Myanda Miyampe Le I Myanda’ka?

“Īno myanda-miyampe . . .”—MATEO 24:14.

BENE KIDISHITU banenwe kusapula “īno myanda-miyampe ya buno bulopwe” na kwibufumikila bantu, kushintulula amba Bulopwe i umbikalo wa ntanda ukeiludika mu boloke. Shako, bishima “myanda-miyampe” bitelelwanga ne bintu bikwabo mu Bible. Kimfwa, twibitana bilembwe amba, “myanda miyampe ya lupandilo” (Mitōto 96:2, New World Translation); “myanda-miyampe ya Leza” (Loma 15:16); ne “myanda-miyampe ya Yesu Kidishitu.”—Mako 1:1.

Mu kīpi, myanda miyampe iselele bubinebine bonso bwēsambīle’po Yesu ne bwāsonekelwe na bandi bana ba bwanga. Yesu, kumeso kwa kukanda mūlu wānene balondi bandi amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya mushipiditu sandu.” (Mateo 28:19, 20) Nanshi mwingilo wa Bene Kidishitu ba bine ke enkapo wa kusapwila bantu Bulopwe; ino bafwaninwe ne kulonga bukomo bwa kulonga bana ba bwanga.

Lelo bipwilo biloñanga bika pa uno mwanda? Boba bampikwa kwivwanija mwikadile Bulopwe—kadi i bavule—kebakokejapo kufundija’bo bakwabo. Abo’ko, basapulanga mfundijo ya lushiñanya itala lulekelo lwa bubi ne lwitabijo mudi Yesu. Kadi bakimbanga kukoka bantu kupityila ku mingilo ya bukwashi nansha ku kūbaka mpitalo, masomo, ne mobo a balanda. Nansha kulonga buno bukomo byokubwanya kuvudija bantu mu bipwilo, kekulupulangapo Bene Kidishitu basaka na mutyima onso kwikala na būmi bukwatañene na bufundiji bwa Yesu.

Mwifundi umo wa teoloji walembele amba: “Mu befundi ne bendeji ba bipwilo bya Bene Kidishitu, batyetye kete bo bajingulwile amba tunenwe kulonga bana ba bwanga nansha befundi ba Yesu ne kwibafundija kulonga byonso byānene Yesu. . . . Musoñanya wa Yesu pa uno mwanda i mwimvwanike. Ino batwe bo kebaloñangapo byaānene. Ketukwete’byopo na mutyika. Kadi mobimwekela, ketuyukilepo ne mwa kulongela’byo mwine.”

Mo monka, bubandaudi bwalongelwe mu États-Unis bwalombwele amba Bene Katolika 95 pa katwa i betabije amba kipwilo kyabo kifwaninwe kusapula myanda miyampe. Eyo, bavule bamwene amba muswelo mulumbuluke wa kusapula’yo, i kwikala na būmi buletela bakwabo kimfwa, ke’nkapo kwisamba’yo bitupu. Muntu umo wa mu baipangwilwe wanene amba: “Kusapula myanda miyampe i kwishile na kunenanena’nka binenwa. Tunenwe kumwekeja Myanda Miyampe mu būmi.” Julunale U.S. Catholic, waimanine buno bubandaudi, wanene amba bavule batyinanga kusapwila bantu nkulupilo yabo, mwanda “kipwilo i kifutululwe pangala pa myanda ya kona bana ku bulādi ne bufundiji bukutakane bwakyo bilongelwe panopano.”

Kukwabo nako, eveke umo wa mu Metodishite wadi utompola amba kipwilo kyabo kibekalañanya, ne kuvutakana, kekikidipo na kininga kya kuvuija mwingilo wakyo kadi kibashala na būmi bwa muswelo umo na bantu ba panja. Waipangwile na diwi dya bulanda amba: “Lelo bene bafwaninwe kusela evanjile ya Bulopwe i bāni?”

Eveke kabwenyepo kulondolola kino kipangujo kyandi. Inoko kilondololwa kidi’ko. Ukekitana mu kishinte kilonda’ko.

[Bushintuludi pa paje 6]

Myanda miyampe i yoya isambila pa Bulopwe bwa Leza ne pa lupandilo kupityila ku kwitabija Yesu Kidishitu