Lelo Yehova Ukuyukile?
Lelo Yehova Ukuyukile?
“Mfumwetu [Yehova] uyūkile boba ba kwandi.”—2 TEM. 2:19.
1, 2. (a) Lelo Yesu wādi utele mutyima ku bika? (b) I bipangujo’ka byotufwaninwe kubandaula?
DIFUKU dimo Mufadiseo umo wāfwenene Yesu ne kumwipangula’mba: “Lelo kijila kikatampe mu bijila byonso mu mukanda-wabijila i kyepi le?” Kwivwana Yesu amba: “Ukasanswa Yehova Leza obe, ne mutyima obe onso, ne muya obe onso, ne manwa obe onso.” (Mat. 22:35-37) Yesu wādi usenswe Shandi wa mūlu mpata, ne na bubine wādi ulonda bino byotwatanga. Kadi Yesu wādi utele mutyima ku mumumwena Yehova, byāmwekele’tu mu būmi bwandi bwa kikōkeji. O mwanda, kitatyi kityetye’tu kumeso kwa kufwa, wānene amba Leza umuyukile bu muntu ukōkele mbila Yandi. Mu uno muswelo, Yesu wāikele mu buswe bwa Yehova.—Yoa. 15:10.
2 Bavule dyalelo betelanga amba baswele Leza. Ne kutatana mpika, batwe netu tubadilwa mu bano bantu. Inoko, mwanda mukatampe wa kubandaula i uno: Lelo Leza ungyukile? Le Yehova umonanga namani? Le umwene bu muntu wa kwandi? (2 Tem. 2:19) Kupwana bininge na Mfumu wa diulu ne ntanda i dyese’po kashā!
3. Mwanda waka bamo batatana mulangwe wa kwikala wa kwa Yehova, ne i bika bikebakwasha baleke kutatana?
3 Ino, kudi bantu bamo basenswe bininge Yehova bakolelwa kukulupila amba wibetabije. Bamo bemonanga bu ba bitupu, o mwanda ke batatana mulangwe wa kwikala ba kwa Yehova. Bine, ketukabulwepo kusangala pa kuyuka’mba Leza ukokeja kwitumona mu muswelo mwishile! (1 Sam. 16:7) Mutumibwa Polo wāsapwidile banababo Bene Kidishitu amba: “Shi muntu usenswe Leza, nabya ye enka wayūkibwa kudi aye.” (1 Kod. 8:3) Kuswa Leza kyo kisakibwa kibajinji pa kusaka akuyuke. Tala: Kyotangila dino dipepala i kika? Mwanda waka wielelanga’ko kwingidila Yehova na mutyima obe onso, ne muya obe onso, ne manwa obe onso, ne bukomo bobe bonso? Shi wi mwipāne ne kubatyijibwa, i kika kyakulengeje utabule ano matabula? Bible unena’mba Yehova, mwine usātanga mu mityima, ukokelanga kwadi byobya bisaka mutyima. (Tanga Hakai 2:7; Yoano 6:44.) Nanshi, ubwanya kunena’mba wingidilanga Yehova mwanda wakukokele kwadi. Kakalekapo boba bakokele kwadi shi bendelela kwikala na dikōkeji. Leza wibamwene bu balēme kadi wibasenswe mpata.—Mit. 94:14.
4. Mwanda waka tufwaninwe kwendelela kulangulukila pa mwanda utala kuyukwa na Leza?
4 Shi’tu Yehova wetukokela kwadi, tufwaninwe kuta mutyima ku kwilama mu buswe bwandi. (Tanga Yude 20, 21.) Vuluka, Bible unena’mba bikokejika muntu kweja ne kupaluka kudi Leza. (Bah. 2:1; 3:12, 13) Kimfwa, mutumibwa Polo kumeso kwa kunena myanda idi mu 2 Temote 2:19, wātelele ba Himeneusa ne Filetusa. Bimweka’mba bano bantu babidi bādi bidi ba kwa Yehova, ino kupwa bāsāsuka ku bubinebine. (2 Tem. 2:16-18) Vuluka kadi amba mu kipwilo kya Ngalatea, bantu bamo bādi bayukilwe na Leza kebāshadidilepo mu mwinya wa ku mushipiditu obādi’mo. (Ngat. 4:9) Muswelo witumona Leza bine ke wa kukwatyilapo ku nzeinzei.
5. (a) I ngikadilo’ka imo isakanga Leza? (b) I bimfwa’ka byotusa kubandaula?
