Bupolofeto bwa Mvubu Mikatampe

“Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.”—MATEO 24:14.

BEFUNDI betabije amba uno vese udi na mvubu mikatampe. I wa mvubu mwanda wisambila pa mwingilo wingilwa ntanda yonso. Kadi udi na mvubu mwanda ufunkila pa bifwaninwe kulonga Bene Kidishitu—mwingilo wa kusapula mwine ufwaninwe kubadikila ne kuyukanya kufika kwa kinkumenkume kikatampe kadi kya pi na pi kyātelele Yesu bu “mfulo.”

Uno vese wa bupolofeto ufikidilanga dyalelo. Ukutalanga ne abe, mwanda myanda miyampe idi’mo i lwito ne kidyumu. Ikunena utonge: Kwitabija Bulopwe bwa Leza nansha kupela’bo. Butongi botonga butala būmi bobe bonsololo.

Bandaula myanda idi kūlu ne kunshi. Mafuku mavule kumeso kwa Yesu kupopwa ku mutyi, bana ba bwanga bāile kwadi kebamwipangula bitala mafuku a kumeso. Bādi basaka kuyuka bitala pa kushimikwa kwa Bulopwe bwa Leza, bwine bwādi bwisambila’po Yesu divule. Kadi bādi basaka kuyuka bitala “pamfulo ya panopantanda,” itelwa na malamuni makwabo bu “mfulo ya ntanda.”—Mateo 24:3, Bisonekwa Bitokele.

Pa kwibalondolola, Yesu wālaya’mba kukekalanga mavita makatampe, bipupo bya nzala, bipupo bya mbá, ne bintenshi bya kutenkanya ntanda. Wānene monka amba kujilula kwa bijila kukelundila’ko, bafundiji ba bipwilo bya bubela bakongola bavule, kadi Bene Kidishitu ba bine nabo bakashikibwa ne kupangwapangwa. Bino byonso i myanda mibi.—Mateo 24:4-13; Luka 21:11.

Inoko kwādi ne myanda miyampe. Yesu wānene binenwa bitelelwe kūlu’ku, bilanguluja ne kukunka mutyima wa bantu mu bula bwa myaka. Nansha bantu byobetabijanga mvubu ya binenwa bya Yesu, bapatanyanga buluji bwabyo. Lelo ino myanda miyampe mine i myanda’ka? Le Bulopwe bwa Leza i bika? I kitatyi’ka kifwaninwe kufikidila buno bupolofeto, ne na bāni? Ne “mfulo” mine i bika? Tutalei bidi.

 [Kifwatulo pa paje 2]

Facsimile of the Washington Manuscript of Four Gospels. Matthew 24:14 is highlighted

[Kutambile Kifwatulo 2]

From the book Facsimile of the Washington Manuscript of the Four Gospels in the Freer Collection 1912