3 Wifunde Bubinebine Butala Padi Yesu

“Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.”—Yoano 3:16.

BIKOLEJA I BIKA? Padi bakwabo i bakulombole amba Yesu kadi’kopo. Bakwabo betabije amba wāikele’ko, ino banena’mba wādi muntu bitupu’nka mwikadile bonso ne wāfwile kala kene.

LE UKANEKENYA BINO BIKOLEJA NAMANI? Iula mwanā bwanga Natanela. * Mulunda nandi Fidipa wāmunene amba tubatana Meshiasa—“Yesu wa Nazala, mwana Yosefa.” Inoko Natanela kāitabijepo Fidipa amba mwanda’po’tu wapu kunena. Wāmutentulwile amba: “Lelo kilumbuluke kitambile ku Nazala’ni?” Ino nansha nabya, wāitabije kwenda na Fidipa wāmwityile amba “Iya nanshi umone.” (Yoano 1:43-51) Nobe ukamwena’mo shi wibandawila abe mwine bubinebine butala padi Yesu. Le ukokeja kulonga namani?

Kimba bubinebine bwa mānga ibingija amba Yesu wāikele’ko bine. Jozefu ne Tasite, balembi ba mānga babidi ba mu myaka katwa kabajinji kebādipo Bene Kidishitu. Ibatele Yesu Kidishitu bu muntu wādi’ko. Tasite pa kwisambila pa Nero, Mbikavu Mwine Loma wālambikile Bene Kidishitu amba bo basoka Loma mu 64 K.K., wāsonekele amba: “Mulopwe mbikavu Nero wālambikile lubilo lonka mambo ne kumwesha malwa kitango kya boba bādi kala bashikibwe na bantu, ke Bene Kidishitu kadi. Christus ko kutambile dijina dya [Kidishitu], wāsuswilwe bininge na Pontyusa Pilato, mukatampe wa lupusa mu bubikadi bwa Tyibilusa.”

Mungya binenene balembi bakwabo ba mānga ba mu myaka katwa kabajinji ne ka bubidi padi Yesu ne pa Bene Kidishitu babajinji, dibuku dimo (Encyclopædia Britannica) dya mu 2002 dinena’mba: “Ino mānga ilombola’mba mu myaka ya kala, nansha ke balwana na Bwine Kidishitu bene kebādipo balakana kwikala’ko kwa Yesu, pamo na mokwāikadile lupata lwampikwa kwendela’mo ku mfulo kwa myaka ya katwa ka 18, umbula bwa myaka ya katwa ka 19, ne ku ngalwilo kwa myaka ya katwa ka 20.” Mu 2002, julunale umo (The Wall Street Journal) wanene amba: “Befundi ba Bible bavule, kutalula’mo boba bapela kwikala’ko kwa Leza, i betabije amba Yesu Mwine Nazala i muntu wāikele’ko bine.”

Bandaula bubinga bulombola’mba Yesu wāsangwilwe. Kitatyi kyākwetwe Yesu na balwana, balunda nandi bāmunyemene, ne Petelo  mulunda nandi mwine, pa kukwatwa na moyo, wāmutunine amba kamuyukilepo. (Mateo 26:55, 56, 69-75) Yesu pa kupwa kukwatwa, balondi bandi bāpalakana. (Mateo 26:31) Kupwa, ne kwija mpika, bana bandi ba bwanga beelelela mu mwingilo. Ba Petelo ne Yoano bākemukile na bukankamane kwa muntu mwine wāipaile Yesu. Bana ba bwanga ba Yesu bākankamene, ke basambakanya bufundiji bwandi mu bubikavu bwa Loma, baitabija kwipaibwa kupita’ko kutuna nkulupilo yabo.

Le i bubinga’ka bumo bwālengeje bakankamane namino? Mutumibwa Polo ushintulula mwāsangwidilwe Yesu mu lufu ne “mwāmwekele kudi Kefasa [Petelo], ne kudi badikumi ne babidi.” Polo ubweja’ko amba: “Ebiya wamwekele kudi bāna betu, bakutabuka tutwa tutano pamo’tu kyungwija.” Bavule bāmumwene na meso bādi bakidi bōmi kitatyi kyālembele Polo bino binenwa. (1 Kodinda 15:3-7) Bukamoni’tu bidi bwa muntu umo nansha babidi bwādi bubwanya kunekenya bantu balakana. (Luka 24:1-11) Ino bukamoni bwa bantu tutwa tutano ne musubu i kilomboji kibingija amba Yesu wāsangwilwe bine mu bafu.

LE I KAMWENO’KA KAMWENWA’MO? Boba betabija Yesu ne kumukōkela balekelwanga bubi bwabo ne kwikala na mutyima wa mundamunda utōka. (Mako 2:5-12; 1 Temote 1:19; 1 Petelo 3:16-22) Nansha shi abafu, Yesu ulaile kwibasangula “ku difuku dya mfulo.”—Yoano 6:40.

Shi usaka kuyukila’ko myanda mikwabo, tala dibuku Lelo I Bika Bine Bifundija Bible? * shapita 4, unena’mba “Lelo Yesu Kidishitu I Ani?,” ne shapita 5, unena’mba “Kikūlwa—Kyabuntu Kikatakata kya Leza.”

[Kunshi kwa dyani]

[Kifwatulo pa paje 7]

Pamo bwa Natanela, kimba bubinebine butala padi Yesu