Bamwikeulu—“Bashipiditu Bakwashi”

“Lelo boba bonsololo kebadipo bashipiditu bakwashi, batalwilwe kukwasha boba bakapyana lupandilo’ni?”—BAH. 1:14.

1. Le bisonekwa bya Mateo 18:10 ne Bahebelu 1:14 bitukankamika namani?

 YESU KIDISHITU wādyumwine muntu yense wa kukukaja balondi bandi amba: “Dyumukai kemukapepulula kamo ka totwa tutyetye, amiwa-mwine-muntu, nemunena’mba, bamwikeulu bāto, badi mūlu babandilanga mpala ya Tata udi mūlu.” (Mat. 18:10) Mutumibwa Polo nandi pa kwisambila pa bamwikeulu bayampe, wāsonekele amba: “Lelo boba bonsololo kebadipo bashipiditu bakwashi, batalwilwe kukwasha boba bakapyana lupandilo’ni?” (Bah. 1:14) Bino binenwa bileta kikulupiji kikankamika amba Leza wingidijanga bipangwa bya mūlu mwanda wa kukwasha bantu. Le i bika binena Bible pa bamwikeulu? Lelo betukwashanga namani? Le i bika byotukokeja kwifundila kobadi?

2, 3. Lelo i mingilo’ka imoimo ingilanga bipangwa bya ku mushipiditu bidi mūlu?

² Mūlu, mudi bamwikeulu bavule ba kikōkeji. Bonso’ba i “ba bukomo bukatakata, bafikijanga mwanda wandi.” (Mit. 103:20; tanga Kusokwelwa 5:11.) Bano bana ba ku mushipiditu ba Leza badi na bumuntu, ngikadilo ya Leza, ne bwanapabo bwa kutonga. I balongololwe mungya bitenta, ne badi na bifuko bya peulu mu mpango ya Leza, Mikele ye mwikeulu mukatampe (dijina dya Yesu momwa mūlu). (Dan. 10:13; Yude 9) Uno “umbedi wa byonso byakupangibwa” i “Mwanda,” nansha Musedi wa myanda wa Leza ne Yehova wāmwingidije pa kupanga bintu bikwabo.—Kol. 1:15-17; Yoa. 1:1-3.

³ Kupwa uno mwikeulu mukatampe kubaiya baselafimi, batendela buujila bwa Yehova ne kukwasha bantu bandi balame butōki bwa ku mushipiditu. Kudi kadi ne bakelubi, bakwatakanya bukatakata bwandi. (Ngal. 3:24; Is. 6:1-3, 6, 7) Bamwikeulu bakwabo, mikendi, bengilanga mingilo palapala pobavuija kiswa-mutyima kya Leza.—Bah. 12:22, 23.

4. Le bamwikeulu bālongele namani paadilwe byalwilo bya ntanda, ne kwingidija senene bwanapabo bwa kutonga kwadi kwa kuletela bantu bika?

⁴ Bamwikeulu bonso basepelele ‘paalwilwe byalwilo bya ntanda’ ne kusangela mingilo  yabo padi penda panengela kino kīkalo kya bantu. (Yoba 38:4, 7) Yehova wāpangile muntu na kumwikija “patyetye ku bamwikeulu” inoko mu “kyelekejo” kyandi, amba bantu balombole ngikadilo miyampe ya Umpangi wabo. (Bah. 2:7; Ngal. 1:26) Ba Adama ne Eva, shi bāingidije mobifwaninwe bwanapabo bwa kutonga, longa abo ne bana babo i basangele būmi mu paladisa bu bana ba mu kisaka kya Yehova kya bipangwa bya ñeni.

5, 6. Le i butomboki’ka bwāikele’ko mūlu, ne Leza wālongele’po namani?

⁵ Na bubine, bamwikeulu bakola ye bano bāfityilwe pa kumona butomboki bushilula mu njibo ya Leza. Umo umbukata mwabo wādi kakisangela kutendela Yehova, ino wādi kaabila kutōtwa. Welonga aye mwine ke Satana (ko kunena’mba “Kinkwa”) pa kulwa bubikadi boloke bwa Yehova ne pa kukimba kutūla’ko nandi bubikadi bwa lwana. Satana pa kubepa bubela bubajinji, wāongwele na bunwanwa ba mulume ne mukaji babajinji belunge ku butomboki bwa kutombokela Umpangi wabo wa buswe.—Ngal. 3:4, 5; Yoa. 8:44.

