Kipwilo Kiyampe Kifundija Buswe bwa bu Bana na Bana

BIBLE unena amba: “Yewa wampikwa kuswa kayukilepo Leza, mwanda Leza i buswe.” (1 Yoano 4:8, New Catholic Edition of the Holy Bible) Nanshi, kipwilo kiyampe kifwaninwe kufundija buswe bwa bu bana na bana.

Bipwilo bivule bingilanga mwingilo muyampe wa kukwasha babela, banunu ne balanda. Bakankamikanga bantu badi’mo balonde madingi a mutumibwa Yoano wāsonekele amba: “Ino yewa udi ne bintu bya panopantanda, utalanga mwanabo ubudilwe’byo washita pa mutyima wa kanye, lelo penepo lusa lwa Leza lwikele mudi aye namani? Twanwe twana twami, ketukisanswa bwa  ku kanwa konka nansha bwa ku ludimi; poso mu bilongwa bya binebine.”—1 Yoano 3:17, 18.

Lelo bikalanga namani shi mizo ibetambe divita? Le musoñanya wa Leza unena’mba: “Ufwanyinwe kusanswa mukwenu’nka mo wisanshilwe abe mwine” unenwe kulondwa enka mu bitatyi bya ndoe, inoko shi bantu ba politike nansha mulopwe wanena kulwa divita na muzo mukwabo twaleka kulonda musoñanya wa buswe?—Mateo 22:39, MB.

Yesu wānene amba: “Si mwisenswe banwe bene na bene nabya bonso bakayuka amba mwi bami balondi.” (Yoano 13:35, BB) Kitatyi kyolondolola bino bipangujo bilonda’ko, wiipangule amba: ‘Lelo bantu badi mu kino kipwilo basenswe bakwabo kitatyi kyonso mu binenwa ne mu bilongwa?’

MWANDA: Divita.

BIFUNDIJA BIBLE: Yesu wāsoñenye bandi bana ba bwanga amba: “Ami nami nemunena amba: Sanswai ba lufika nenu ne lombelelai ko boba bemupangapanga.”—Mateo 5:44, BB.

Basola pobāile kukwata Yesu, mutumibwa Petelo wāsomwene kya bulwi mwanda wa kumulwija. Inoko Yesu wānena amba: “Someka kipete kyobe mu kikwa kyakyo, mwanda bonso bakusomona kipete bakafwila konka ku kipete.”—Mateo 26:52.

Mutumibwa Yoano wāsonekele amba: “E monka muno mo musokokela bu-bāna ba Leza, ne bu-bāna ba dyabola, yewa wakubulwa kulonga byaboloke kadipo wa Leza, ne wampikwa kusanswa mwanabo nandi mo monka. Ke-muntu uno o mwanda o mwainwene ne kungalwilo kwine’mba; twisanswe bātwe bene na bene, e mo kyendelemo; kepamopo bwa Kena wadi wa yewa mubi, wāipaīle mwanabo, mhm.”—1 Yoano 3:10-12.

KIPANGUJO: Lelo kino kipwilo kikankamikanga bantu badi’mo bende ku divita?

MWANDA: Politike.

BIFUNDIJA BIBLE: Bantu pa kupwa kwimwena bukomo bwa Yesu bwa kulonga bingelengele, bamusakile atwele mu politike. Le wālongele’po namani? “Yesu paayukile’mba basaka kunkwata bambikike bulopwe ku bukomo, wasonsolokela kwa kasuku kandi mu lulu’mwa.”—Yoano 6:15, MB.

Pākwetwe Yesu ne kubepelwa amba uletanga kavutakanya ka politike, wālondolwele amba: “Bulopwe bwami ke bwa ino ntandapo. Shi Bulopwe bwami bwadi bwa ino ntanda, nankyo bengidi bami badi ba kundwila, kutyina amba nakapānwa ku Bayuda. Ino bulopwe bwami kebutambilepo pano pa ntanda.”—Yoano 18:36, English Standard Version.

Yesu pa kulombela Shandi pangala pa bandi bana ba bwanga, wānene amba: “Ami’wa napu kwibapa kinenwa kyobe, ino ayo ino ntanda ibebashikwe, mwanda abo ke ba ino ntandapo, monka ami’wa monkikadile wa ino ntanda.”—Yoano 17:14, New World Translation.

 KIPANGUJO: Lelo kino kipwilo kilondanga kimfwa kya Yesu ne kuleka kwikuja mu politike, nansha shi kulonga namino kwibalengeja bamo ba mu politike bebashikwe?

MWANDA: Mboloji.

BIFUNDIJA BIBLE: Mutumibwa Petelo pa kupwa kumona bantu bampikwa kwikala Bayuda, kadi kutwejibwa kwisao mpwika abaikala ke Bene Kidishitu, wānena’mba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Yakoba wāsonekēle Bene Kidishitu ba mu myaka katwa kabajinji amba: “Bana betu mu kitabizi mudi Mfumwetu Yezu Kristu mutumbe, kemusyalanganyai bantu yeu ne yeu. Tukwate kifwa: Mu kitango kyenu mutwele muntu na kaninga munwe ka olo ne bisandi bikelema, mutwele kadi ne mulanda wa bisandi bifita. Mwalamwine bidi meso kudi yewa uvwele bisandi bikelema, ke mumunena amba: abewa sikata ku kyaba kya buleme. Ino kudi mulanda munene amba: Abe imana kwako, nansya amba: Sikata kunsi kwa kyami kisi. Le nankyo kemubasyalangaya po banwe bene mwenu munda; le ke mudi po bacibi ba mambo na malango makondame?”—Yakoba 2:1-4, BB.

KIPANGUJO: Lelo kino kipwilo kifundijanga amba bantu bonso badi pamo ku meso a Leza ne amba boba badi’mo kebafwaninwepo kwisañuna abo bene mungya lukoba nansha bupeta?

[Bushintuludi pa paje 7]

Lelo i kipwilo’ka kidi na bantu banekenye bijika bya politike, lukoba, bupeta bikalañanya bantu?