Kulupilai Mudi Yehova Pano Pafwena Mfulo

“Kulupilai nyeke mudi Yehova.”—IS. 26:4.

1. I kwishila’ka kudi pa bukata bwa bengidi ba Leza ne bantu ba ino ntanda?

 MU INO ntanda yotudi’mo, bantu bavule kebakiyukilepo i ani ne i kika kyobakokeja kukulupila, padi i mwanda bebasanshijanga nansha kwibatyumuna mityima misunsa mivule. Bine, kino i kishile kulampe na bengidi ba Yehova! Byobaludikwa na tunangu twa Leza, bayukile biyampe mwine obafwaninwe kukulupila, pa kyaba kya kukulupila ino ntanda nansha “bāna ba balopwe” bayo. (Mit. 146:3) Abo i batūle būmi bwabo bwa dyalelo ne bwa mafuku a kumeso mu makasa a Yehova, bayukile amba wibasenswe kadi ufikidijanga nyeke Kinenwa kyandi.—Loma 3:4; 8:38, 39.

2. Le Yoshua wālombwele namani amba Leza i mufwaninwe kukulupilwa?

² Pa kala, Yoshua wālombwele amba bine Leza i mufwaninwe kukulupilwa. Kubwipi na ku mfulo ya būmi bwandi, wānene bana babo Bene Isalela amba: “Muyukile umityima yenu yonso ne mu myuya yenu yonso, amba nansha kintu kimo kine kyabulwa ku byonso  bintu bilumbuluke byesambile Yehova Leza wenu pa mwanda wenu, mhm; byonsololo’tu byemufikidile.”—Yos. 23:14.

3. Lelo dijina dya Leza disokola bika bitala padi?

³ Yehova ufikidijanga milao yandi, ke enkapo pa mwanda wa buswe bwaswele bengidi bandi, ino nakampata i pa mwanda wa dijina dyandi. (Div. 3:14; 1 Sam. 12:22) Pa mwanda utala dijina dya Leza, ntwelelo ya dibuku dimo (The Emphasized Bible) dya Joseph Bryant Rotherham dinena’mba, dijina dya Leza dishintulula’mba ukokeja kwikala kintu kyo-kyonso mwanda wa kufikidija milao yandi. Kitatyi kyotwivwana dyandi dijina tuvulukanga amba uloñanga nyeke byobya byanena. Ukokeja kulonga byasaka, mu kitatyi ne kifuko kyo-kyonso. Kekudipo kintu nansha kimo kimukomena. Leza ukeendejanga nyeke mungya dyandi dijina.

4. (a) Lelo Isaya 26:4 witusoñanya tulonge bika? (b) I bika byotusa kubandaula mu kino kishinte?

⁴ Wiipangule amba: ‘Lelo ndyukile Yehova biyampe mwa kwikadila na lukulupilo lonso mwadi? Le ntengele na kikulupiji mafuku a kumeso, na kuyuka’mba Leza uyukile byonso?’ Isaya 26:4 unena’mba: “Kulupilai nyeke mudi Yehova; mwanda mudi Ya Yehova mo mudi dibwe dya nyeke.” Shako, Leza pano kakiloñangapo bingelengele mwanda wa kupandija būmi bwa bantu na mwaādi ulongela’byo kitatyi kyāsonekelwe Bible. Inoko, byadi “dibwe dya nyeke,” ukokeja kukulupilwa “nyeke.” Lelo Leza wetu ukulupilwa ukwashanga namani batōtyi bandi ba kikōkeji dyalelo? Tubandaulei miswelo isatu: Witukomejanga kitatyi kyotukimba bukwashi pa kukomena matompo, witukwatakanyanga kitatyi kyotulwa na bujundu nansha kukankajibwa kwa malwa, ne witukankamikanga kitatyi kyotulēmenenwa na kuzumbazumba. Potubandaula ino myanda, langulukila pa muswelo okokeja kukomeja kikulupiji kyobe mudi Yehova.

