‘Muya Obe . . . Ukasonsakanibwa Padi Ami’
Fwenai Kudi Leza
‘Muya Obe . . . Ukasonsakanibwa Padi Ami’
KWITYEPEJA i ngikadilo ikoka. Divule dine tukokwanga na bantu badi na mushipiditu wa kwityepeja. Ino i kya bulanda, mwanda kwityepeja kwa binebine ke kukomo kutana mu ntanda ya dyalelo—na kampata mu boba badi na kitenta nansha lupusa pa bakwabo. Lelo Yehova mwine udi na lupusa lukatampe mūlu ne pano panshi nandi le? Le i mwityepeje? Tubandaulei binenwa bya mupolofeto Yelemia bidi mu Madilo 3:20, 21 bya amba: “Na bubine muya obe ukamvulukanga ne kusonsakanibwa padi ami. Kine kino’ki kyo kyonavuluka mu mutyima wami. O mwanda mwine nkalombola mushipiditu wa kukungila.” (New World)
Yelemia wāsonekele mukanda wa Madilo mu bitatyi bikomo mu mānga ya Isalela. Wēmwenine bintu byāmusense bininge—konakanibwa kwa kibundi kyasenswe kya Yelusalema na Babiloni. Uno mupolofeto mujingwe mutyima wādi uyukile amba kino kyamalwa, bwādi butyibi boloke bwa Leza bwātyibilwe Bene Isalela pangala pa mashinda abo a bubi. Ino le Yelemia kākidipo na lukulupilo? Le wālangile amba Yehova udi kulampe nansha amba, kamwenepo bantu ba mityima ya kwisāsa ne kwibanyongolola ku kutyumukwa pa mutyima? Ivwana panena Yelemia pamo bwa ntunguluji wa bantu bandi.
Nansha bantu byobadi na bulanda, ino Yelemia i muyulwe lukulupilo. Wadidila Yehova amba: “Na bubine muya obe * [Yehova] ukamvulukanga ne kusonsakanibwa padi ami.” (Vese 20, NW) Yelemia katatenepo. Uyukile’mba Yehova kakamwilwapo—nansha kwilwa boba besāsa mu bukata mwa bantu Bandi. Ino, le i bika bikalonga Leza mwine bukomo bonso?—Kusokwelwa 15:3.
Yelemia ukulupile amba Yehova ‘ukasonsakanibwa’ pangala pa boba besāsa bya binebine. Bwalamuni bukwabo bunena’mba: “Vuluka’po, ne nkumbatamina.” Bino binenwa bitukwasha tumone mu ñeni kanye ka Yehova. Mu muneneno mukwabo, Yehova “Mwinemukatakatamwine panopantanda ponsololo,” ukabatamina, ne kulangula batōtyi bandi mu ngikadilo yabo ya bulanda ne kwibapandija. (Mitōto 83:18) Lukulupilo lwa Yelemia pa kushimatyija, wasengelwe bya binebine ku mutyima wandi wadi mutapwe. Uno mupolofeto wa kikōkeji usumininwe kukungila na kitūkijetyima enka ne bikafika kitatyi kitungilwe na Yehova kya kunyongolola bantu Bandi besāsa.—Vese 21.
Na bubine, binenwa bisonekele Yelemia bitufundija bintu bibidi padi Yehova. Kibajinji, i mwityepeje. (Mitōto 18:35) Nansha shi i “mutabuke mu bukomokomo byamwiko’tu,” Yehova witubataminanga ne mutyima tō mwanda wa kwitukwasha potutyumukilwe mutyima. (Yoba 37:23; Mitōto 113:5-7) Lelo uno ke mulangwepo usenga? Kya bubidi, Yehova i muyule lusa; udi na “mutyima wa lubilo wa kulekela” bipya-mambo bisāsa ne kwibajokeleja lupandilo lwandi. (Mitōto 86:5) Ino ngikadilo ibidi—kwityepeja ne lusa—iobanga.
Bine tufwijanga’ko Yehova mwanda i mwishile na bambikavu ba bantu, badi na mutyima mūmu ne kubulwa kubanga ku masusu a bantu mwanda wa mitatulo! Le kino kibakutonona wifunde bivule padi Leza mwityepeje, udi na mutyima wa “kubatamina” batōtyi bandi mwanda wa kwibapa lukulupilo kitatyi kyobatyumukilwe mutyima?
[Kunshi kwa dyani]
^ Basonekeji ba pa kala bāshintyile uno vese na kunena amba “wami mūya,” wita’mba i Yelemia winena. Na bubine bādi balanga amba i kubulwa bulēme kutela Leza bu muya, kishima kine kingidije Bible pa bipangwa bya pano panshi. Inoko divule dine Bible utelanga Leza pa bishima bitelelwa pa bantu, mwanda wa kwitukwasha tumuyuke. Kishima “mūya” byokishintulula “būmi bwetu,” musemwa “muya obe” ushintulula “abe mwine.”
[Bushintuludi pa paje 32]
Yehova witubataminanga ne mutyima tō mwanda wa kwitukwasha potutyumukilwe mutyima
