Le Twāikele’ko Namani?
MUTWE WA MWANDA WA PA KIBALU | Mwanda Waka Ufwaninwe Kusangela Bible?
Le Twāikele’ko Namani?
Mu kīpi, mukanda mubajinji wa mu Bible wa Ngalwilo, ushintulula mwāikadile’ko diulu ne ntanda amba: “Mu ngalwilo Leza wapangile diulu ne ntanda mine.” (Ngalwilo 1:1) Leza pa kupwa kupanga mityi ne banyema, wāpangile bantu babajinji, ba Adama ne Eva. Bādi beshile na banyema mwanda bantu badi na ngikadilo ya Leza, kimfwa bwanapabo bwa kwitongela. Mu uno muswelo, bādi batalwa na bilongwa byabo. Shi bākōkele ku buludiki bwa Leza, bādi ba kulunga kuboko ku mpango ya Leza bu bambutwile babajinji ba kisaka kya bantu ba ntanda yonso, bādi ba kwikala mu ndoe ne kwikala nyeke pano pa ntanda na būmi bubwaninine.
Ino, mwikeulu umo, nansha kipangwa kya ku mushipiditu, wāmwene mukenga wa kwingidija bantu mwanda wa kamweno kandi ka kwisakila. Mu uno muswelo, wāikala ke Satana, ko kunena’mba “Kinkwa.” Satana wēsambīle mudi nyoka pa kongola Eva, wāmunena’mba ukekala biyampe pampikwa kuludikwa na Leza. Ba Adama ne Eva bālonda Satana, na kutyiba kipwano kyabo na Umpangi wabo. Pa mwanda wa butongi bwabo bubi, bambutwile betu babajinji bājimije būmi bwa nyeke ne kwitupyanika bubi, kubulwa kubwaninina ne lufu lukomo kwepuka.
Kepejije, Leza wālombola milangwe yandi ya kutalula’ko ino ngikadilo ya bulanda ne kupa lutundu lwa Adama muswelo wa kumona būmi bwa nyeke. Leza wālaile’mba “lukunwa”—muntu wa pa bula—lukafula ku konakanya Satana ne kutalula’ko masusu onso alengeje Satana, Adama ne Eva. (Ngalwilo 3:15) Le luno “lukunwa” wādi ani? Tutalei.
Mu kitatyi kityetye’tu, Satana wātompa kukalakanya mpango miyampe ya Leza. Bubi ne bibi byāzambalala lubilolubilo. Leza wāsumininwa konakanya babi ku dilobe. Wānena Noa muntu moloke ōbake safini—sanduku wādi ulela pa mema—mwanda wa kwipandija aye ne kisaka kyandi, pamo ne banyema bobāmulombwele kutweja mu safini.
Mwaka umo pa kupwa kwa Dilobe, Noa ne kisaka kyandi batamba mu safini ne kutūkila pa ntanda mitōkejibwe. Inoko “lukunwa” lwādi kelwamwekele.
—Kukwatañana na Ngalwilo shapita 1-11; Yude 6, 14, 15; Kusokwelwa 12:9.
