Abalahama Muntu wa Kwityepeja

Abalahama ushikete mu dipema dyandi mutalala nyā kitatyi kya kampumpu ka dyuba. Aye amba ele meso kulampe wamone bana-balume basatu bapempula ntanda. * Ne kwishisa mpika wanyema lubilo kukebasambakana, webesāshila batūje’ko bityetye ne kwibaselela kwandi. Webape “kipindi kya mukate,” kupwa kateakanya bidibwa bya musonso, mukate ukyopoka pa mudilo, manteka, mabele, bintu bilēme nakampata ne mwita wa ntanda unekena. Abalahama pa kupa bandi beni bino bidibwa, kalombwelepo enka kizaji kya kutendelwa, ino i ne kwityepeja kwa binebine’nka na motusa kwikimwena.—Ngalwilo 18:1-8.

KWITYEPEJA I BIKA? Kwityepeja i kubulwa mitatulo nansha kwizunzula. Muntu mwityepeje uyukile amba muntu yense i mumutabuke mu muswelo kampanda nansha kamukaya. (Fidipai 2:3) Wivwananga milangwe ya bakwabo ne kwitabija kwingila mingilo ya munshi mpata pangala pabo.

LELO ABALAHAMA WĀLOMBWELE KWITYEPEJA NAMANI? Abalahama wādi wingidila bakwabo na nsangaji. Enka na mokilombwedilwe kūlu, kitatyi kyāmwene Abalahama beni basatu wākimbile kuvuija kiponka na ponka bisakibwa byabo. Sala wandi mukaji, washilula nakampeja-bukidi kuteka bidibwa. Inoko yuka amba Abalahama nandi wāingile bininge: Wanyema kukasambakana beni, webanena kwibapa bidibwa, wanyemena ku kipombo ne kutonga’mo nyema wa kutapa, ne kutūla bidibwa byonso kumeso a beni. Pa kyaba kya kupa bengidi bandi mingilo yonso, uno muntu mwityepeje wēpēne aye mwine mu uno mwingilo wa munshi. Kāmwenepo kwingidila bakwabo bu kwipwa bulēme.

Abalahama wādi wivwana milangwe ya boba bādi munshi mwa lupusa lwandi. Mu Bible musonekelwe mīsambo mityetye kete yādi isamba ba Abalahama ne Sala. Inoko tutanga’mo misunsa ibidi amba Abalahama wādi uteja milangwe ya Sala ne kulongela monka. (Ngalwilo 16:2; 21:8-14) Musunsa  umo, mulangwe wandi dibajinji ‘wādi mubi byamwiko mu meso a Abalahama.’ Ino kitatyi kyēsambile Yehova na Abalahama, wamulombola amba mulangwe wa Sala i muyampe, Abalahama wewitabija na kwityepeja ne kwiulonda.

LE I ÑENI’KA YOTUBOILA’KO? Shi bine twi betyepeje, tukasangela kwingidila bakwetu. Tukekala na nsangaji ya kulonga byonso byotubwanya mwanda wa būmi bwabo bwikale biyampe.

Kadi tubwanya kulombola kwityepeja kupityila ku muswelo otwivwana milangwe ya bakwetu. Pa kyaba kya kupela mulangwe mwanda’po’tu keukwatañenepo na motulangila, i kya tunangu twitabije binena bakwetu. (Nkindi 15:22) Nakampata ino ngikadilo ya kwisambulwila milangwe imwenanga’mo boba badi na lupusa kutabuka. Mukulumpe wa kaji umo wa bwino witwa bu John unena’mba: “Monanga amba, mukulumpe muyampe i yewa ulengejanga bantu bekale na bwana-pabo bwa kwisamba abo bene.” Ubweja’ko kadi amba: “Bilomba kwityepeja pa kwitabija amba mwingidi obe ubwanya kulonga bintu mu muswelo muyampe kukupita. Ino ku mutamba mukwabo kadi, kutupu muntu nansha umo—nansha ke mukulumpe wa kaji—ubwanya kwikala’nka na milangwe miyampe.”

Shi twiule Abalahama na kwivwana milangwe ya bakwetu ne kwibengidila mingilo ya munshi, nabya tuketabijibwa na Yehova. Kutabukididila, “Leza upelele bakibengo, ino boba betyepeje wibeselanga dyese.”—1 Petelo 5:5, Myanda Miyampe ku Bonso.

[Kunshi kwa dyani]