⁶ Yehova wapelakana kutyibila Satana mambo na kuleta bupolofeto bubajinji mu Bible amba: “Nkabikanga nshikani padi abe ne padi mwana-mukaji, kadi ne ntundu yobe ne yandi; aye ukakusanshija ku mutwe obe, nobe ukamusanshija ku kapondo kandi.” (Ngal. 3:15) Nshikani yādi ya kwendelela pa bukata bwa Satana ne “mwana-mukaji” wa Leza. Eyo, Yehova umwene bulongolodi bwa mūlu bwa bipangwa bya ku mushipiditu bya kikōkeji bu mukajandi muswe ulamete kudi aye Mulumyandi. Buno bupolofeto bwāletele kyalwilo kikulupija, inoko myanda mivule kyādi kikidi “kifibwe” kikola kyāsokwelwe bityebitye. Leza wākwete’ko mpango amba muntu umo wa mu kipindi kya mūlu kya bulongolodi bwandi ukasanshija bantomboki bonso ne kupityila kwadi ‘bintu byonso bya mūlu ne bya pano panshi’ bibungakanibwe.—Ef. 1:8-10.

7. Bamwikeulu bamo bālongele bika mu myaka ya Noa, ne i bika byālupukile’ko?

⁷ Mu myaka ya Noa, bamwikeulu bavule “bashīle mu kīkalo kya abo bene” ne kuvwala imbidi ya mashi ne mema mwanda kulondalonda bya kwisangaja pano pa ntanda. (Yude 6; Ngal. 6:1-4) Yehova wāelele bano bantomboki mu fukutu ya malwa, ne kwilunga belunga na Satana ke “bibumbo bya bushipiditu bya bubi” ne balwana ba mu meso fututu ba bengidi ba Leza.—Ef. 6:11-13; 2 Pet. 2:4.

Le Bamwikeulu Betukwashanga Namani?

8, 9. Le Yehova wāingidije namani bamwikeulu pa kukwasha bantu?

⁸ Abalahama, Yakoba, Mosesa, Yoshua, Isaya, Danyele, Yesu, Petelo, Yoano, ne Polo babadilwa mu bantu bākwashibwe na bamwikeulu. Bamwikeulu bayampe bāfikidije butyibi bwa Leza ne kutwala bupolofeto ne bwendeji, kubadila’mo ne Bijila bya Mosesa. (2 Bal. 19:35; Dan. 10:5, 11, 14; Bil. 7:53; Kus. 1:1) Pano byotudi na Kinenwa kya Leza kituntulu, bamwikeulu bakokeja kuleka kuleta musapu wa Leza kotudi. (2 Tem. 3:16, 17) Inoko, abo kumweka mpika, bamwikeulu bengilanga bininge mu kufikidija kiswa-mutyima kya Leza ne kukwatakanya bengidi bandi.

⁹ Bible witukulupija amba: “Mwikeulu wa Yehova webēla umbukata bwa nsakwa boba bamwakaminwe, webanyongolola.” (Mit. 34:7; 91:11) Yehova ulekanga Satana alete matompo a miswelo yonso potudi mwanda wa batwe tulombole bululame. (Luka 21:16-19) Inoko, Leza uyukile pafudile bukomo bwetu bwa kūminina matompo ne motwikadile na bululame kwadi. (Tanga 1 Kodinda 10:13.) Bamwikeulu batele mutyima wa kwitukwasha mungya kiswa-mutyima kya Leza. Bāpandije Shadelake, Meshake, Abedenengo, Danyele, ne Petelo inoko kebākingilepo Shitevani ne Yakoba ku kwipaibwa  na balwana. (Dan. 3:17, 18, 28; 6:22; Bil. 7:59, 60; 12:1-3, 7, 11) Ngikadilo ne myanda yādi mishileshile. Mo monka ne banabetu bamo bāipailwe mu makomponi a malwa a Nazi, ino Yehova wāta mutyima wa kupandija bavule umbukata mwabo.

