Lelo Leza Witupanga Mfuto?

Muludiki umo wa kipolitike mwine Japon; ntanda yabo pa kupwa kuponenwa na kintenshi kikatampe kya ludingo lwa 9.0 ne kya mabimbi a mema kitwa bu tsunami mu Kweji 3, 2011; wanene amba, “nansha byongivwaninanga bantu baponenwa na kimpengele lusa, nanga amba ino i tembatsu (mfuto ya Leza.)”

Kitatyi kyafwile bantu 220000 ne kupita ku kintenshi kyalongekele mu Haïti mu Kweji 1, 2010, muntu umo mutumbe usapulanga ku televijo walangile amba i pa mwanda badi “batyipila dyabola” koku basaka “kuvundamukila kudi leza.”

Kitatyi kyafwile bantu 79 padi panyema bibumbo bya bantu ne banyema mu Manila, Filipine; kitobo mwine Katolika wanene amba: “Leza usaka kulangula mityima yetu ya mundamunda yampikwa kubanga kintu.” Julunale umo unena amba “bantu batame makumi abidi ne umo pa katwa bakulupile amba Leza ulombolanga bukalabale bwandi na kuleta kuseñemuka kwa nshi, bimpumpu ne bimpengele bikwabo” biponena ntanda kitatyi ne kitatyi.

LUKULUPILO lwa amba Leza uletanga bimpengele mwanda wa kupa bantu babi mfuto kelwenipo. Mu 1755, pa kupwa kwa bantu kintu kya 60000 kufwa ku kintenshi, mudilo, ne ku kintenshi kya mabimbi a mema kitwa bu tsunami, byalongekele mu Lisbonne, Portigal; Voltaire filozofe mutumbe waipangwile amba: “Lelo penepa bimpengele byaponene mu Lisbonne bilombola’mba mu Lisbonne mwadi bubi buvule kutabuka ba mu Paris mwine muyudile nsangaji?” Na bubine, midiyo ya bantu yādi iipangula shi Leza wingidijanga bimpengele mwanda wa kupa bantu mfuto. Bino bimpengele bitwanga mu matanda mavule bu bilongwa bya Leza.

Kitatyi kyotumona bino byonso, tufwaninwe kwiipangula amba: Lelo bine Leza wingidijanga bimpengele bya kipangila mwanda wa kupa bantu mfuto? Lelo binkumenkume bya bimpengele bivule bya panopano i mfuto itamba kudi Leza?

Bamo pa mwanda wa kusaka kufutulula Leza, batelanga bukidibukidi nsekununi isambila pa bonakani bwāletele Leza kupityila ku bintu bya kipangila. (Ngalwilo 7:17-22; 18:20; 19:24, 25; Umbadilo 16:31-35) Inoko bubandaudi bwa ino nsekununi ya mu Bible bulombola amba mu mwanda ne mwanda, mudi bubinga bukatampe busatu bwishileshile. Bubajinji, Leza wādi uleta kidyumu kumeso kwa kitatyi. Bwa bubidi, kwishila na bimpengele bilongeka dyalelo bipaya bayampe ne babi bene kumo, bonakani bwa Leza abo bwādi butonga. I enka babi bādi bapela kwalamuka ne boba bādi bapela kwivwana bidyumu bo bādi batukijibwa. Bwa busatu, Leza wādi upa bantu bampikwa mambo muswelo wa mwa kupandila.—Ngalwilo 7:1, 23; 19:15-17; Umbadilo 16:23-27.

Kekudipo bubinga bulombola amba Leza ye ulengejanga bimpengele kebibadika bileta musala mukatampe mu būmi bwa midiyo ya bantu dyalelo. Penepa, i nsekununi’ka ilombola kuvula kwa bino bimpengele? I muswelo’ka otubwanya kulwa nabyo? Lelo kukekala kitatyi kyo kebikekalakopo dikwabo? Ukatana malondololo mu bishinte bilonda’ko.