‘Mwana Uswile Kwitusokwela Shandi’

“Tata aye, nansha umo kumuyūka, poso Mwana, kadi ne yewa, shi ani, wa Mwana ukaswa umusokwela’ye.”—LUKA 10:22.

USA KULONDOLOLA NAMANI?

Mwanda waka Yesu ye wādi mu ludingo lwa pa bula mu kwitusokwela Shandi?

Lelo Yesu wāsokwedile bakwabo Shandi namani?

Le i mu miswelo’ka mokokeja kwiula Yesu mu kusokwela bakwabo Tata?

1, 2. Lelo i kipangujo’ka kivutakanyanga bavule ñeni ne mwanda waka?

 ‘LELO Leza i ani?’ Kino kipangujo kivutakanyanga bavule ñeni. Kimfwa, nansha bantu bavule betela bu Bene Kidishitu byobakulupile amba Leza i Busatu-Busantu, bavule baketabija amba luno lufundijo i lukomo kwivwanija. Mulembi umo kadi mwendeji wa kipwilo waitabije amba: “Luno i lufundijo lutabukile ñeni ya muntu. Ñeni ya muntu keibwanyapo kwivwanija’lo.” Ku mutamba mukabo, bavule betabije lufundijo lwa kwialamuna bakulupile amba Leza i kutupu’ye. Banenanga amba bipangwa byonso bya kutendelwa byaikele’ko mu kitulumukila. Nansha nabya, pa kyaba kya kutuna kwikala’ko kwa Leza, Charles Darwin wānene amba: “Ami mona’mba mvuyo ya binebine i ya amba uno mwanda udi peulu pa ñeni ya muntu.”

² Bantu bavule, nansha bekale na lukulupilo’ka, balangulukilanga pa bipangujo bitala kwikala’ko kwa Leza. Ino, kitatyi kyobakomenwa kutana malondololo asangaja, bavule balekanga’byo bityebitye kukimba Leza. Na bubine, Satana i musabe “meso a mutyima . . . [a] boba bakubulwa kwitabija.” (2 Kod. 4:4) Ke kya kutulumukapo shi bantu bavule kebayukilepo Tata, Mupangi wa diulu ne ntanda ne kuvutakanibwa ñeni pa bubinebine bumutala!—Is. 45:18.

3. (a) Le i ani wetusokwedile Umpangi? (b) Lelo i bipangujo’ka byotusa kubandaula?

³ Inoko, i biyampe bantu befunde bubinebine butala padi Leza. Mwanda waka? Mwanda i enka boba beta “pa dijina dya Yehova” bo bakapanda. (Loma 10:13) Pa kwita pa dijina dya Leza bilomba kuyuka muntu mwine wityilwa pa dino dijina. Yesu Kidishitu wāsokwedile bandi bana ba bwanga buno buyuki bwa kamweno. Wēbasokwedile Tata. (Tanga Luka 10:22.) I kika kinenenwa amba Yesu wādi ubwanya kusokola Tata kutabuka bantu bonso? Le Yesu wālongele kino namani? Ne i muswelo’ka otukeula Yesu na kusokwela bakwetu Tata? Tubandaulei bino bipangujo.

 YESU KIDISHITU—YE UMO KETE UBWANYA KWITUSOKWELA’YE

4, 5. Mwanda waka Yesu ye wādi mu ludingo lwa pa bula mu kwitusokwela Shandi?

⁴ Yesu, ye umo kete wābwenye kwitusokwela Shandi. Mwanda waka? Mwanda kumeso kwa kupanga miswelo yonso ya būmi, kipangwa kya ku mushipiditu kyāikele mwenda mafuku ke muntu wāityilwe bu Yesu, kyādi’ko kala momwa mūlu bu “Mwana wa bunka wa Leza.” (Yoa. 1:14; 3:18) Bine kino i kyepelo kya pa bula! Pādi kepaikele’ko kipangwa kikwabo nansha kimo, Mwana wādi uloelelwa ku meso a Shandi ne kuboila ñeni Kwadi ne ku ngikadilo Yandi. Ba Tata ne Mwana bādi besamba bininge ne kutamija kisanso umo ku mukwabo mu bula bwa myaka keibadika. (Yoa. 5:20; 14:31) Bine Mwana wāmwene bupeta bwa kuyukidija senene bumuntu bwa Shandi!—Tanga Kolose 1:15-17.

