Bubela Bumo Butwala ku Bukwabo

“DYUMUKAI.” Mo mwāsonekele mutumibwa Polo ku Bene Kidishitu bādi’ko kubwipi na pa bukata bwa myaka katwa kabajinji K.K. Le wēbadyumwine ku bika? “Mwanda wa kunena’mba wakemukwata bu-misungi ku byamanwa byandi, ne kyongo kyampikwa kwendelamo, monka mwikadile bisela bya bantu.”—Kolose 2:8.

Nansha byēbadyumwine Polo, mu bukata bwa myaka katwa ka bubidi K.K., Bene Kidishitu bamo bāshilwile kusela milangwe ya bafilozofe ba kala mwanda wa kushintulula nkulupilo yabo. Mwanda waka? Mwanda bādi bakimba kwitabijibwa na bantu bafunde ba Umbikalo wa Loma ne kwalamuna bavule.

Justin Martyr, umo wa mu bano Bene Kidishitu batumbe bininge, wādi ukulupile amba Musedi wa myanda wa Leza wēsokwele ku bafilozofe Bangidiki kumeso kwa kwiya kwa Yesu. Mungya Justin ne bafundiji bakwabo ba milangwe na ino, kukuja filozofi ne bwifundi bwa mfumo ku Bwine Kidishitu ko kwalengeja uno mutōtelo wikale na bubine ke wa ntanda yonso.

Bwine Kidishitu bwa Justin Martyr bo bwābwenye kwalamuna bantu bavule. Inoko, kwitabijibwa kwa bubela bumo kwādi kutwala ku kubunda bubela bukwabo ne mfulo mfulō bālupula kyokya kitabijibwe na bavule dyalelo bu lufundijo lwa Bwine Kidishitu. Pa kubepulula buno bubela, tudingakanye byobya binena mabuku matumbe na bine bifundija Bible.

[Kifwatulo pa paje 3]

[Kutambile Bifwatulo pa paje 3]

Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence