Pano Tudi mu Myaka ya Malwa

BIBLE wālaile amba bantu bakekalanga mu “myaka ya malwa.” Utela kino kitatyi bu “mafuku a kumfulo.” (2 Temote 3:1-5; 2 Petelo 3:3-7) Yesu Kidishitu nandi wēsambile pa kino kitatyi pa kulondolola bandi bana ba bwanga pa mwanda utala ‘mfulo ya pano pa ntanda.’ (Mateo 24:3) Lelo ano otudi’mo o mene mafuku a mfulo? Dingakanya byobya byālaile Bible na malapolo a pano pano alombwelwe munshi’mu, ebiya nobe ulombole momwena.

Byobya bilaile Bible: mavita konso—Luka 21:10; Kusokwelwa 6:4.

Binena malapolo a pano pano: “Bantu bafwe ku mavita a mu myaka ya tutwa twa 20 i bavule misunsa isatu kupita’ko bonso bafwile  ku a myaka yonso ya kunyuma, kushilwila ku kubutulwa kwa Kidishitu.” —Worldwatch Institute.

Byobya bilaile Bible: bipupo bya nzala ne bya mbá—Luka 21:11; Kusokwelwa 6:5–8.

Binena malapolo a pano pano: Mu 2004, bantu kintu kya midiyo 863 pano pa ntanda kebadipo na bidibwa bibwane, ko kunena’mba kudi kwibweja kwa bantu midiyo 7 ne musubu tamba 2003.—Organisation des Nations unies pour l’alimentation et l’agriculture.

Bantu kintu kya mudiyala badi mu bufudile bwa malwa; midiyala 2 ne midiyo 600 kebadipo nansha kwa kusendukila kwine kuyampe; mudiyala umo ne mudiyo kebadipo na mema mayampe a kutoma.—Worldwatch Institute.

Bantu midiyo 500 babela malaria; midiyo 40 badi na SIDA; kupita pa mudiyo 1 ne kipindi bafwile kikofolo kya mushinga mu 2005.—Organisation mondiale de la santé.

Byobya bilaile Bible: konakanya pano panshi—Kusokwelwa 11:18.

Binena malapolo a pano pano: “Bantu i bone ntanda na byobalonga ne kutukija mizo ya bipangwa byūmi.” “Kubwipi kwa mingilo ibidi pa isatu ku ingila bantu mwa kwikadila yonanga ntanda.”—Évaluation des écosystèmes pour le millénaire.

“Luvula lwa ntanda i lonwe na bulembe bulupuka ku lupuinga lwa luvula lobepungila, ne kino kisa kuleta musala ku ntanda.”—NASA, Institut Goddard pour les études spatiales.

Byobya bilaile Bible: busapudi bwa myanda miyampe ya Bulopwe bwa Leza pano pa ntanda ponso—Mateo 24:14; Kusokwelwa 14:6, 7.

Binena malapolo a pano pano: Mu 2007, Batumoni ba Yehova 6 957 854 bapityije mansaa mudiyala umo ne midiyo 400 ne musubu mu kusapula myanda miyampe ya Bulopwe bwa Leza mu matanda 236.—Annuaire des Témoins de Jéhovah 2008.

Pamo’nka na mokilombwedilwe kulu’ku, Bible wālaile kala amba tukevwananga myanda ya bintu bibi, inoko tufwaninwe kulama lukulupilo lwetu. Yesu wēsambile pa ino “myanda-miyampe” ya Bulopwe bwa Leza. Lelo Bulopwe bwa Leza i bika? I bukwatañane namani na lukulupilo lwa mafuku a kumeso lwa bantu? Ne nobe utalwa namani na buno Bulopwe bwa Leza?

[Bushintuludi pa paje 5]

Bible wālaile kala ngikadilo yonso yotumona pano pa ntanda dyalelo