5 Kudi ngikadilo imo isakanga Yehova. (Mit. 15:1-5; 1 Pet. 3:4) Lwitabijo ne kwityepeja i ngikadilo yādi iyukilwa’ko boba bayukilwe na Leza. Tubandaulei bantu babidi bāswilwe na Yehova pa mwanda wa ino ngikadilo ibidi. Kupwa tusa kutala ne muntu umo wādi ulanga’mba uyukilwe na Leza ino kwitatula kwālengeja amone amba Yehova kākidipo nandi. Tukokeja kuboila ñeni ku bino bimfwa.
Mukulutuba wa Bonso Badi na Lwitabijo
6. (a) I lwitabijo’ka lwālombwele Abalahama mu milao ya Yehova? (b) Le Abalahama wāyukilwe na Yehova namani?
6 Abalahama i muntu ‘wāikele kwiubija mudi Yehova.’ O mwanda witwanga bu “mukulutuba wa bonso bakwitabija.” (Ngal. 15:6; Loma 4:11) Pa kwitabija, Abalahama wāshile ntanda yandi, balunda, ne bituntwa, kaenda ku ntanda ya kulampe. (Ngal. 12:1-4; Bah. 11:8-10) Lwitabijo lwa Abalahama lwādi lukomo ne mu myaka yālondele’po. Kino kyāmwekele kitatyi kyāitabije ‘kulambula Isake,’ wandi mwana mwanda’tu wa kukōkela ku musoñanya wa Yehova. (Bah. 11:17-19) Abalahama wālombwele lwitabijo mu milao ya Yehova, o mwanda Leza wāmumwene bu muntu wa pa bula; na bubine, wāyukile Abalahama. (Tanga Ngalwilo 18:19.) Yehova kāyukilepo’tu amba Abalahama udi’ko, ino wāmusenswe ke mulunda.—Yak. 2:22, 23.
7. Le i kika kitulumukwa mu mwanda utala kufikidila kwa milao ya Yehova, ne Abalahama wālongele’po namani?
7 I kintu kitulumukwa pa kumona’mba Abalahama mwine paādi ukidi mūmi kātambwilepo kipyanwa kya ntanda yāmulailwe. Kadi kāmwenepo lukunwa lwandi luvula “bwa musenga udi ku mulomo wa kalunga-kamema.” (Ngal. 22:17, 18) Nansha ino milao byokeyāfikidilepo kitatyi kyaākidi mūmi, Abalahama aye wālamine lwitabijo lwandi lukomo mudi Yehova. Wādi uyukile amba shi Leza walaya kintu, kidi’nka na kyalongeka kala. Bine, Abalahama wāikele na būmi bukwatañene na buno buyuki. (Tanga Bahebelu 11:13.) Lelo Yehova wituyukile bu bantu badi na lwitabijo bwa lwa Abalahama?
Kukungila Yehova I Kilomboji kya Lwitabijo
8. Le i bintu’ka byendele’mo byabilanga bavule kumona ino bija?
8 Tukokeja padi kwija pa kusaka’mba kyotwabila kifikidile. Busongi, kubutula, kwikala bakomo mu ngitu i bintu byendele’mo byabilanga bantu. Ku bavule padi kimo nansha bibidi pa bino bintu kebyafikidile. Shi bidi namino kodi, yuka’mba muswelo otulwa nabyo ukokeja kulombola bukatampe bwa lwitabijo lwetu.
9, 10. (a) Le bamo i bakimbe namani kufikidija byobasaka? (b) Le ubamone namani mufikidilo wa milao ya Leza?
9 Kukimba kufikidija bino byotwabila mu muswelo kewitabijibwepo na Leza i buvila. Bikokeja kona kipwano kya muntu na Leza. Kimfwa, bamo i batonge bundapi bwishile na madingi a Yehova. Bakwabo i batonge twaji twibalomba kushiya kisaka ne kipwilo. Le bidi namani pa kwikena ne muntu wampikwa kwitabija? Shi Mwine Kidishitu ulonga namino, le ulanga usakanga bine kuyukwa na Yehova? Le Yehova wādi wa kumona Abalahama namani shi kātūkijepo mutyima pa milao? Le byādi bya kwikala namani shi Abalahama wāsakile kuvuija’yo mwasakila na kukimba kushikata payampe ne kwitumbija pa kyaba kya kwilaija Yehova? (Dingakanya na Ngalwilo 11:4.) Lelo Yehova wādi wa kwendelela na kumuyuka?
10 Le i bika byoabila bifikidile? Lelo lwitabijo lobe i lukomo mu muswelo obwanya kwilaija Yehova, mwine ulaile kukwikutyija senene? (Mit. 145:16) Monka mobyāikadile kudi Abalahama, kufikidila kwa milao ya Leza kukokeja padi kuleka kufika mu kitatyi kyotusaka. Nansha nankyo, Yehova usangelanga lwitabijo lotutamija na lwa Abalahama ne kulonga bintu kukwatañana nalo. Kulonga namino bine kumwenwa’mo.—Bah. 11:6.