10. Kutentekela pa bukwashi bwa bamwikeulu, i bukwashi’ka bukwabo botukokeja kupebwa?

¹⁰ Bisonekwa kebifundijangapo amba muntu ne muntu pano panshi udi na mwikeulu umo wa kumulama. Tukulupile amba “wivwane tulombe kintu, shi kika, shi kika, monka muswidile mutyima wandi, nankyo [Leza] witwivwana.” (1 Yoa. 5:14) I amo, Yehova ukokeja kutuma mwikeulu etukwashe, inoko bukwashi bukokeja kwiya mu miswelo mishileshile. Banabetu Bene Kidishitu babwanya kwitukwasha ne kwitusenga. Leza ukokeja kwitupa ñeni ne mutyima mukomo mwa kulwila na “mwiba mu ngitu” witusansa pamo bwa “mukendi wa Satana” witukupila.—2 Kod. 12:7-10; 1 Tes. 5:14.

Kwiula Yesu

11. Le bamwikeulu bāingidijibwe namani pa kukwasha Yesu, ne Yesu wālombwele bika pa kulama kikōkeji kudi Leza?

¹¹ Tala muswelo wāingidije Yehova bamwikeulu pa bitala Yesu. Bāsapwile kubutulwa ne kusanguka kwandi, kadi bamukwasha ne paādi pano pa ntanda. Bamwikeulu bādi babwanya kumukinga kutyina wakakwatwa ne kwipaibwa byamalwa. Inoko na bubine, mwikeulu umo wātuminwe kumukankamika. (Mat. 28:5, 6; Luka 2:8-11; 22:43) Mungya mpango ya Yehova, Yesu wāfwile lufu lwa bu kitapwa ne kuleta bubinga bwa amba muntu mubwaninine ukokeja kulama bululame kudi Leza nansha ke mu matompo makomo kutabuka. O mwanda Yehova wāsangwidile Yesu ku būmi bwa kubulwa kufwa momwa mūlu, ne kumupa “lupusa lonsololo” amba bamwikeulu bamukōkele. (Mat. 28:18; Bil. 2:32; 1 Pet. 3:22) Mu uno muswelo, Yesu wēlombwele bu kipindi kibajinji kya “lukunwa” lwa “mwana-mukaji” wa Leza.—Ngal. 3:15; Ngat. 3:16.

12. Le tukeula namani bujalale bwa Yesu namani?

¹² Yesu wāyukile amba i bibi kutompa Yehova na kukimba bamwikeulu bāye bamunyongolole patūla būmi bwandi mu kyaka bya bitupubitupu. (Tanga Mateo 4:5-7.) Nanshi twiulei kimfwa kya Yesu na “kwikala bakwilemeka senene,” pampikwa kwitūla mu kyaka bya bitupubitupu, inoko batyumwina umanwi kupangwapangwa na kikulupiji.—Tet. 2:12.

Ñeni Yotuboila ku Bamwikeulu ba Kikōkeji

13. Le i ñeni’ka yotuboila ku bamwikeulu bayampe batelelwe mu 2 Petelo 2:9-11?

¹³ Mutumibwa Petelo pa kutopeka boba ‘babenga’ bengidi ba Yehova bashingwe māni, wātela kimfwa kilumbuluke kya bamwikeulu bayampe. Nansha byobadi na bukomo, ino bekakanga na kwityepeja kebajingululañanangapo “mu meso a Mfumwetu.”  (Tanga 2 Petelo 2:9-11.) Shi ke pano, tulekei kujingululajingulula, boba bapelwe kutala kipwilo, ne kushila Yehova, Mutyibi Mukatampe, myanda.—Loma 12:18, 19; Bah. 13:17.

14. Le i bimfwa’ka bya kwityepeja mu mwingilo bitushidile bamwikeulu?

¹⁴ Bamwikeulu ba Yehova betupanga kimfwa kilumbuluke kya kwityepeja mu mwingilo. Bamwikeulu bamo bāpelele kulombola bantu majina abo. (Ngal. 32:29; Bat. 13:17, 18) Nansha byokudi bipangwa bya ku mushipiditu tununu ne tununu mūlu ino Bible utela enka dijina dya Mikaele ne Ngabudyele. Kino kitukwasha tuleke kupa bamwikeulu bulēme bwampikwa kufwaninwe. (Luka 1:26; Kus. 12:7) Mutumibwa Yoano wāfukamine kutōta mwikeulu, nandi wāmudyumuna’mba: “Kokikolwa; ami nami ne umpika mukwenu pamo nābe, ne bāna benu.” (Kus. 22:8, 9) Tufwaninwe kutōta ne kulombela enka Leza kete.—Tanga Mateo 4:8-10.

