“Kitatyi Kitūngwe” Kibafwena

PAMO bwa mupolofeto Habakuka, bana ba bwanga ba Yesu bādi babila masusu apwe. Pa kufundijibwa amba Bulopwe bwa Leza bukapwa myanda ya pano pa ntanda, bāipangula Yesu amba: “Betusapwilepo bidi pakafikanga bino’bi? Lelo kadi ne kyo tukayūkilapo pa kwiya kobe pano [bu Mulopwe] ne pamfulo ya panopantanda i kika le?” (Mateo 24:3) Yesu pa kulondolola, wānene amba enka Yehova Leza ye uyukile kitatyi kine kikaludika Bulopwe pano pa ntanda. (Mateo 24:36; Mako 13:32) Inoko, Yesu ne bakwabo bālombwele mwādi mwa kulungulukila bintu bilomba amba kitatyi kibafwena.—Tala  kapango kadi ku lundyo.

Lelo kwitabijepo amba bino bintu bimwekanga konso dyalelo? Kadi Yesu wālaile amba mwingilo wa bufundiji ukengilwa pano pa ntanda ponso. Wānene amba: “Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.”—Mateo 24:14.

Bine bino byo bilongeka dyalelo. Batumoni ba Yehova bengilanga uno mwingilo. Mu matanda 236, kintu kya Batumoni midiyo isamba ne kupita, basapwilanga bantu byobya bikalonga Bulopwe, kadi bebakwashanga balonde misoñanya myoloke ya Leza, mwine usaka kupwa masusu ne misanshi. Endelela kwifunda bitala Bulopwe bwa Leza, ukamone lukulupilo lwa kwikala mu ntanda yampikwa masusu—nyeke ne nyeke-ke.

[Kapango pa paje 8]

 Bisonekwa Bisambila pa Mafuku a Mfulo

MATEO 24:6, 7; KUSOKWELWA 6:4

• Mavita keamwekele kashā

MATEO 24:7; MAKO 13:8

• Bintenshi bikatampe bya kutenkanya ntanda

• Bimpengele bya nzala

LUKA 21:11; KUSOKWELWA 6:8

• Bipupo bya mbá

MATEO 24:12

• Kujilula kwa bijila kwenda kuvudila’ko

• Buswe bwenda butalala

KUSOKWELWA 11:18

• Kona pano panshi

2 TEMOTE 3:2

• Kusanswa lupeto pakatampe

• Kubulwa kukōkela bambutwile

• Kwisanswa kupitepite kwa muntu mwine

2 TEMOTE 3:3

• Kubulwa lusa lwa bubutule

• Bakubulwa kulekela bakwabo myanda

• Kubulwa kwīfula kwa bantu ba ludingo lonso

• Kubulwa kusanswa bumuntu kubasambakana

2 TEMOTE 3:4

• Kusanswa mazua pakatampe, Leza mpika

2 TEMOTE 3:5

• Ba kwitela bya buzazangi bu Bene Kidishitu

MATEO 24:5, 11; MAKO 13:6

• Kuvula kwa bapolofeto ba bubela

MATEO 24:9; LUKA 21:12

• Kupangwapangwa kwa Bene Kidishitu ba bine

MATEO 24:39

• Bantu bampikwa kuta mutyima ku bidyumu bya mu Bible

[Kifwatulo pa paje 8]

Batumoni ba Yehova bafundijanga bakwabo myanda ya Bulopwe bwa Leza ntanda yonso