Mwishidile Kwityepeja ne Ditatu
11. I madyese’ka keābudilwepo kwikala nao Kola, ne kino kilombola bu wādi namani kumeso a Leza?
11 Ba Mosesa ne Kola i beshile mpata mu mwanda utala kulēmeka mpangiko ya Yehova ne butyibi bwandi. Bilongwa byabo byālengeje Yehova ebamone mu muswelo kampanda. Kola i Mwine Levi wa mu kisaka kya Kohata, kadi wādi na madyese mavule, mukokeja kubadilwa ne kwimwena kweēmwenine muzo unyongololwa pa Kalunga Katyila, kukwatakanya butyibi bwa Yehova pa Bene Isalela bakubulwa kikōkeji ku Lūlu lwa Shinai, ne kwingila mu mingilo ya kusela dikumbo dya kipwano. (Div. 32:26-29; Umb. 3:30, 31) Bimweka’mba wādi na dikōkeji mu bula bwa myaka ne bavule mu kitūlo kya Isalela kebādipo babulwa kunyemena kwadi.
12. Mungya kifwatulo kidi pa paje 31, le ditatu dya Kola dyāonene namani kuyukwa kwandi na Leza?
12 Ino, muzo wa Isalela powādi mwishinda wenda mu Ntanda ya Mulao, Kola wāmwene mungya milangwe yandi amba kudi bintu kebyendekapo mu mpangiko ya Leza. Kupwa bendeji bakwabo 250 mu muzo bēkupa kwadi na kukimba kushinta bintu. Kola ne bakwabo ye bano padi bālangile amba Yehova upwene nabo. Ke banena Mosesa amba: “Banwe’bo i kubapu banwe, nanshi ba kitango kyonsololo i kijila kyonsololo’tu, muntu ku muntu; kadi Yehova nandi udi mubukata mwakyo.” (Umb. 16:1-3) Leka, leka, leka, kuno shako ko kwikulupila bipitepite ne ditatu! Mosesa wēbalondolola amba: “Yehova ukalaija boba badi bu-bandi.” (Tanga Umbadilo 16:5.) Difuku dyālondele’po ne kujika’dyo mpika, Kola ne bonso bēlungile ku butomboki bwandi byobafwa’bi.—Umb. 16:31-35.
13, 14. Lelo Mosesa wālombwele namani kwityepeja?
13 Ino Mosesa aye “wadi muntu mukōkele’tu, utabukile bantu bonsololo baikele panopanshi kikōkeji.” (Umb. 12:3) Wālombwele kwiubija ne kwityepeja na kusumininwa kulonda bwendeji bwa Yehova. (Div. 7:6; 40:16) I kutupu palombola’mba divule Mosesa wādi utatana muswelo ulonga Yehova bintu nansha kujingwa mutyima pa kulonda mupangila Yehova bintu. Kimfwa, Yehova wāletele musoñanya wa mwa kūbakila tabenakulo utela katye ne katye, kimfwa musombelo wa myonji ne buvule bwa nkobekelo ya kwingidija pa kupunga kisandi kya makupo. (Div. 26:1-6) Shi mu bulongolodi bwa Yehova mutadi wakupe bulombodi bumweka bu watwela mpata mu katye ne katye, kyaba kimo padi kwije kojingwe mutyima. Inoko, Yehova i mutadi mubwaninine, upāna mingilo ku bantu ne ukulupile bengidi bandi. Shi wapāna bulombodi mu kanda ne kanda, yuka’mba padi bubinga bwendele’mo. Inoko, yuka’mba Mosesa kākaladilepo Yehova pa kumupa bulombodi mu kanda ne kanda, nansha kulanga’mba wamuzawila nansha kumutyinya-mbavu mu bintu byayukile ne mu bwanapabo bwandi. Mosesa aye wādi utadija biyampe bengidi shi mungya misoñanya ya Leza “e mo balongele.” (Div. 39:32) Bine kuno i kwityepeja! Mosesa wādi uyukile amba uno i mwingilo wa Yehova kadi aye i kingidilwa bitupu kya kuvuija mingilo.
