Bipangujo bya Batangi

Lelo Bimpengele bya Ntanda I Mfuto Itamba Kudi Leza?

Leza kengidijangapo bimpengele bya ntanda mwanda wa kufuta bantu mfuto. Kebilongele kashā, ne kakebilongapo nansha dimo. Mwanda waka? Mwanda “Leza i buswe,” pamo na munenena Bible mu 1 Yoano 4:8, BB.

Byonso bilonga Leza, uloñanga’byo na buswe. Buswe kebusanshijangapo muntu pampikwa mwanda, mwanda mungya munenena Bible, “buswe kebulonganga po kibi ku mukwabo.” (Loma 13:10, BB) Mu Yoba 34:12, Bible unena’mba: “I binebine Leza kakalongapo kabi nansha kamo kene.”

I bya bine, mwanda Bible wālaile bimpengele bya mu ano etu mafuku, kimfwa “kutenkana kukatampe kwa nshi.” (Luka 21:11) Ino, Yehova kabwanyapo kulambikwa kyonakanya kyobileta; kidi pamo bwa muntu uletanga misapu ku ladiyo nansha ku televijo pangala pa kimpumpu kisa kupukuma, kabwanyapo kulambikwa kyonakanya kya kimpumpu. Bine, shi ke Lezapo ulengeja masusu atamba ku bimpengele bya ntanda, lelo i ani ulengejanga’byo?

Bible ulombola’mba: “Panopantanda ponsololo pēne palēle mudi yewa umbi,” Satana Dyabola. (1 Yoano 5:19) Aye i ntapañani tamba ne ku ngalwilo kwine kwa bantu kufika ne dyalelo. (Yoano 8:44) Satana umonanga būmi bwa bantu bu bwa bitupu ne amba kebudipo na mvubu. Uludikanga bantu na kwisakila, o mwanda ke kya kutulumukapo shi i mutūle’ko pano pa ntanda ponso ngikadilo ya bintu yendejibwa na mwino nansha na kwisakila. Milongelo ya bintu ya ntanda ya dyalelo italanga kilomo-nyeka masusu asusulwa bantu, ne kino i kifikije ne bantu bampikwa bukomo kwikala mu kyaka, mu byaba mulongeka bimpengele bya kipangila nansha bikolomona bantu. (Efisesa 2:2; 1 Yoano 2:16) Nanshi, makomwa-meso a bantu i malengeje byamalwa bimo bifikila bantu. (Musapudi 8:9) Muswelo’ka?

Bimpengele bivule bifikila bantu i bikolomwena bantu abo bene. Tulete kimfwa, malwa a kivula kikomo kyatetukile pa mema ne kulobeja kibundi kya La Nouvelle Orléans, mu États-Unis, nansha malwa a mobo aonenwe na ntoto ya ngulu yasabikile ya Venezuela. Mu bino bimpengele ne bikwabokwabo bya kipangila, kimfwa bya bivula ne mvula, bikolejanga bininge pa mwanda wa bantu kubulwa kujingulula senene bintu bibajokolokele, bipangwa, myubakakanya, kubulwa kulangila bya kumeso, kubulwa kulonda bidyumu, ne bilubo bya basendwe.

Tutale kimfwa kya kimpengele kimo kya mu bitatyi byālembelwe Bible. Mu mafuku a Yesu, kyamba kimo kyāponene mu kitulumukila ne kwipaya bantu 18. (Luka 13:4) Padi kino kimpengele kyālongekele pa mwanda wa kalengwa ka bantu, mungya “kyaba ne mwikadilo wa bu-muntu,” nansha pa bubinga bonso bubidi—inoko na bubine ke pa mwandapo wa butyibi bwa Leza.—Musapudi 9:11.

Lelo kekwaikelepo kashā bimpengele biletele Leza aye mwine? Bidi’ko shabyo, inoko i bishile na bimpengele bya ntanda nansha byobya bikolomwena muntu aye mwine, mwanda byādi bitonga, byādi na kitungo, ne kadi byādi bilongeka na dimo’tu. Kimfwa, kudi bimfwa bibidi, kya Dilobe dya ntanda yonso dya mu mafuku a mukulutuba Noa, ne kya bonakani bwa bibundi bya Sodoma ne Ngomola mu mafuku a Lota. (Ngalwilo 6:7-9, 13; 18:20-32; 19:24) Butyibi bwa Leza pamo na buno bwākombele bantu babi bampikwa kwisāsa, ino ne kupandija būmi bwa bantu boloke ku meso a Leza.

Kunena na bubine, Yehova Leza udi na muswelo, mutyima, ne na bukomo bwa kupwija masusu onso ne kutalula makambakano onso atamba ku bimpengele bya ntanda. Mitōto 72:12 inenena pa bitala Mulopwe mubikikwe na Leza, Yesu Kidishitu amba: “Ukanyongolola mupando pa kwita; ne balanda ba kubulwa wakwibakwasha.”