15. Le bamwikeulu i betushile kimfwa’ka kya kitūkijetyima?

¹⁵ Kadi bamwikeulu i betushile kimfwa kya kitūkijetyima. Nansha byobasakidile bininge kuyuka bifibwe bikola bya Leza, ino kebasokwedilwe’byopo. Bible unena’mba: “Bino bintu bino’bi ne bamwikeulu nabo basakanga nabo kujingululamo.” (1 Pet. 1:12) Le penepa baloñanga namani? Belaijanga na kitūkijetyima kufika’nka ne pa kitatyi kitungile Leza kya ‘kuyukija pa kipwilo’ “tunangu tonso twa Leza twa miswelo ne miswelo.”—Ef. 3:10, 11, MB.

16. Le mwiendelejo wetu utala namani bamwikeulu?

¹⁶ Bene Kidishitu batanwa na matompo i ‘kizuilo ku bamwikeulu.’ (1 Kod. 4:9) Bamwikeulu babandilanga bilongwa byetu bya kikōkeji na kuloelelwa kukatampe ne kusangala shi kipya-mambo wesāsa. (Luka 15:10) Mwiendelejo wa bwine Leza wa bana-bakaji Bene Kidishitu utalwanga na bamwikeulu. Bible ulombola amba “pano ponka, pāfwaninwe mwana-mukaji kwikala ne kiyūkeno kya lupusa pa mutwe wandi, mwanda wa bamwikeulu.” (1 Kod. 11:3, 10) Bine, bamwikeulu basangalanga pobamona bana-bakaji Bene Kidishitu ne bengidi bonso ba pano panshi bakōkela ndudi ya kiteokratike ne ya bumutwe. Kikōkeji kya uno muswelo i  kivulujo kifike’po ku bano bana ba Leza ba mūlu.

Bamwikeulu Bakwatakanyanga na Kininga Mwingilo wa Kusapula

17, 18. Mwanda waka tunena’mba bamwikeulu bakwatakanyanga mwingilo wa busapudi?

¹⁷ Bamwikeulu bengilanga mu binkumenkume bilongeka mu “difuku dya Mfumwetu.” Mu bino binkumenkume, mudi ne kubutulwa kwa Bulopwe mu 1914, ne kwelwa panshi kwa Satana ne bademona bandi na “Mikele ne bamwikeulu bandi.” (Kus. 1:10; 11:15; 12:5-9) Mutumibwa Yoano wāmwene “mwikeulu mukwabo wipapa umbukata mwa mūlu, wa myanda-miyampe ya nyeke ya kusapwila bēkele panopantanda.” Waela diwi dikatampe amba: “Akamwai Leza mumutumbike ntumbo; ke-kintu kitatyi kya kidye kyandi kibafika; mutotei wāpangile diulu, ne ntanda, ne mema, ne pansulo pa mema.” (Kus. 14:6, 7) Bengidi ba Yehova bakulupile kukwashibwa ne bamwikeulu pobasapula myanda miyampe ya Bulopwe bushimikilwe nansha bibalwa Dyabola bisansa mutyima.—Kus. 12:13, 17.

¹⁸ Dyalelo bamwikeulu kebetutwalangapo ku bantu ba mityima myoloke na kwitunena na diwi na mobānenene Fidipa ne kumuludika kudi ntungu mwine Efiopya. (Bil. 8:26-29) Inoko, myanda mivule imweka dyalelo ilombola amba bamwikeulu bakwatakanyanga mwingilo wetu wa kusapula Bulopwe ne kwituludika ku bantu “batongelwemo kala umbūmi bwa nyeke na nyeke baitabija.” * (Bil. 13:48) Bine, i kya kamweno kutambila mu mwingilo kitatyi ne kitatyi mwanda wa kuvuija’mo kipindi kyetu kya kusokola boba basaka kutōta “Tata mu Mushipiditu ne binebine ponka.”—Yoa. 4:23, 24.