⁵ Tata wātongele Mwana ekale ke musedi Wandi wa myanda, ke “Mwanda wa Leza” kadi. (Kus. 19:13) Nanshi, Yesu ye umo kete wādi ubwanya kusokwela bakwabo Tata. I kyendele’mo nanshi, Yoano mulembi wa Evanjile atele Yesu, “Mwanda,” bu udi “mu kyadi kya shandi.” (Yoa. 1:1, 18) Na bino binenwa, Yoano wādi wisambila pa kibidiji kimo kyādi kilongwa divule mu andi mafuku pa kudya. Mwitwa wādi ushikata witadidile na muntu mukwabo ku kityi kimo. Pa kushikata befwenene uno muswelo, bano bantu babidi bādi babwanya kupēlelwa kwisamba. Nanshi Mwana pa kwikala “mu kyadi,” wādi wisamba na Shandi bya bulunda.

6, 7. Le kipwano kyādi pa bukata bwa Tata ne Mwana kyādi kyenda kitama muswelo’ka?

⁶ Kipwano kyādi pa bukata bwa Tata ne Mwana kyādi kyenda kitama. Mwana wādi “mafuku onso nsangaji yandi [Leza] mo bukila mo bukila.” (Tanga Nkindi 8:22, 23, 30, 31.) Nanshi, bidi na buluji kijimba kyādi kikutyile bantu babidi kininge kitatyi kyobādi bengidila pamo ne kitatyi kyēfundile Mwana kwiula ngikadilo ya Shandi. Kitatyi kyāpangilwe bipangwa bikwabo bya ñeni, Mwana wāmwene muswelo wādi wikele Yehova na kipangwa ne kipangwa, kadi nsangaji yandi ya kusangela bumuntu bwa Leza yāvudile bya binebine.

⁷ Enka ne kulwa kwālwile Satana na bubikadi boloke bwa Yehova mwenda mafuku, kwāpele Mwana mukenga wa kuboila ñeni ku muswelo wādi wa kwingidija Yehova buswe, boloke, tunangu, ne bukomokomo kitatyi kyaādi utanwa mu ngikadilo mikomo. Ne kutatana kwine mpika, kino kyāteakenye Yesu mwa kulwila na bikoleja byaādi wa kutana mwenda mafuku mu mwingilo wandi wa pano panshi.—Yoa. 5:19.

8. I muswelo’ka witukwasha nsekununi ya ma Evanjile twifunde bivule bitala pa ngikadilo ya Tata?

⁸ Mwana wāshintulwile kamo ne kamo katala padi Shandi kutabuka muntu ye-yense mwanda wādi mu kipwano kya mpwaninine na Yehova. Lelo kudi kadi muswelo muyampe otudi nao wa kuyuka Tata upityile kubandaula byobya byāfundije Mwana wandi wa bunka ne byaālongele? Tulete kimfwa, langa’po mobyādi bya kwitukomenina kuyuka ne pa mfulo mushintulwila kishima “buswe” na kutanga’tu bitupu dibuku dishintulula bishima. Inoko, na kulangulukila pa nsekununi isangaja ya balembi ba ma Evanjile itala pa mwingilo wa Yesu ne muswelo wandi wa kuta bakwabo mutyima, tukokeja kwikala na bujinguludi buvule pa binenwa bya amba “Leza i buswe.” (1 Yoa. 4:8, 16) Bikekala muswelo umo onka shi tulangulukile pa ngikadilo mikwabo ya Leza yāsokwedile Yesu bandi bana ba bwanga kitatyi kyaādi pano pa ntanda.

