Bipangujo Bya Batangi . . .

Lelo Bene Kidishitu bonso ba kikōkeji bendanga mūlu?

▪ Bantu bavule ke batange binenwa bikankamika bya Yesu bya amba: “Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Lelo Yesu wādi usaka kunena’mba batōtyi bonso ba kikōkeji ba Shandi Yehova Leza, bafwaninwe kwenda mūlu pa kwikala na būmi bwa nsangaji ya nyeke?

Tala binenwa bya Yesu bilanguluja bya amba: “Kekudipo nansha umo wakandile momwa mūlu, poso’nka aye watūkile momwa mūlu, ke Mwanā muntu kadi, udi momwa mūlu.” (Yoano 3:13) Kino kilombola amba batōtyi ba kikōkeji ba kala, kimfwa ba Noa, Abalahama, Mosesa, ne Davida kebāendelepo mūlu. (Bilongwa 2:34) Penepo, bonso’ba bāendele kwepi? Mu kīpi: Bano ba kikōkeji ba pa kala badi mu bibundu, balēle mu lufu, bampikwa kuyuka kintu, belaije lusangukilo.—Musapudi 9:5, 6; Bilongwa 24:15.

Mu Bible, Yesu ye muntu mubajinji utelele būmi bwa mūlu kupwa kwa lufu. Wālombwele batumibwa bandi amba usa kwibalongolwela kuntu kwabo mūlu. (Yoano 14:2, 3) Uno wādi mwanda mupya ku bantu ba Leza. Kupwa mutumibwa Polo wāshintulwile amba Yesu pa kupwa kufwa ne kusangukila’ye mūlu ‘wāladīle bandi bana ba bwanga dishinda dipya dya būmi’—dishinda dyādi kedyanangilwe’mo na muntu nansha umo.—Bahebelu 10:19, 20.

Lelo kino kyādi kishintulula amba ba kikōkeji bonso bakendanga mūlu? Mhm, mwanda lusangukilo lwa kwenda mūlu lukwatañene na mwingilo upelwe enka bantu bamo kete. Mu kyolwa kyandi kya mfulo, Yesu wālombwele batumibwa bandi amba bakatentama “ponka pa bipona kuketa myanda” mu Bulopwe bwandi bwa mūlu. Nanshi, kubikala na Yesu mūlu o mwingilo obapelwe.—Luka 22:28-30.

Kutentekela pa batumibwa, kudi bantu bakwabo nabo badi ba kupebwa uno mwingilo wa kutendelwa. Mutumibwa Yoano wāmwene mu kimonwa Yesu ne kibumbo kya bantu basangwilwa kwenda mūlu, wēbatela bu ‘balopwe bapidishitu bakukabikala pano pa ntanda.’ (Kusokwelwa 3:21; 5:10) Le bādi banga? Enka mwikadilanga imbikalo yonso, kwikalanga enka kibalwa kityetye kya ba kuludika. Mo monka mwikadile ne buno Bulopwe. Yesu, Kana ka Mukōko ka Leza, ubikele na balopwe-nandi 144000, “bakūdilwe umbukata mwa bantu.”—Kusokwelwa 14:1, 4, 5.

Bine, bantu 144000 i kibumbo kityetye shi twikidingakanye na bantu bonso ba kikōkeji ba pa kala ne ba dyalelo. Inoko kino i kimvwanike mwanda ba 144000 basangulwanga kwenda mūlu mwanda wa mwingilo kampanda ukola obapelwe. Langa’po bidi shi koubaka njibo, le ukakimba bobaki bonso ba bwino ba kwenu? Mhm. Ukakimba enka kibalwa kyosakilwa. Muswelo umo onka, ke bantupo bonso ba kikōkeji batongelwe na Leza mwanda wa mwingilo wa pa bula wa kubikala pamo na Kidishitu mūlu.

Uno umbikalo wa mūlu ukafikidija mpango imbajinjibajinji ya Leza itala muzo wa muntu. Yesu ne balopwe-nandi ba 144000 bakatangidila mwingilo wa kwalamuna ntanda yonso ke paladisa, mukekala bantu ba kikōkeji kebabadika mu nsangaji ya nyeke. (Isaya 45:18; Kusokwelwa 21:3, 4) Mu bano bantu, mubadilwa ne boba badi mu luté lwa Leza bakasangulwa.—Yoano 5:28, 29.

Batōtyi bonso ba kikōkeji ba Yehova—ba pa kala ne ba dyalelo—bakokeja kutambula kyabuntu kya kutendelwa kya būmi bwa nyeke. (Loma 6:23) Batyetye kete bo bakatambula būmi bwa momwa mūlu mwanda wa kwingila mwingilo wa pa bula, ino kibumbo kikatampe kikatambula būmi mu paladisa pano pa ntanda ponso.