Myanda Miyampe Mu Ndimi 500

MU DIVITA dya basivile mu Rwanda, kisumpi kya balamuni kibanyema mu abo mobo, ne kushiya bintu byabo byonso. Inoko, abalonga bukomo bwa kusela makompyuta a ku makasa, ne kwenda nao mu makomponi a balefije. Mwanda waka? Mwanda wa bendelele kwalamuna mabuku esambila pa Bible mu lwabo ludimi lwa Kinyarwanda.

Nsongwakaji umo mu bwikike bwa Kunshi ne Kutunduka kwa Azia au usoneka na kompyuta mu kyolwa kya bufuku, nansha byalwa na bukōke, kyanga, ne kutyibikatyibika kwa mudilo wa nshinga bikalakanya mwingilo wandi wa bwalamuni. Kyafwila i kika? Kupwa mwingilo pa difuku dyoutungilwe kutampwa.

Bano balamuni babadilwa mu kibumbo kya bengidi ba kwituma kintu kya 2 300 bengila mu bifuko 190 kujokoloka ntanda. Badi na myaka tamba ku 20 kutūla ne ku 90, kadi i bepāne ne mutyima onso amba bantu batange mu ndimi 500 musapu usenga utanwa mu Bible.—Kusokwelwa 7:9.

Kufikila Bantu ba Ndimi Mishileshile

Mu ino myaka, mwingilo wa bwalamuni wa Batumoni ba Yehova i mutandabuke mu muswelo utulumukwa. Kimfwa, mu 1985, Kiteba kya Mulami kyadi kilupulwa kya pamo mu ndimi 23—kintu kya kwanwa mu kine kitatyi’kya. Ino dyalelo, Kiteba kya Mulami kitanwa mu ndimi 176, kadi manimelo onso alupulwanga kya pamo amba batangi ba ntanda yonso bamone kwifunda myanda idi’mo mu kitatyi kimo kyonka.

Kiteba kya Mulami dyo dipepala dimo kete dilupuka kitatyi ne kitatyi mu kintu kya ndimi 50. Mwanda waka? Mwanda bitampilo bya makompani a bansunga kebisakilepo kulupula bitabo mu ino ndimi. Ino Batumoni ba Yehova ntanda yonso baletanga byabuntu byabo na mutyima tō mwa kudingakenya amba Kinenwa kya Leza ne mabuku esambila pa Bible afike ne kokwa kudi bisakibwa.—2 Kodinda 8:14.

Bantu bamonanga musapu wa mu Bible na mvubu shi udi mu lwabo ludimi. Kimfwa, mabuku esambila pa Bible ashilwile kulupulwa mu Miskito, ludimi lunenwa na bantu kubwipi kwa 200 000 mu Nikaragua. Lolo umo walombele Dibuku Dyami dya Mānga ya mu Bible * mu Miskito, ne pashitele wabo watanwa pobadi bamupa’dyo. Pa kumona dino dibuku diyampe, pashitele walomba bamupe’dyo. Lolo’wa wapela nadyo nansha byasakile pashitele kumushinta’dyo ku makilo 20 a miseke ya kafe!

Mu myaka makumi kunyuma, mabuku  esambila pa Bible aalamwinwe mu makumi a ndimi ya bene kibundi ba mu Mexiko, kubadila’mo ne ludimi lwa Maya, lwa Nahuatl, ne lwa Tzotzil. Mu bula bwa myaka munshi mwa dikumi, bipwilo bya Batumoni ba Yehova bya ludimi lwa tumama lwa bene kibundi byelundile’ko mu ntanda’i kutamba pa 72 kutūla ku 1 200 ne musubu. Batumoni ba Yehova bakunanga musapu wa mu Bible mu mityima ya bantu, ino balekanga Leza mwine ashipukije nkunwa yobakuna.—1 Kodinda 3:5-7.

Bwalamuni bwa Bible mu Ano Mafuku mu Ndimi 80

Mu ino myaka, Batumoni ba Yehova i bengile bikomo mwanda wa kulupula Bible Les Saintes Écritures — Traduction du monde nouveau mu ndimi 80, Bible mutuntulu nansha kipindi. Bantu i banene’po bika? Kamoni umo wa Kunshi kwa Afrika wisambila pa Bible wa mu ludimi lwa Tswana amba: “I kingidilwa kilumbuluke mpata. Kikankwasha kwivwanija Kinenwa kya Leza ne kwikisangela mpata. Muneneno udi’mo i upēla kutanga kadi utobala.” Mutangi wa ludimi lwa Tsonga mu Mozambike usoneka amba: “Nansha shi tudi na mabuku onso esambila pa Bible, ino Bible mpika, i pamo bwa mikungulo ne mapeni ino mvula kunoka mpika! Eyo, kulupulwa kwa Traduction du monde nouveau mu Tsonga kyo kinya kya mvula kyenyakwile panshi.”

Na bubine, boba balamuna ne kwabanya myanda miyampe idi mu Bible bafikidijanga bupolofeto bwa kala mu muswelo utulumukwa. Yesu Kidishitu aye mwine wānene amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.”—Mateo 24:14, MB.

[Kunshi kwa dyani]

[Tabulo pa paje 30]

(Pa kuyukila’ko bikwabo, tala dibuku)

TRADUCTION DU MONDE NOUVEAU

Mutuntulu nansha kipindi

1950 1*

1970 7*

1990 13*

2000 36*

2010 80*

MABUKU MAKWABO

1950 88*

1960 125*

1970 165*

1980 190*

1990 200*

2010 500*

*BUVULE BWA NDIMI

 [Bifwatulo pa paje 29, 30]

Kintu kya bengidi ba kwituma 2 300 balamunanga mabuku esambila pa Bible mu ndimi 500

BÉNIN

SLOVENI

EFIOPYA

BELETANYE