MWĀSOKWEDILE YESU SHANDI

9. (a) Le Yesu wāsokwele Shandi mu miswelo’ka ibidi ipēla? (b) Leta kimfwa kilombola mwāsokwedile Yesu Shandi kupityila ku bufundiji bwandi.

⁹ Le Yesu wāsokwele Tata ku bandi bana ba bwanga namani ne na kampata ku balondi bandi balondele’ko mwenda mafuku? Bine wālongele kino mu miswelo ibidi ipēla: kupityila ku bufundiji bwandi ne ku mwiendelejo wandi. Tubandaulei bidi dibajinji bufundiji bwa Yesu. Byobya byāfundije Yesu balondi bandi byālombwele amba wādi ujingulwile bininge milangwe ya Shandi, malangatyima, ne mashinda andi. Kimfwa, Yesu wādingakenye Shandi na  muntu udi na luombe lwandi wenda kukakimba mukōko mujimine. Yesu wānene amba uno muntu pa kusokola mukōko mujimine, “ukakila kwiusepelela pakatampe, ne yoya mikwabo ya makumi kitema ne dya kitema yampikwa kujimina, ayo kunyuma.” Lelo kino kimfwa kitufundija bika? Yesu ushintulula amba, “Enka namino ne mwa [Tata] udi mūlu kekiswilwe’mba kamo ka totwa tutyetye kakoneke.” (Mat. 18:12-14) Le kino kyelekejo kikufundija bika padi Yehova? Nansha shi wadi ulanga kyaba kimo amba udi na mvubu mityetye ne mwidibwe, ino Shobe wa mūlu ukusangedile ne kukuta mutyima. Ku meso andi, ubadilwa mu “totwa tutyetye.”

10. Le Yesu wāsokwele Shandi kupityila ku mwiendelejo wandi muswelo’ka?

¹⁰ Muswelo wa bubidi mwine wāsokwele’mo Yesu Shandi ku bandi bana ba bwanga i kupityila ku mwiendelejo wandi. Nanshi mutumibwa Fidipa pa kwipangula Yesu amba: “witulombolepo Shobe,” Yesu wādi na bubinga bwa kunenena amba: “Wakumona ami nankyo wamone ne Tata mwine.” (Yoa. 14:8, 9) Tala bimfwa bimo bya mwālombwedile Yesu ngikadilo ya Shandi. Wa makopo pa kusenga Yesu amundape, Yesu wātengele uno muntu wādi “ubela byamwiko makopo” ne kumunena amba: “Nswele upwibwepo.” Pa kundapibwa, wa makopo kābudilwepo kumona kuboko kwa Yehova kupityila ku byālongele Yesu. (Luka 5:12, 13) Kadi, kitatyi kyāfwile Lazalasa, bana ba bwanga bēmwenine lusa lwa Tata kitatyi kyāivwene Yesu “bulobo bwamukwata, ku mutyima ke kudi fututu” ne “impolo yamusuma.” Nansha Yesu byaādi uyukile amba usa kusangula Lazalasa, wāivwene mutyima kupēpa enka na mowādi upēpela kisaka kya Lazalasa ne balunda nandi. (Yoa. 11:32-35, 40-43) Na bubine, nobe udi na nsekununi ya mu Bible yosenswe, ikukwasha umone lusa lwa Tata na lolwa lwāmwekele kupityila ku bilongwa bya Yesu.

11. (a) Yesu pa kutōkeja tempelo, le wāsokwele bika padi Shandi? (b) Mwanda waka nsekununi itala byālongele Yesu pa kutōkeja tempelo itupanga kikulupiji?

