Lelo Umonanga Bantu na Mwibamwena Yehova?

“Mwanda wa kunena’mba kwakēkala ne po bikalañanyine ku ngitu; amba byakungitu bīkale kwilela abyo bīne buledi bumo bonka.”—1 KOD. 12:25.

1. Lelo weimvwene namani powadi ukitwelatwela mu paladisa ya ku mushipiditu?

 POTWADI tukitambatamba mu ino ntanda imbi ne kwilunga pamo na bantu ba Yehova, twasangele mpata pa kumona buswe ne kwita mutyima kudi umbukata mwabo. Bine padi kwishila mpata na mwikadilo wa buñumauma, mushikwa, ne n̄uma, bidi mu bantu bendejibwa na Satana! Twi batwele mu paladisa ya ku mushipiditu miyule ndoe ne bumo.—Is. 48:17, 18; 60:18; 65:25.

2. (a) I bika bikokeja kushinta muswelo otumona bakwetu? (b) Tufwaninwe kulonga’po bika?

² Ino mwenda mafuku, twashilula kumona tuto tudi mu banabetu ne kino kyashinta muswelo otwadi twibamona pa mwanda wa kubulwa kubwaninina kwetu. Kubulwa kubwaninina kwetu kubwanya kubaija bilubo bya banabetu pa kyaba kya kutala ngikadilo yabo miyampe ya ku mushipiditu. Twailwa ne kwibamona pamo na mwibamwena Yehova. Shi bibaikala namino, nabya kino kyo kitatyi kyotufwaninwe kubandaula mumweno wetu ne kukwatañanya’o na wa Yehova.—Div. 33:13.

Mumwena Yehova Banabetu

3. Le Bible udingakanyanga kipwilo kya Bwine Kidishitu na kika?

³ Enka na mokisonekelwe mu 1 Kodinda 12:2-26, mutumibwa Polo wādingakenye kipwilo kya Bene Kidishitu bashingwe māni na umbidi mowikadile na “byakungitu bingi.” Enka mwishidile biungo bya ngitu, ne bantu ba mu kipwilo nabo mo monka, badi na ngikadilo ne bwino palapala. Kadi Yehova i mwitabije bano bantu beshileshile. Uswele umo ne umo ne kumuta mutyima. O mwanda, Polo nandi witudingila’mba batwe bonso mu kipwilo tufwaninwe ‘kwilela batwe bene buledi bumo bonka.’ Bibwanya kwikala bikomo ke-pantu ngikadila ya bantu bakwabo ibwanya kwishila na yotudi nayo.

4. Mwanda waka tufwaninwe kulemununa muswelo otumona banabetu?

⁴ Padi tudi enka na mutyima wa kutala bukōkekōke bwa banabetu. Kulonga uno muswelo, kudi pamo bwa kutala foto enka pantu pamo. Inoko Yehova umonanga foto yonso mituntulu. Tubwanya kwikala na mutyima wa kutala enka kintu kyoketusakilepo, ino Yehova utalanga muntu yense mutuntulu, kubadila’mo ne ngikadilo yandi miyampe. Po tulonga bukomo bwa kwiula Yehova, tukwashanga ku kulama buswe ne bumo mu kipwilo.—Ef. 4:1-3; 5:1, 2.

5. Mwanda waka ke kyendele’mopo kufwatakenya bakwetu myanda?

⁵ Yesu wadi uyukile biyampe’mba bantu bambulwa kubwaninina bekalanga divule na mfwatakani. Wāletele madingi amba: “Kemukafwatakenya  bakwenu bingi, nenu nankyo mukafwatakanibwa bingi.” (Mat. 7:1) Pano Yesu kānenepo’mba: “I bibi kufwatakanya”; ino wānene amba: “Kemukafwatakenya bakwenu bingi.” Wādi uyukile amba bavule bādi bamwivwana bādi na kibidiji kya kunenena bakwabo bibi. Lelo netu tudi na kino kibidiji? Shi tudi nakyo, tulongei bukomo bwa kushinta kutyina’mba netu baketufwatakenya bingi. Tunene bidi, le batwe bene twi bāni ba kunenena bibi muntu wingidijibwa na Yehova amba kampanda kafwaninwepo kwikala na madyese nansha kwikala mu kipwilo? Tutu umo ukokeja kwikala na bukōkekōke kampanda, ino shi Yehova mwine ukitabije kumwingidija, lelo i byendele’mo batwe kumupela? (Yoa. 6:44) Le bine twitabije’mba Yehova ye wendejanga bantu bandi, ne amba shi kudi bisakilwa kushinta, ukebishinta mu kitatyi kyatungile aye mwine?—Tanga Loma 14:1-4.

