Lelo Kotutambile I Kwepi?

MWANDA WAKA MALONDOLOLO I A KAMWENO? Bantu bavule balañanga amba būmi pano pa ntanda bwālupukile na mu kitulumukila. Bafundijibwanga amba binkumenkume byampikwa kukunga, bilondakane, byālupwile kupityila ku kwialamuna muzo wa muntu udi na malango, ñeni, ne bukomo bwa kulanga bya ku mushipiditu.

Ino ivwana bidi: Shi bine muzo wa muntu i mutambe ku kwialamuna, ne Umpangi kadi’kopo, nabya bantu badi pamo bwa bana ba nshiye. Kebadipo na kwa kunyemena pa kukimba madingi a tunangu tukatampe—i kutupu wa kwitukwasha kupwija makambakano. Mu uno muswelo, twadi ba kunyemena enka ku tunangu twa bantu pa kusaka kwepuka bimpengele, pa kupwija ñuma ya politike, ne pa kuludikwa mu bikoleja bitutana.

Ino le ulanga amba kuludikwa na muntu kubwanya kuleta ndoe ya mutyima? Shi kekubwanyapo, nabya ivwana bidi uno mulangwe nao. Ao uno ke’nkapo mulangwe mulumbuluke, o mulangwe kadi mwendele’mo.

Byobya Binena Bible

Bible ufundija amba bantu i bapangwe na Leza mwine. Ketutambilepo ku kwialamuna kwa bintu kwa bupofu, ehe. Twi bana ba Tata wa buswe ne wa ñeni. Ivwana bidi munenena’byo Bible patōkelela.

Ngalwilo 1:27. “Enka namino Leza wapanga muntu monka mu bu-kyelekejo kya Leza mwine, i monka mu bu-kyelekejo kya Leza mwine mwāmupangile, webapanga ba-mulume ne mukaji.”

Mitōto 139:14. “Nkakufwijangako; mwanda ami ne kipangwa kya malwa, kya kutendelwa, mīngilo yobe i mitendelwe; kadi kino namino muya wami uyūkile’kyo, senene, shē.”

Mateo 19:4-6. “Lelo kemwatangile pa mwine, webapangile ku ngalwilo, webapangile ba mulume ne mukaji? Kadi amba, po pa mwanda wa kulonga mwana-mulume ukashia shandi, ne inandi mwine, walamatyididila mukajandi, kabidi bubidi bwabo bakēkalanga ke mubidi umo. Nanshi pano ke bakidi ne bubidi bwine ke mubidi’tu umo. I binebine kadi, kyokya kyasambakanya Leza pamo kokakolwa kwikikalañanya, nansha wi muntu ka, nansha wi muntu ka.”

Bilongwa 17:24, 25. “Leza yenka aye wapangile ntanda ne byonso bidi monka, ino aye byādi Mwine momwa mūlu, ne ntanda, kēkalangapo mu mōbo a kulongibwa ku maboko, mhm. Nansha kwingidilwa ku maboko kwa bantu kwine’mba: Nsakeko kakintu; mhm; ke-muntu aye ye Mwine upāna ku bonsololo būmi ne muya ne bintu byonso.”

Kusokwelwa 4:11. “Yō! abe ufwaninwe, Yehova wetu, Leza wetu, kupebwa ntumbo, ne buleme ne bukomo; mwanda wapangile bintu byonsololo, kadi i pa mwanda wa kiswa-mutyima kyobe o byadipo, ne kupangibwa’byo.”

Muswelo Ulondolola Bible Uletanga Ndoe ya Bine ya Mutyima

Kuyuka kotuyukile amba kudi Leza “ko kwainikilwe misaka yonso . . . ya panopanshi” kushintanga mumweno otumona bantu bakwabo. (Efisesa 3:15) Kadi kuyuka kino kwitukwashanga twimone batwe bene ne makambakano etu muswelo mukwabo. Mulangilo wetu wikalanga uno muswelo ulonda’ko.

Kitatyi kyotukwata butyibi bukomo, ketwikalangapo tukambakena kulonda milangwe ya bantu ipatanya. Ino tukulupilanga na mutyima umo madingi a mu Bible. Mwanda waka? Mwanda  “bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi, ne kulombola ñeni ya umboloke; amba muntu wa Leza ēkale umbwanye byonso, ne kulongololwa biyampe senene, shē, mu mīngilo yonso milumbuluke.”—2 Temote 3:16, 17.

I bine, kulonda madingi a mu Bible kulomba kwielela’ko ne kwidingila. Kyaba kimo buludiki bwa Bible bukokeja kwitulomba tulonge bintu bishile na mifwatakanyo yetu. (Ngalwilo 8:21) Inoko shi twitabije amba twapangilwe na Tata wetu wa mūlu wa buswe, nabya ketukakolelwapo kuyuka amba byaetusakila kulonga byo bintu biyampe. (Isaya 55:9) Kinenwa kyandi kitukulupija’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” (Nkindi 3:5, 6) Wivwane tulonde ano madingi, nabya ketukekalapo na njia ponso potutanwa na bikoleja nansha potukwata butyibi kampanda.

Kitatyi kyobetufwatakenya bibi, ketukalemenenwapo na milangwe ya kwityepelwa, ulanga amba ketudipo na mvubu ku meso a bantu ba muzo, musaka, nansha kabila kakwabo. Ino tukekala na bujalale ne na bulēmantu. Mwanda waka? Mwanda Yehova Leza, Tata wetu “kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Kuyuka kino kuketukinga kadi ku kwikala na mfwatakani pa bantu bakwabo. Tukamona amba kekudipo bubinga bwa kwimwena bu bantu bapite ba lukoba lukwabo, mwanda Leza “wasambakenye mizo yonso ya bantu ke mashi amo onka bēkele ku mitamba yonsololo ya panopantanda.”—Bilongwa 17:26.

Na bubine, kuyuka amba twapangilwe na Leza ne amba Umpangi wetu witutele mutyima kyo kyalwilo kya ndoe ya mutyima ya binebine. Ino kudi bikwabo bitusakila pa kwikala na ndoe ya mutyima.

[Kifwatulo pa paje 4]

Le bantu batambile ku kwialamuna?