Kipangujo 2: Le I Bika Bikamfikila Ponkafwa?

ROMAN wādi nkasampe kitatyi kyāfwile mulunda nandi mu akishida ya motoka. Unena amba, “kujimija mulunda nami kwānsense bininge. Myaka mivule kupwa kwa akishida, nadi neipangula bine bitufikilanga potufwanga.”

Mwanda waka kino kipangujo? Mwanda bimweka bu bantu kebāpangilwepo kufwa. Nansha shi twi batame namani, divule dine ketusakangapo kufwa. Bavule batyinanga byobya bifikanga pa kupwa kufwa.

Le bamo baletanga malondololo’ka? Bavule bakulupile amba, kudi kipindi kampanda kyendelelanga kwikala kyūmi shi muntu wafu. Bakulupile amba bantu bayampe bakapebwa mpalo ya kwenda mūlu, ino babi nabo bakasusulwa nyeke mwanda wa bubi bwabo. Bakwabo nabo balanga amba, shi muntu wafu kakidi’kopo ebiya mwenda mafuku bamwilwa ilwē.

Lelo ano malondololo alombola bika? Malondololo mabajinji alombola amba, shi muntu wafu kafwilepo binenbine. A bubidi alombola’mba būmi kebudipo na kitungo. Boba balanga’mba būmi kebudipo na kitungo, babwanya kwiula mushipiditu mubi wa kunena amba: “Tudye, tutome, ke-twi-bantu dyakesha tufwa.”—1 Kodinda 15:32.

Le i bika bifundija Bible? Bible kafundijangapo amba, kudi kipindi kimo kya ku ngitu kyendelelanga kwikala kyūmi shi muntu wafu. Leza wāpele Mulopwe Solomone mushipiditu wasoneka amba: “Bōmi bayukile’mba bakafwa; nanshi bafwe kebayukilepo nansha kimo kine.” (Musapudi 9:5) Boba “kebayukilepo nansha kimo kine” kebayukilepo nansha dimo bintu bibajokolokele. Kebabwanyapo kwivwana kintu nansha kulonga kintu. Nanshi bafwe kebakokejapo kukwasha nansha kususula bōmi.

Kwishila na nkulupilo ya bantu bavule, mpango ya Leza ke ya bantu kufwapo. Wāpangile Adama, muntu mubajinji na kyepelo kya kwikala’ko nyeke pano pa ntanda. Musunsa umo kete wātelele Leza lufu, i kitatyi kyaālombwele Adama mfuto ya kubulwa kikōkeji kwandi. Wājidikile Adama kudya  kipa kya mutyi umo ne kumudyumuna amba shi adye’ko, nabya ‘kufwa ukafwa.’ (Ngalwilo 2:17) Shi ba Adama ne Eva balamine nyeke kikōkeji, abo ne lutundu lwabo lonso lwa kikōkeji kudi Leza, bādi ba kwikala’ko nyeke pano pa ntanda.

Adama wāpumpwinye kidyumu kya Leza. Wājilwile kitatyi kyākakōkelepo Leza, ebiya wafwa. (Loma 6:23) Kekudipo kintu kampanda kyāendelele kwikala na būmi pāfwile Adama. Ino, Adama pa kufwa, kakidi’kopo. Leza wānene Adama amba: “Ino ukamwena bidibwa byobe ku byanga bya ku mpala yobe, poso’nka ne byojoka ku biloba; mwanda e mo walupwilwe, ke-wi-muntu wi biloba, kabidi i kubiloba konka kokajokela.” (Ngalwilo 3:19) Twibapyane bubi ne lufu kwadi, mwanda bantu bonso batambile kudi Adama.—Loma 5:12.

Nansha byālongele Adama butongi bubi, Leza ukafikidija mpango yandi ya kuyuja ntanda na lutundu lwa Adama. (Ngalwilo 1:28; Isaya 55:11) Panopano ponka, Yehova usa kusangula bantu bavule bafwile. Mutumibwa Polo pa kwisambila pa kino kitatyi, wānene amba: “Kusanguka kwa bafu kudiko, kwa boloke, ne bampikwa koloka kumo.”—Bilongwa 24:15.

Roman utelelwe kūlu, wefundile Bible ne kuyuka byafundija pa mwanda utala lufu ne Yehova Leza.

Shi usaka kuyukila’ko bivule pa bitufikilanga potufwanga, tala shapita 6 wa dibuku Lelo I Bika Bine Bifundija Bible? Ditūdilwe mwanda wa kusela pa www.isa4310.com

[Kapango pa paje 7]

Le Yesu Wānene Bika pa Mwanda Utala Lufu?

Yesu kāitabijepo bendeji ba bipwilo ba mu andi mafuku bādi banena amba, lusangukilo lwa bafwe i kutupu’lo. (Luka 20:27) Kadi kāfundijepo nansha dimo amba, kudi kipindi kampanda kyendelelanga kwikala na būmi shi muntu wafu. Ino, Yesu wāfundije bino bilonda’ko.

Lufu ludi pamo bwa tulo. Kitatyi kyāfwile mulunda nandi Lazalasa, Yesu wānene amba: “Lazalasa walāla mu tulo, ino ami ke ñenda konka nkamulangule.” Bana ba bwanga ba Yesu kebāivwanijepo byaādi usaka kunena. Balondolola amba: “Abe Mfumwetu, ēkale ulēle mu tulo nabya ukapandanga.” Nsekununi ya mu Bible inena amba: “[Yesu] wanenene lufu lwandi, abo ke bafwatakanya’mba: I tulo bitupu monka mulādilwanga twānena. Ponkapo Yesu webasapwididila biya’mba: Lazalasa wafu.”—Yoano 11:11-14.

Bafwe Bakasangulwa. Kitatyi kyāfikile Yesu mu kibundi kya ba Lazalasa, wāsengele Mata mwanabo na Lazalasa, na kunena amba: “Mwanenu usangukanga.” Ebiya Yesu walaya uno mulao mukatampe amba: “Ami uno ne kisangukilo, ne muya mwine, wakungitabija nansha wafwa ukamona muya.” Mulao wa Yesu kewādipo wa bitupu. Yesu wāsangwile Lazalasa kumeso a tumoni tuvule, nansha byaāfwile ke padi ne mafuku aná.—Yoano 11:23, 25, 38-45.

Mu kusokwelwa kwaāpele mutumibwa Yoano, Yesu wālaile monka amba bafwe bakasangulwa. Wēsambile pa kitatyi kya kumeso kine kikanyongololwa bonso bakutyilwe na lufu mu buluji bwa kyelekejo.—Kusokwelwa 20:13.