¹¹ Inoko, le ubafule ku kunena bika pa byālongele Yesu pa kutōkeja tempelo? Fwatakanya’po bidi uno mwanda: Yesu wabake kibaka kya myonji, ne kupanga beshinta ndalama ne mikōko kumo. Wakusakanya ndalama ya beshinta lupeto ne kufulamika ma meza abo. (Yoa. 2:13-17) Kino kilongwa kya bukomo kyāvulwije bana ba bwanga binenwa bya bupolofeto bya Mulopwe Davida bya amba: “Lupata lwa ku njibo yobe lubandi.” (Mit. 69:9) Yesu pa kulonga bintu na kusumininwa, wālombwele mutyima wa kulwila mutōtelo wa bine. Lelo ubamone mu ino nsekununi bumuntu bwa Tata? Ino nsekununi ituvuluja’mba Leza kadipo’tu enka na bukomo bwampikwa mpwilo bwa kupwa bubi pano pa ntanda, ino kadi udi na mutyima wa kwibupwa. Kino kilongwa kya bukomo kya Yesu pa bibi kilombolanga muswelo wiivwananga Shandi pamonanga bubi buzambalele pa ntanda dyalelo. Bine kino kitupa kikulupiji kitatyi kyotulwa na bukondame!

12, 13. Le muswelo wādi umwene Yesu bandi bana ba bwanga, ukufundija bika padi Yehova?

¹² Tubandaulei’ko bidi kimfwa kikwabo—muswelo wādi umwene Yesu bandi bana ba bwanga. Bādi bepatanya pa mwanda utala bukata. (Mako 9:33-35; 10:43; Luka 9:46) Byaāpityije myaka mivule na Shandi, Yesu wādi uyukile mwiivwaninanga Yehova pa ino milangwe ya mitatulo. (2 Sam. 22:28; Mit. 138:6) Pakwabo kadi, Yesu wāmwene kuno kutupatupa kwāmwekeje Satana Dyabola. Kuno kwisakila kwādi kwimanine mpata pa ntumbo ne kyepelo. O mwanda, Yesu wākalabele pa kumona mushipiditu wa kwisakila wendelela mu bukata mwa bana ba bwanga baādi ufundija! Uno mushipiditu wādi’nka ne mu batumibwa baātongele! Bālombwele mushipiditu wa kwisakila kufika’nka ne difuku dya mfulo dya būmi bwa Yesu pano pa ntanda. (Luka 22:24-27) Ino, Yesu wāendelele kwibadingila na kanye pampikwa kujimija kikulupiji amba befunde bityebitye kwiula mutyima wandi wa kwityepeja.—Fid. 2:5-8.

¹³ Lelo ubwanya kumona kuboko kwa Tata mu muswelo wālemunwine Yesu na kitūkijetyima milangwe mibi yādi mu bandi bana ba bwanga? Le ubamone Tata mu bilongwa ne binenwa bya Yesu, Tata mwine kedilwepo bantu bandi nansha byobaluba kitatyi ne kitatyi? Le kuyuka ngikadilo ya Leza, kubulwe’po kwitutonona  tumufwene mwanda wa kulombola kwisāsa kwetu kitatyi kyotuluba?

MWANA WĀDI USWILE KWITUSOKWELA SHANDI

14. Le Yesu wālombwele namani amba wādi uswile kwitusokwela Shandi?

¹⁴ Bambikavu bavule bakasusu bakimbanga kutādila bantu ne kwibashiya mu kitonto na kwibafya yabo myanda. Ino, aye Yesu wādi uswile kusapula myanda yaādi nayo itala padi Shandi, Wasokwela’ye bakwabo. (Tanga Mateo 11:27.) Kadi, Yesu wāpēle bandi bana ba bwanga “ñeni ya [amba babwanye] kumuyūka wabinebine,” Yehova Leza. (1 Yoa. 5:20) Lelo bino bishintulula bika? Yesu wāfungwile ñeni ya balondi bandi amba babwanye kwivwanija bufundiji bwandi butala padi Shandi. Kāfilepo Shandi pamo bwa kikatakata kifyame na kufundija’mba Ubadilwa mu Busatu-Busantu, lufundijo kelwivwanikwapo.