6. Lelo Yehova umonanga bengidi bandi namani?

⁶ Kintu kya kutendelwa kudi Yehova i kino, ukulupile amba Mwine Kidishitu yense ubwanya kukafikila pa bubwaninine mu ntanda impya. Kadi uyukile muswelo obendelele ku mushipiditu. O mwanda kabambilepo diso dyandi enka pa bukōkekōke bwabo bwa ku ngitu. Tutanga mu Mitōto 103:12 amba: “Monka mulepele kutunduka na kushika, e monka mwatundulwila ne kujilula kwetu ko tudi.” Bine, tufwaninwe kumufwija’ko bikata!—Mit. 130:3.

7. I ñeni’ka yotuboila ku muswelo wādi umwene Yehova Davida?

⁷ Bisonekwa bitulombola bukomo bukatampe budi na Yehova bwa kutala biyampe bidi mu muntu. Leza wātelele Davida amba i “mwingidi wami Davida, wadi ulamine bijila byami, ye wadi unonda ne mutyima wandi onso kulonga’nka byobya byoloke mu meso ami.” (1 Bal. 14:8) Bine, tuyukile’mba Davida wālongele bilubo kampanda. Nansha nabya, Yehova wāsakile kubambila meso pa biyampe bya Davida mwanda wāyukile’mba mutyima wandi i moloke.—1 Bil. 29:17.

Mona Banabenu Mwibamwena Yehova

8, 9. (a) Lelo i muswelo’ka otubwanya kwiula Yehova? (b) Tubwanya kwelekeja kino na bika, ne kibwanya kuleta bipa’ka?

⁸ Yehova ubwanya kuyuka bidi mu mityima ya bantu, ino batwe ketubwanyapo kwibiyuka. Buno bo buluji bidi boketufwaninwepo kufwatakenya bakwetu myanda. Ketuyukapo byonso bilanga muntu. Tufwaninwe kulonga bukomo bwa kwiula Yehova na kuleka kutala enka bilubo bya bantu, mwanda bikapwanga. Mwene i biyampe twitungile’ko kitungo kya kumwiula pa uno mwanda? Kulonga namino kuketukwasha twikale mu ndoe na batutu ne bakaka.—Ef. 4:23, 24.

⁹ Tulete kimfwa, shi njibo imo ke myoneke—musaka ke mufyuke, madidisha maladike, palafo nayo isumijanga mema. Bantu bakokeja kutala njibo ne kunena’mba ifwaninwe kupomonwa; mwanda keidi kyaka. Inoko, muntu mukwabo pa kufika’po wamone’yo muswelo ungi. Wamone amba ino njibo ikidi mikomo, ne amba byonekele’ko bikokeja kulongololwa. Wapote njibo’ya, walongolola byadi byoneke’ko ne kwiineñenya. Kupwa, bapityeshinda kebatendela buya bwayo. Lelo netu tubulwepo kulonga pamo bwa uno mukelenge walongolwele njibo? Pa kyaba kya kutala enka bibi bilonga banabetu, mwene i biyampe kujingulula ngikadilo yabo miyampe ne bukomo bobalonga mwanda wa kwendelela ku mushipiditu? Shi tulonga namino, ketukabulwepo kuswa banabetu pangala pa ngikadilo yabo miyampe ya ku mushipiditu, mu kimfwa kya Yehova.—Tanga Bahebelu 6:10.

10. Madingi adi mu Fidipai 2:3, 4 abwanya kwitukwasha namani?

¹⁰ Mutumibwa Polo wāletele madingi etukwasha twikale mu kipwano na bonso mu kipwilo. Wādyumwine Bene Kidishitu amba: “Kemukīlonga, nansha kimo, kya bingojila, nansha kya ntumbo ya bitubitupu, mhm, ino ku mutyima wa bumvubumvu bonso bēkale kulemeka bakwabo pakatampe pene, ne abo bene patyetye, monka mo mwikadile ku muntu, ku muntu. Kemukibangai byonka byenu  bintu wa byandi, wa byandi, ehe, poso ne ku bintu bya bakwenu, au ku bya mukwabo, au ku bya mukwabo.” (Fid. 2:3, 4) Kwityepeja kuketukwasha tumone bakwetu biyampe. Kuta bakwetu mutyima ne kutala biyampe bidi mobadi kuketukwasha twibamone na mwibamwena Yehova.

11. I kushinta’ka kumwekele mu bipwilo bimo?

¹¹ Mu ino myaka, kwendelela kwa bantu mu ino ntanda i kulengeje bantu bavule kuvilukaviluka. Bibundi bivule pano i bishikatwe na bantu ba mu matanda meshileshile. Bamo ba mu bano beni basangelanga bubinebine bwa Bible ne kwilunga mu butōtyi bwa Yehova. I bantu “batambile mu mizo yonso, ne mu bisaka byonso ne mu bantu, ne mu ndimi.” (Kus. 7:9) O mwanda, bipwilo bivule pano kebidi na bantu ba ntanda ne ntanda.