Kulupila Mudi Yehova Kitatyi Kyotompibwa Kulonga Bubi

5. Pa bitala kikulupiji kyetu mudi Leza, le i pepi pabwanya kwikala ditompo dikatampe?

⁵ I kipēla kukulupila mudi Yehova pa bitala mulao wandi wa Paladisa ne lusangukilo—bintu byotwabilanga. Ino kibwanya kwikala kikomo kukulupila mwadi pa bitala mwiendelejo, kwitabija na mutyima onso amba kukōkela mashinda ne misoñanya yandi byo biyampe ne bitwala ku nsangaji mikatampe. Mulopwe Solomone wāsonekele kino kidyumu amba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” (Nk. 3:5, 6) Tala pano abatela “mashinda” ne “tushinda.” Bine, dishinda dyonsololo dya būmi bwetu—ke enkapo lukulupilo lwetu lwa Bwine Kidishitu—difwaninwe kulombola’mba tukulupile mudi Leza. I muswelo’ka otukalombola luno lukulupilo kitatyi kitufikila matompo?

6. I muswelo’ka okakomeja mutyima obe wa kusumininwa kupela milangwe mibi?

⁶ Kuvundamina bibi kushilulanga mu ñeni. (Tanga Loma 8:5; Efisesa 2:3.) Penepo, i muswelo’ka okakomeja mutyima obe wa kusumininwa kupela milangwe mibi? Tubandaulei ino miswelo itano: 1. Kimba bukwashi bwa  Leza kupityila ku milombelo. (Mat. 6:9, 13) 2. Langulukila pa bimfwa bya mu Bible bya boba bāpelele kuteja Yehova ne boba bāmutejeje. Kupwa tala mobyēbapityile. * (1 Kod. 10:8-11) 3. Langulukila pa makambakano akokeja kukukolomwena bubi mu ñeni ne mu malango abe ne baswe bobe. 4. Langa mukeivwanina Yehova shi mwingidi wandi umo waponena mu bubi bukatampe. (Tanga Mitōto 78:40, 41.) 5. Langa nsangaji ikemvwana Yehova ku mutyima pa kumona mutōtyi wandi wa dikōkeji upela bibi, ino ulonga biyampe, ekale pa bantu nansha kufula. (Mit. 15:1, 2; Nk. 27:11) Nobe ukokeja kulombola’mba ukulupile mudi Yehova.

Kulupila Mudi Yehova Polwa na Bujundu ne Kukankajibwa

7. Lelo i matompo’ka ālwile na Yelemia, ne kyaba kimo wēivwene namani?

⁷ Bana betu bavule bengilanga mu myaba mobakolelwa pa kūminina. Mupolofeto Yelemia wāingile mu kifuko kya uno muswelo—papo bulopwe bwa Yuda mu mafuku abo a mfulo a kavutakanya. Difuku ne difuku wādi usunkanibwa na matompo a lwitabijo mwanda wādi usapula na kikōkeji musapu wa butyibi bwa Leza. Kyaba kimo, ne Baluki mulembi wandi wa dikōkeji wādi kadila bukōke. (Yel. 45:2, 3) Lelo Yelemia wāpungile? Shako kyaba kimo mutyima wāmutyimukile. “Difuku dyonabutwilwe difingwe,” i Yelemia utompola. “Lelo i mwanda ka o nalupukile munda, kumona kuputuma na mingilo ne bya malwa, ne mafuku ami ashinika mu bumvu, a?”—Yel. 20:14, 15, 18.

8, 9. Mungya Yelemia 17:7, 8 ne Mitōto 1:1-3, i bika le byotufwaninwe kulonga pa kusaka’mba twendelele na kupa bipa bilumbuluke?

⁸ Nansha nabya, Yelemia kālekele’byopo. Wāendele kukulupila mudi Yehova. Ku mfulo, uno mupolofeto wa kikōkeji wēmwena kufikidila kwa binenwa byānene Yehova mwine bisonekelwe mu Yelemia 17:7, 8 amba: “Ye wakatōkwe yewa muntu ukulupile mudi Yehova, ne lukulupilo lwandi i Yehova enka. Mwanda ukekalanga’nka bwa mutyi mukunwe pabwipi na mema, wakwāla miji yao pa minonga’pa ne kutyinapo pa kufika kyanga mpika, ino dyani dyao dikekalanga dibishi; kadi keukatyinapo mu mwaka wa mulanga, nansha kulekapo kupa bipa mpika.”