15. Mwanda waka Yesu wāfile myanda imo itala padi Shandi?

¹⁵ Lelo Yesu wāsokwele bintu byonso byaādi uyukile padi Shandi? Mhm, wēkakile na tunangu kusapula bintu bivule byaādi uyukile. (Tanga Yoano 16:12.) Mwanda waka? Mwanda kine kyaba’kya, bandi bana ba bwanga kebādipo bakubwanya ‘kwivwana’ buno buyuki. Ino enka na mwāshintulwidile’kyo Yesu, buyuki bukatampe bwine bwādi bwa kusokolwa pa kufika kwa “nsenga-mukwashi,” mushipiditu sandu, wādi wa kwibaludikila “ku bya binebine byonsololo.” (Yoa. 16:7, 13) Monka mukokejeja bambutwile ba tunangu kufya myanda imo ku babo bana kufika enka ne pa myaka yobabwanya kwivwanija biyampe, Yesu nandi wāilaije bana ba bwanga batame bidi ku mushipiditu ne kwikala na bukomo bwa kwivwanija myanda imo itala padi Tata. Yesu wādi uyukile biyampe mikalo yabo.

IULA YESU NA KUKWASHA BAKWABO BAYUKE YEHOVA

16, 17. I kika kinenenwa amba udi na bukomo bwa kusokwela bakwabo Tata?

¹⁶ Shi ubayuka muntu biyampe ne kusangela ngikadilo yandi ya buswe, le kebikakutononapo usapwile bakwabo myanda yandi? Yesu paādi pano panshi, wēsambile myanda ya Shandi. (Yoa. 17:25, 26) Lelo tubulwepo kumwiula na kusokwela bakwetu Yehova?

¹⁷ Enka na motwekimwena, Yesu wādi na buyuki buvule butala padi Shandi kutabuka bakwabo. Inoko, wādi uswile kusapwila bantu bintu bimo byaādi uyukile, enka ne kupa balondi bandi ñeni ya kwivwanija bintu bya mushike bya bumuntu bwa Leza. Na bukwashi bwa Yesu, mwene tubayuka Tata wetu mu muswelo keumuyukilepo bantu bavule dyalelo? Bine tufwijanga’ko Yesu pa kuswa kwaswele kwitusokwela Shandi kupityila ku bufundiji ne mwiendelejo wandi! Na bubine, tubwanya kwitemba pa buyuki bwa kuyuka Tata. (Yel. 9:24; 1 Kod. 1:31) Ponso potulonga bukomo bwa kufwena kudi Yehova, nandi witufwenanga. (Yak. 4:8) Nanshi, pano tudi na bukomo bwa kufundija bakwetu byotuyukile. Le tubwanya kulonga kino namani?

18, 19. Le ubwanya kusokwela bakwabo Tata mu miswelo’ka imo? Shintulula.

¹⁸ Tufwaninwe kwiula Yesu na kusokola Tata kupityila ku binenwa ne bilongwa byetu. Vuluka amba bantu bavule botutana mu mwingilo wa budimi kebayukilepo Leza mwine i ani. Mumweno wabo padi Leza imufityijibwe na mfundijo ya bubela. Tukokeja kwibasapwila byobya byotuyukile pa dijina dya Leza, pa mpango yandi itala pa bantu, ne pa bumuntu bwandi enka na mobisokwedilwe mu Bible. Pakwabo kadi, tukokeja kwisambila na banabetu betabije pa nsekununi imo ya mu Bible isokola bumuntu bwa Leza mu muswelo oketwadipo tuyukile dibajinji. Mu uno muswelo, nabo bakamwena’mo.

¹⁹ Le kusokola Tata na mwiendelejo obe kitatyi kyolonga bukomo bwa kwiula Yesu nako le? Kitatyi kimona bantu buswe bwa Kidishitu mu bilongwa byetu, bakafwena kudi Tata ne kudi Yesu mwine. (Ef. 5:1, 2) Mutumibwa Polo wētukankamikile ‘tumulonde aye monka mwaālondele Kidishitu.’ (1 Kod. 11:1) Bine, dino i dyese dya kutendelwa dya kukwasha bantu bamone Yehova kupityila ku muswelo otwikele nabo! Na bubine, batwe bonso twendelelei kwiula Yesu na kusokwela bakwetu Tata.

[Bipangujo bya Kifundwa]