12. I mumweno’ka otufwaninwe kumona bakwetu, ne kino kikokeja kwikala namani bu kikoleja?

¹² O mwanda, padi tusakilwa kuta mutyima mpata ku kulama mumweno mufwaninwe otumona bakwetu. Kino kitulomba kuvuluka madingi a mutumibwa Petelo etunena amba: Mwikale “kuswa banabenu betabije kwampikwa buzazangi, mwisanswei bikatampe banwe bene na bene, ne mutyima wenu onso.” (1 Pet. 1:22, Myanda Miyampe ku Bonso) Kibwanya kwikala kikomo kutamija buswe ne kisanso kya binebine mu kifuko mudi bantu batambe mu matanda palapala. Bishi ne bibidiji bya batōtyi-netu bibwanya kwishila na byetu, pamo ne bitamina byabo, misokwe yabo, ne tubila twabo tubwanya kwishila na twetu. Lelo ukolelwanga kwivwanija mulangilo ne mulongelo wa bamobamo? Nabo babwanya kukolelwa muswelo umo. Nansha nankyo, batwe bonso twibasoñanibwe amba: “Sanswai banabenu betabije [bonso].”—1 Pet. 2:17, MB.

13. Lelo i muswelo’ka otufwaninwe kulemununa milangwe yetu?

¹³ Kisakibwa kwilemununa mu mulangilo pa kusaka’mba tubaijibwe mu buswe na banabetu bonso. (Tanga 2 Kodinda 6:12, 13.) Lelo kebitufikile kunena’mba: “Eyo ke ntondopo bidi, ino’nka . . . ” kupwa ketunenena pa bibidiji bibi bya kabila kampanda? Kulanga uno muswelo kulombola’mba tusakilwa kufundula ntondo ikidi mu malango etu. Tufwaninwe kwiipangula’mba: ‘Lelo noñanga bukomo bwa kwiyuka na bantu ba bibidiji bishile na bya kwetu?’ Kwibandaula kwa uno muswelo kuketukwasha twilemunune mwanda wa kwitabija banabetu ba ntanda yonso ne kwibaswa.

14, 15. (a) I bāni bāshintyile muswelo obādi bamona bakwabo? (b) Lelo tubwanya kwibeula namani?

¹⁴ Bible witupa bimfwa bilumbuluke bya bantu bēlemunwine, kimfwa mutumibwa Petelo. Byaādi Muyuda, kādipo ubwanya kutwela mu njibo ya Mujentaila. Langa’po bidi mwaādi ukokeja kwiivwanina pobāmunene kwenda kwa Konilusa, Mujentaila wampikwa kutwejibwa kwisao! Petelo wāshintyile milangwe yandi, mwanda wāyukile’mba Leza usaka ne bantu ba mizo yonso bekale mu kipwilo kya Bwine Kidishitu. (Bil. 10:9-35) Solo, wāikele ke mutumibwa Polo, wādi ufwaninwe kushinta ne kuleka kufwatakenya bakwabo bibi. Wālombwele mwaādi ushikilwe Bene Kidishitu, amba: “Natabukilemo pakatampe pene kupangapanga kipwilo kya Leza, kwikisalankanya.” Nansha nabya, pāmulemunwine Mfumwetu Yesu, Polo wāshintyile wāfikila enka ne ku kwitabija bwendeji bwa boba baādi upangapanga pa kala.—Ngat. 1:13-20.

¹⁵ Bine, na bukwashi bwa mushipiditu wa Yehova, tubwanya netu kushinta mulangilo wetu. Shi tubamone’mba tudi na mfwatakani nansha mityetye munda mwetu, tulongei bukomo bwa kwiitalula ne “kulama bumo bwa Mushipiditu monka mu kikwatyijo kya kubambakanya kya ndoe.” (Ef. 4:3-6) Bible witukankamika amba: “Ikalai na buswe, yo nungakeno ya buya bwampikwa kakoba.”—Kol. 3:14, Bisonekwa Bitokele.

Twiulei Yehova mu Mwingilo Wetu

16. Lelo Leza udi na mpango’ka pa bantu?

¹⁶ Mutumibwa Polo wāsonekele amba: “Kwa Leza kutupu kulemekwa kwa bantu’mba, yeu ye yeu mhm.” (Loma 2:11) Mpango  ya Yehova i ya kubungila pamo bantu ba mizo yonso mu butōtyi bwandi. (Tanga 1 Temote 2:3, 4.) Pa kino, i mukwate’ko mpangiko amba “myanda-miyampe ya nyeke” isapulwe ku “mizo yonso, ne bisaka byonso, ne ndimi yonso, ne bantu bonso bēne kumo.” (Kus. 14:6) Yesu wānene amba: “Bobwa budimi nabo i panopantanda.” (Mat. 13:38) Lelo bidi na buluji’ka kodi ne ku kisaka kyenu?