19, 20. Lelo i binkumenkume’ka bya “pamfulo pene pa panopantanda” bingila’mo bamwikeulu?

¹⁹ Yesu wēsambile pa ano etu mafuku amba, “pamfulo pene pa panopantanda” bamwikeulu “bakataluka kusansanya babi badi mubukata mwa boloke.” (Mat. 13:37-43, 49) Bamwikeulu bengilanga mwingilo mukatmape mu kukongakanya kwa mfulo ne kutūla biyukeno pa bashingwe māni. (Tanga Mateo 24:31; Kus. 7:1-3) Pakwabo kadi, Yesu wiyanga na bamwikeulu ‘kukalañanya mikōko umbambuji.’—Mat. 25:31-33, 46.

²⁰ “Pa kusokoka kwa Mfumwetu Yesu momwa mūlu, ne bamwikeulu ba bulobo bwandi,” boba bonso “bampikwa kuyūka Leza, ne ku boba bampikwa kukōkela myanda-miyampe ya Mfumwetu Yesu” bakonakanibwa. (2 Tes. 1:6-10) Yoano pa kumona kino kinkumenkume kimo kyonka, ulombola Yesu ne bibumbo bya mūlu bya bamwikeulu benda pa tubalwe tutōka mwanda wa kukatamba divita dya boloke.—Kus. 19:11-14.

21. Le i bika bikalonga mwikeulu “wa lufungulo lwa lupongo’lwa, ne lukano lukatampe byamalwa ku kuboko kwandi” padi Satana ne bademona bandi?

²¹ Kadi Yoano wāmwene “mwikeulu utūka mūlu, wa lufungulo lwa lupongo’lwa, ne lukano lukatampe byamalwa ku kuboko kwandi.” Uno ke ungipo, i Mikele, mwikeulu mukatampe, usa kukuta Dyabola ne kumwela—pamo ne bademona bandi—mu lupongo. Bakakutululwa bityutyu ku mfulo kwa Myaka Kanunu ya Kidishitu pakatompwa bantu babwaninine matompo a mfulo. Ebiya ku  mfulo, Satana ne bantomboki bonso bakonakanibwa. (Kus. 20:1-3, 7-10; 1 Yoa. 3:8) Kekukekalapo kadi butomboki bwa kutombokela Leza.

22. Bamwikeulu basa kulonga bika mu myanda itutengele kumeso, ne tufwaninwe kulonga namani pa mwingilo wabo?

²² Bunyongolodi bukatampe bwa kunyongololwa mu ngikadilo imbi ya Satana abu kebo bubafwena. Bamwikeulu basa kwingila mwingilo mukatampe mu binkumenkume bya mfulo bya kubingija bubikadi bwa Yehova ne kufikidija ne pa mfulo mpango yandi itala bantu ne ntanda. Na bubine bamwikeulu bayampe i “bashipiditu bakwashi, batalwilwe kukwasha boba bakapyana lupandilo.” Shi ke pano, tufwijei’ko Yehova Leza mu muswelo wāingidija bamwikeulu kwitukwasha tulonge kiswa-mutyima kyandi ne kukamona būmi bwa nyeke ne nyekeke.

[Kunshi kwa dyani]

Le Usa Kulondolola Namani?

• Lelo bipangwa bya ku mushipiditu bya mūlu i bilongololwe namani?

• I bika byālongele bamwikeulu bamo mu myaka ya Noa?

• Leza i mwingidije namani bamwikeulu mwanda wa kwitukwasha?

• Le bamwikeulu bayampe bengilanga namani mu ano etu mafuku?

[Bipangujo bya Kifundwa]

[Kifwatulo pa paje 22]

Bamwikeulu basangelanga kuvuija kiswa-mutyima kya Leza

Bamwikeulu batele mutyima wa kwitukwasha mungya kiswa-mutyima kya Leza monka mobākwashije Danyele

[Kifwatulo pa paje 25]

Kankamanai, mwanda bamwikeulu bakwatakanyanga mwingilo wa kusapula Bulopwe!

[Kutambile Kifwatulo]

Ntanda: NASA photo