Kipwilo Kiyampe Kifundija Kulēmeka Kinenwa kya Leza

YESU wākankamikile bantu kulēmeka Bible, Kinenwa kya Leza. Kino i kimweke mu muswelo waādi ulondolola kitatyi kyāmutompele Dyabola. (Mateo 4:4-11) Kimfwa, le Yesu wālongele namani pāmunene Dyabola alamune mabwe amo ke mikate? Yesu wāpelele dino ditompo na kutela binenwa bya Mosesa bya ku bukomo bwa mushipiditu bitanwa mu Kupituluka 8:3. Kadi Dyabola pa kumulombola Yesu malopwe onso a ntanda ne kumunena amba amufukatyile pa kumupa’o, le Yesu wālondolwele namani? Wāpelele’o ne kutela musoñanya wa mu Bisonekwa okokeja kutanga mu Kupituluka 6:13.

Langa’po bidi! Yesu nansha byadi Mwanā Leza, wādi unyemena ku Bible pa kufundija. Eyo, kādipo upumpunya Kinenwa kya Leza mwanda wa kubingija milangwe ya bantu. (Yoano 7:16-18) Inoko, bendeji ba bipwilo bavule ba mu mafuku’a kebādipo balēmekele Kinenwa kya Leza pamo bwa Yesu. Mwanda waka? Mwanda bālekele milangwe ya bantu ipite Bisonekwa Bikola bulēme. Yesu aye kāfindilepo bano bendeji ba bipwilo, wēbanene amba: “E mo mupelwila kinenwa kya Leza na bibidiji byenu byashile bakulu. Banwe banzazangi! Nanshi i amo mwemufumikile Isaya amba: ‘Leza unena’mba: “Bano bantu bandemekele’nka ku milomo ino mityima yabo kulampe. Kutota ko bantota i kwa bitupu, Bafundija bijila bya bantu, bu bya Leza.”’”—Mateo 15:6-9, MB.

Bavule mu bipwilo bya ino ntanda, Bene  Kidishitu ne bampikwa kwikala Bene Kidishitu, betelanga amba balēmekele Bible. Inoko, le uyukile bipwilo binga bipelanga mfumo ya bantu poipatanya patōkelela na bufundiji budi mu Kinenwa kya Leza? Teja’tu bidi bimfwa bibidi.

MWANDA: Bitenta bya mu bipwilo.

BIFUNDIJA BIBLE: Yesu wātopekele bendeji ba bipwilo ba mu mafuku’a mwanda bādi betobelwe bitenta ne kukimba ntumbo. Wānene amba bano bantu bādi basenswe “bifuko bya kumeso pa kudya, ne matebe makatampe a ku mpala mu mashinakoka, ne ñimu ya kwimunwa mu manza, ne kusaka kutelwa ku bantu amba: Mufundiji! Mufundiji!” Yesu wāsapwidile bana bandi ba bwanga amba: “Ino bānwe nenu kemukasaka kukatelwa dya bu-mufundiji, mhm, mwanda Mfumwenu i umo enka, aye Kidishitu, nanshi bānwe bonso mudi bāna na bāna. Kadi kemukatela muntu wa panopantanda dya bu-tata, ke-muntu Shenu i umo enka wa momwa mūlu, kete.”—Mateo 23:1-10.

KIPANGUJO: Le bendeji ba kyenu kipwilo baswele kwitwa pa bitenta ne kukimba ntumbo ku bantu, nansha balondanga musoñanya wa Yesu wa kwepuka’byo?

MWANDA: Kwingidija byelekejo mu butōtyi.

BIFUNDIJA BIBLE: “Kokalonga kyelekezyo, nansya tu kimo kifwene na kyokya kidi momwa mulu, kidi pano pansi, nansya mu mema a pansi. Kokefukwilai bano baleza, kokebengidilai.”—Divilu 20:4, 5, BB.

Mutumibwa Yoano wāsonekele Bene Kidishitu amba: “Mwilamei bukalama ku bankishi.”—1 Yoano 5:21.

KIPANGUJO: Lelo kino kipwilo kilondanga musoñanya wa mu Bible wa kwepuka kwingidija byelekejo ne bankishi mu kutōta Leza?

Ukokeja Kusokola Kashinda Koloke

Nansha byokudi tushinda twa bipwilo tuvulevule dyalelo, ukokeja kusokola kashinda kamo katwala ku būmi. Kudi biyukeno bivule bya kuyukila’ko “kipwilo kitōka ne kyampikwa disubi ku meso a Leza.” (Yakoba 1:27, New Revised Standard Version) Bisonekwa byesambilwa’po bino bishinte bikokeja kwikala bu tuyukeno tukulombwelwe tukutwala ku kino kipwilo.

Le ubulwe’po kwipangula Kamoni wa Yehova akushintulwile malondololo a bipangujo bipangwilwe mu bino bishinte? Pobandaula byanena, londa kimfwa kiyampe kya bekadi ba mu kibundi kya Belea ba mu myaka katwa kabajinji. Abo pa kupwa kusapwilwa na Polo, bādi “ke basakesake mu bisonekwa mafuku onso mo bukila, mo bukila’mba, shi momo byendele.” (Bilongwa 17:11) Shi ulēmeke Kinenwa kya Leza pamo bwa Bene Belea ne kwifunda’kyo na bupyasakane, nabya ukasokola kashinda katwala ku būmi. Ino kunangila mu kano kashinda i butongi bobe abe mwine.

[Bushintuludi pa paje 9]

Lelo i kipwilo’ka kikankamika bantu befunde Bisonekwa ne kuyuka shi byobefunda’bya i bya bine?