⁹ Pamo bwa mutyi mubishi upa bipa “mukunwe pabwipi na mema,” nansha udi mu kyombe mupita mukola wa mema, Yelemia ‘kālekelepo kupa bipa.’ Wāpelele kulonda bantu ba kipuni bādi bamujokolokele. Ino, wālamete ku Nsulo ya “mema” akwatakanya būmi ne kulama mu mutyima kyonso kyādi kimunena Yehova. (Tanga Mitōto 1:1-3; Yel. 20:9) Bine, Yelemia i kimfwa kilumbuluke kotudi, nakampata ku boba bengila mu myaba mikomo! Shi ye moingidila, endelela kukulupila mudi Yehova, ukakupa kūminina kitatyi kyosapula patōkelela “dijina dyandi.”—Bah. 13:15.

10. I madyese’ka otudi nao, ne i bipangujo’ka byotufwaninwe kwiipangula?

¹⁰ Pa kwitukwasha tulwe na bikoleja mu ano mafuku a ku mfulo, Yehova witupanga bintu byūbaka ku mushipiditu. Mu bino bintu, mubadilwa Kinenwa kya Leza kituntulu, kyalamunwanga pampikwa kilubo mu ndimi mivule. Uletanga pa kitatyi kitungwe bidibwa bingi kupityila ku kabumbo umpika wa binebine, udi na manwa. Kadi i mwitupe kibumbo kikata kya balunda netu mu lwitabijo ba kwitukwatakanya ku kupwila ne ku bitango. Lelo umwenanga ne pa mfulo mu ino mpangiko? Bonso bamwena’mo “bakemba ne tusepo ku mutyima.” Inoko shi mupele kuteja Leza “mukadila misongo ya mutyima, ne kubuluka mwanda wa kuvutakanya mushipiditu.”—Is. 65:13, 14.

Kulupila Mudi Leza Kitatyi Kyozumbazumba

11, 12. Ntanda byoidi mu makambakano, i mwiendelejo’ka ulombola tunangu twa bine?

¹¹ Enka mokyālailwe, byamalwa byenda bivudila’ko bisusulanga muzo wa muntu enka bwa dilobe. (Mat. 24:6-8; Kus. 12:12) Kitatyi  kiyanga dilobe, bantu bavudile kunyemena pa mikuna nansha kukanda pangala pa njibo—pantu pamweka bu patuluke. Mo monka, makambakano a ntanda byoenda avula, bantu bavule bakimbanga kufyama mu malongolodi amweka bu a lupeto lungi, a kipolitike nansha a bipwilo, mu sianse ne bya busendwe. Ino pa bino byonso i patupu kileta mutyima-ntenke wa binebine. (Yel. 17:5, 6) Bengidi ba Yehova abo badi na kinyemeno kikulupilwa—“dibwe dya nyeke.” (Is. 26:4) Mulembi wa mitōto wānene amba: “[Yehova] ye enka kidibwe kyami ne lupandilo lwami; i kitēba kyami kilampe.” (Tanga Mitōto 62:6-9.) I muswelo’ka otukalonga dino Dibwe dikale kinyemeno kyetu?

¹² Tulamatanga kudi Yehova kitatyi kyotulonda Kinenwa kyandi, kīshilanga divule na tunangu twa bantu. (Mit. 73:23, 24) Kimfwa, bantu balonda tunangu twa bantu babwanya kunena’mba: ‘Enka buno bo būmi bumo kete bodi nabo; pokidi ne mala po pa kwikanya.’ ‘Kimba kaji kayampe.’ ‘Kimba lupeto luvule.’ ‘Pota kyoki ne kyoki.’ ‘Nanga; uyuke ntanda.’ Tunangu twa bwine Leza ato tukwatañene na ano madingi anena’mba: “Boba bakumwenapo byakumwena panopantanda, nabo [bekale] pamo’nka bwa bampikwa kutabuka mu byakumona; ke-muntu mwikadilo wa panopantanda upityidilanga.” (1 Kod. 7:31) Yesu nandi witusoñanya kyaba ne kyaba tutūle tumweno twa Bulopwe pa kifuko kibajinji ne kwibīkila “lupeto luleme momwa mūlu,” mo lukalamwa biyampe.—Mat. 6:19, 20.

13. Shi tuvuluke 1 Yoano 2:15-17, i bipangujo’ka byotufwaninwe kwiipangula?

¹³ Le mwikadila obe pa bitala “panopantanda” ne “byapanopantanda bīne” ulombola’mba ukulupile Leza ne pa mfulo? (1 Yoa. 2:15-17) Lelo wabilanga bupeta bwa ku mushipiditu ne madyese a mwingilo wa Bulopwe bu adi na mvubu kutabuka bintu bipāna ino ntanda? (Fid. 3:8) Le uloñanga bukomo bwa kulama ‘diso ditōka tō-o’? (Mat. 6:22) Shako Leza kasakangapo wikale na kalengwa nansha kunyema biselwa, nakampata shi udi na kisaka kyolelele. (1 Tem. 5:8) Ino, usakanga bengidi bandi bamukulupile ne pa mfulo—kebakikulupila ino ntanda ya Satana iseka na lufu.—Bah. 13:5.

14-16. Le i muswelo’ka wamwenine bamobamo mu kulama ‘diso ditōka tō-o’ ne kutūla tumweno twa Bulopwe pa kifuko kibajinji?

¹⁴ Tala kimfwa kya Richard ne Ruth, bambutwile ba bana basatu banuke. Richard unena’mba: “Mutyima wami wadi unombolanga amba mfwaninwe kulongela Yehova bintu bivule. Nadi na būmi bufuke ku makasa, ino nadi mona’mba byompa Yehova i pamo enka na byobya bisubuka’ko. Pa kupwa kulombela pa uno mwanda ne kupikula lupeto, tweivwanikile na Ruth amba nkalombe mukulumpe wami wa kaji atyepeje mingilo yami, nshilule kwingila mafuku aná ku yenga—nansha yetu ntanda byoyadi na makambakano a misokwe. Nandi waitabije, nashilula kwingila mungya ino mpangiko mipya kweji ne kweji.” Le pano Richard wivwene namani?

¹⁵ Unena’mba, “bantyibanga mfalanga 20 pa katwa mu yonadi ntambulanga, ino pano ngidi na mafuku makwabo 50 mu mwaka a kushikata na kisaka kyami ne kufundija bana. Namwene muswelo wa kuvudija misunsa ibidi kitatyi kyami kya busapudi, misunsa isatu kibalwa kya bifundwa bya Bible, ne kwikala na biselwa bikatampe mu kipwilo. Kadi byondi na kitatyi kikatampe kya kukwasha bana,  Ruth umonanga kyaba kya kwingila bu pania mukwashi kitatyi ne kitatyi. Nsumininwe kulonga bukomo bwa kulama ino mpangiko.”

¹⁶ Roy ne Petina, pobadi bakidi na mwana umo mwana-mukaji ku njibo, babwenye kutyepeja mingilo yabo ya ku ngitu mwa kwingidila mwingilo wa kitatyi kyonso. “Ñingilanga mafuku asatu ku yenga,” i Roy unena, “Petina nandi mafuku abidi. Twatambile mu njibo mikata, twakashikata mu mityetye, ipēla kulongolola. Twaingile bu pania kumeso kwa kubutula mwana wetu mwana-mulume ne mwana wetu mwana-mukaji, ne ketwajimijepo mutyima wa kwingila’bo. Betu bana pa kutama, twajokela mu mwingilo wa kitatyi kyonso. Kekudipo lupeto lukokeja kufikila pa madyese otweselwe.”