14 Kwityepeja kwa Mosesa kwāmwekele paātenwe mu ngikadilo itenga bumuntu bwandi. Difuku dimo, Mosesa wājimije kwīfula, wākomenwa kupandula Leza kitatyi kyādi kidilakana bantu. Ku mfulo, Yehova wānena Mosesa amba kakikatwejapo bantu mu Ntanda ya Mulao. (Umb. 20:2-12) Aye ne mwanabo Alone, bāikele kūminina mitompwe ya bana ba Isalela umbula bwa myaka. Inoko pano, mwanda Mosesa wajina bityetye, kakikemwenapo bintu byaādi utengele tamba kala! Le Mosesa wālongele’po namani? Nansha byo kēbyamusangejepo, Mosesa wāitabije na kwityepeja butyibi bwa Yehova. Wādi uyukile amba Yehova i Leza moloke, kwandi kekudipo bukondame, mhm. (Kup. 3:25-27; 32:4) Kitatyi kyolangulukila padi Mosesa, kumwenepo amba i muntu uyukilwe na Yehova?—Tanga Divilu 33:12, 13.
Kukōkelelela Yehova Kulomba Kwityepeja
15. I bika byotubwanya kwifunda ku mitatulo ya Kola?
15 Muswelo otulonga bintu kitatyi kishintwa bintu mu kipwilo kya Bwine Kidishitu ntanda yonso ne kitatyi kikwatwa butyibi pa boba betutangidile uteñanga muswelo wituyukile Yehova. Kola ne balunda nandi bāpalukile kulampe na Leza na kwikulupila bipitepite, ditatu, ne kubulwa lwitabijo. Nansha Kola byaādi umona amba i Mosesa mununu ulonga butyibi, ino na bubine, Yehova ye wādi wendeja muzo. Kola pa kujimija kino mu ñeni, wābulwa kukōkela boba bādi bengidijibwa na Leza. Bine, kyādi kya kwikala biyampe shi Kola wāilaije Yehova atōkeje myanda ne kushinta bintu shi ye mokyendele. Ku mfulo, Kola wāvutakenye na bilongwa bya mitatulo ntumbo yaādi uyukilwe bu muntu wa kikōkeji!
16. Lelo kulonda kimfwa kya Mosesa kya kwityepeja kukatenga namani muswelo wituyuka Yehova?
16 Ino nsekununi i kidyumu kikatampe ku bakulumpe ne ku bakwabo mu kipwilo dyalelo. Bilomba kwityepeja pa kwilaija Yehova ne pa kulonda bwendeji butamba ku bantu batongele kutangidila mingilo. Lelo tulombolanga’mba twi betyepeje ne kukōkela na mwādi mwikadile Mosesa? Le tubwanya kuyuka mingilo ya boba betutangidile umbukata mwetu ne kukōkelelela bwendeji botutambula? Lelo tulamanga ñeni yetu kitatyi kyotusanshijibwa? Shi i amo, nankyo netu Yehova uketuyuka biyampe. Kwityepeja ne kukōkelelela kwetu kukalengeja etuswe.
Yehova Uyukile Boba ba Kwandi
17, 18. I bika biketukwasha twendelele kuyukwa na Yehova bu bandi?
17 I kya kamweno kulangulukila pa bantu bākokelwe na Yehova ne baādi uyukile biyampe. Ba Abalahama ne Mosesa bādi bantu bakubulwa kubwaninina, bādi na makambakano pamo bwa batwe. Nansha nabya bāyukilwe na Yehova bu bantu ba kwandi. Inoko, kimfwa kya Kola kilombola’mba tukokeja kupaluka kulampe na Yehova waleka ne kwituyuka bu bandi. I biyampe umo ne umo eipangule amba: ‘Lelo Yehova umwene namani? I ñeni’ka yonaboila ku bino bimfwa bya mu Bible?’
18 Ukasengwa pa kuyuka amba Yehova umonanga bantu ba kikōkeji bakokele kwadi bu bandi. Endelela na kutamija lwitabijo, kwityepeja, ne ngikadilo mikwabo ikakulengeja Leza akusanswe mpata. Na bubine, kuyukwa na Yehova i dyese dilēme dileta nsangaji mu būmi, kadi dikaleta ne madyese makwabo a kutendelwa kumeso.—Mit. 37:18.
Lelo Ukivulukile?
• Lelo kuyukwa na Yehova kushintulula bika?
• I muswelo’ka okeula lwitabijo lwa Abalahama?
• Le i ñeni’ka yotukokeja kuboila kudi Kola ne Mosesa?
[Bipangujo bya Kifundwa]
[Kifwatulo pa paje 29]
Lelo tudi na lwitabijo na lwa Abalahama amba Yehova ukafikidija ne pa mfulo milao yandi?
[Kifwatulo pa paje 31]
Kola kādipo usaka kukōkela bwendeji na kwityepeja
[Kifwatulo pa paje 32]
Lelo uyukilwe na Yehova bu muntu ukōkelanga bwendeji na kwityepeja?
