? Polo witudingila kupityila ku bukomo bwa mushipiditu wa Leza twilekele bitupu. Ano madingi akidi na kamweno dyalelo’nka na moādi ekadile na kamweno pano kepadi kintu kya myaka tununu tubidi. Tubandaulei bidi na katentekeji bino binenwa bya Polo.

“Kadi ne kwifudila bānwe bene na bene.” Kishima “kwifudila” kyalamwinwe ku kishima kya Kingidiki kidi na mulangwe wa kutala bitupu nansha kulekela. Dibuku dimo dinena’mba, bene Kidishitu balombolanga ino ngikadilo na “kulekela ne mutyima tō bantu ba bilubo ne ngikadilo ibalobeja.” Bishima “bene na bene,” bitulombola’mba kuno kwilekela i kwa ku umo ne mukwabo. Ko kunena’mba, shi tubavuluka’mba tudi na bilubo bikokeja kulobeja bakwetu, ketukalekapo bintu byoketusenswepo mobadi bivutakanye ndoe yotudi nabo. Ino bikekala namani shi bakwetu abetulubila?

“Kadi . . . ne kwilekela bitupu bānwe bene.” Kukwatañana na mufundi umo, kishima kya Kingidiki kyalamwinwe bu “kwilekela bitupu” “ke kishimapo kingidijibwanga divule kya kulekela . . . ino i kishima kikomeneja mwine mwikadile lulekelo lwa buntu.” Dibuku dikwabo dinena’mba, kino kishima kibwanya kushintulula “kulonga kintu kampanda kikale na bulēme, kitabijibwe ne kimwenwa’mo.” Twilombolanga buntu na kwilekela na mutyima tō nansha “shi umo wapi mambo ku mukwabo.” Ino mwanda waka tufwaninwe kulombola buno buntu ne mutyima tō? Kintu kimo bidi, mwanda netu tusakanga muntu otulubile etulombole buntu na kwitulekela.

“Monka mwemulekele aye [Yehova] ne bānwe nenu mulongele monka.” Bubinga bubajinji botufwaninwe kulekedila bakwetu i buno: Yehova witulekelanga. (Mika 7:18) Langulukila’po bidi bityetye pa buntu bukatampe bulombolanga Yehova ku babipya-mambo besāsa. Yehova kadipo bwa batwe mwanda kaloñangapo bubi. Inoko, ulekelanga ne mutyima tō kadi lonso babipya-mambo besāsa, nansha byayukile’mba bano babipya-mambo kebakamulombolapo buntu na kumulekela. Na bubine, Yehova i muntu mubajinji ulekelanga babipya-mambo besāsa!

Lusa lwa Yehova lwitukokelanga kwadi ne kwitutonona tumwiule. (Efisesa 4:32–5:1) I biyampe twiipangule’mba, ‘Yehova byaundekelanga na buntu, le ami nkaleka namani kulekela bakwetu bakubulwa kubwaninina besāsa bya binebine shi abandubila?’—Luka 17:3, 4.

Butangi bwa bible bwa mu kweji 10

Ngalatea 1–2 Temote 4