Leka “Ndoe ya Leza” Ilame Mutyima Obe

17. Byoketuyukilepo biketufikila mu būmi, le Bisonekwa bikukankamika namani?

¹⁷ Batwe bonso ketuyukilepo bikokeja kwitufikila kesha, mwanda “kyaba ne mwikadilo wa bu-muntu bikafikila bonso.” (Mus. 9:11) Inoko, kubulwa kuyuka bya kesha kekufwaninwepo kwitubudija ndoe ya mutyima dyalelo, pamo na mubudilwa’yo boba bampikwa mutyima-ntenke utamba ku kupwana na Leza. (Mat. 6:34) Mutumibwa Polo wāsonekele amba: “Kemukizumbazumba, nansha pamo pene; ino mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka. Ino ndoe ya Leza, ya kutabuka ñeni yonso, īkalama mityima yenu, ne kufwatakanya kwenu kwine kumo mudi Kidishitu Yesu.”—Fid. 4:6, 7.

18, 19. Lelo Leza witukankamikanga mu miswelo’ka? Leta kimfwa.

¹⁸ Bana betu bavule badi mu ngikadila ileta matompo i bemwene kutūkija mutyima ne ndoe ya kudi Yehova. Kaka umo unena’mba: “Dokitele umo watompele kuntuyula misunsa mivule ngitabije kwelwa mashi. ‘Kodila amba nkyelwangapo mashi?’ lo lwadi lwandi ‘lwimu.’ Penepo kyaba kikwabo, nalombele Yehova mundamunda, namona ndoe yandi mu mutyima. Neivwene pamo bwa dibwe. Nansha byonadi na bukōke mwanda wa mashi atyepele, nkyabudilwepo bukomo bwa kushintulula senene mungya Bisonekwa bubinga bwa mwimanino wami.”

¹⁹ Leza ubwanya kyaba kimo kwitukwatakanya kupityila ku mwanetu mwitabije witukankamika nansha ku bidibwa bya ku mushipiditu pa kitatyi kifwaninwe. Padi kodi mwivwane tutu nansha kaka unena’mba: “Kino kishinte ye kyonadi nsaka. I bañandikile’kyo’tu ami!” Bine, nansha twikale mu ngikadilo’ka, Yehova ukalombola buswe bwaetuswele shi netu tumukulupile. Ne kadi, twi “mikōko” yandi, nandi i mutūle dijina dyandi potudi.—Mit. 100:3; Yoa. 10:16; Bil. 15:14, 17.

20. Mwanda waka bengidi ba Yehova bakekala na mutyima-ntenke kitatyi kikafika mfulo ya ntanda ya Satana?

²⁰ Mu “difuku dya bukalabale bwa Yehova” dyafwena lubilo, bintu byonso bikulupile ino ntanda ya Satana bikonakanibwa. Nsahabu, ndalama ne bintu bikwabo bya bulēme kebikaletapo mutyima-ntenke nansha patyetye pene. (Zef. 1:18; Nk. 11:4) Kukekala kinyemeno kimo kete, dyetu “Dibwe dya nyeke.” (Is. 26:4) Shi ke pano, tulombolei amba tukulupile mudi Yehova tamba’nka pano na kunangila na kikōkeji mu mashinda andi moloke, na kusapula musapu wandi wa Bulopwe nansha shi tulwa na bujundu ne kukankajibwa, kadi twelei kuzumbazumba kwetu konso kwadi. Shi ulonge bino bintu, nankyo bine “ukekalanga ne mutyima-ntenke, kadi ukatalala nyā, ne moyo wa byamalwa mpika.”—Nk. 1:33.

[Kunshi kwa dyani]

Le Ukokeja Kushintulula?

I muswelo’ka otukokeja kukulupila mudi Leza

• kitatyi kyotutompibwa kulonga bubi?

• kitatyi kyotulwa na bujundu ne kukankajibwa?

• kitatyi kyotuzumbazumba?

[Bipangujo bya Kifundwa]

[Kifwatulo pa paje 15]

Kulamata ku misoñanya ya Leza kutwalanga ku nsangaji

[Kifwatulo pa paje 17]

“Yehova mo mudi dibwe dya nyeke”