17. Lelo i muswelo’ka otukokeja kukwasha bantu ba miswelo yonso?

¹⁷ Ke bonsopo babwanya kwenda kulampe kukatwala musapu wa Bulopwe. Inoko, tubwanya kwikala na bukomo bwa kufikija uno musapu ku bantu badi mu mwaba wetu batambile ku mitamba yonso ya pano pa ntanda. Le tuboyanga mikenga yonso ya kusapwila bantu ba miswelo yonso, pa kyaba kya kusapwila enka boba botusapwilanga nyeke? Lelo ubulwe’po kulonga bukomo bwa kufikila boba kebasapwidilwe?—Loma 15:20, 21.

18. Lelo Yesu wālombwele namani amba wādi utele bantu mutyima?

¹⁸ Yesu wādi na mutyima wa kukwasha bantu bininge. Kādipo usapula enka kuntu kumo. Mānga imo ya mu Bible itulombola’mba “wadi ujokoloka monka umbibundi, ne bikata, ne bityetye.” Ebiya kupwa, “pa kumona bibumbo bya bantu, kadi webakwatyilwa lusa” kaebakwasha.—Mat. 9:35-37.

19, 20. I mu miswelo’ka imo motubwanya kulombola’mba tutele bantu ba mizo yonso mutyima mu kimfwa kya Yehova ne Yesu?

¹⁹ Lelo i mu bika motubwanya kumwiula? Bamo i batonge kukasapwila mu mwaba musapulwanga na dimodimo. Kimfwa mu byaba bya busunga, mu kiwanza kya mityi, pa bishīko bya myotoka, nansha ku mobo kwikalanga kukomo kutwela. Bakwabo nabo baloñanga bukomo bwa kwifunda ludimi lupya mwa kusapwila bantu ba mizo mikwabo badi mu wabo mwaba, nansha boba basapwidilwe kepapite mafuku mavule. Kwifunda mwa kwimwina bano bantu mu lwabo ludimi i muswelo mukwabo wa kulombola amba twibatele mutyima. Shi ketubwanyapo kwifunda ludimi lwa bweni, mwene tukokeja kukankamika boba befunda’lo? Ino ketufwaninwepo kwikala na milangwe mibi nansha kutopeka boba balonga buno bukomo mwanda wa kukasapwila bantu ba ntanda mikwabo. Būmi bwa bantu bonso budi na mvubu ku meso a Leza, netu tufwaninwe kwikala na mumweno umo onka.—Kol. 3:10, 11.

²⁰ Kumona bintu na mwibimwena Leza i ne kusapwila bantu bonso, nansha shi badi mu ngikadilo’ka. Padi bamo kebadipo na mobo, ba busala, nansha badi na būmi bwa disubi. Shi bakwabo kebetutambwilepo biyampe, kino kekifwaninwepo kwitupa milangwe mibi pa muzo nansha kabila kabo konso. Polo wālongelwe bibi na bantu bakwabo, ino kino kekyamulekejepo kusapula ku bantu ba ino ngikadilo. (Bil. 14:5-7, 19-22) Wādi ukulupile amba bantu bamo babwanya kusangela musapu wandi.

21. Lelo kumona bantu na mwibamwena Yehova kukakukwasha mu bika?

²¹ Pano tubayuka patōkelela mumweno mwendele’mo—ke wa Yehova kadi—amba o otusakilwa mwa kwikadila senene na banabetu ba mu kyetu kibundi ne ba ntanda yonso, nansha bantu botutana mu budimi. Ponso potwendelela kumona bintu na mwibimwena Yehova, tukendelela kuleta ndoe ne bumo. Ne tukakwasha bakwetu batendele Yehova, Leza “kabangilepo” amba yeu ye yeu, ino usenswe bonso, “mwanda abo bonso o mwingilo wa andi makasa.”—Yoba 34:19.

Le Ubwanya Kulondolola?

• Le tufwaninwe kwepuka kumona banabetu namani?

• Lelo tukokeja kwiula Yehova namani mu muswelo wa kumona banabetu?

• I bika byowifunda pa muswelo otufwaninwe kumona banabetu ba ntanda yonso?

• I muswelo’ka otubwanya kwiula Yehova mu muswelo otumona bantu botutana mu mwingilo?

[Bipangujo bya Kifundwa]