Kukimba Malondololo

“Pa kupwa kutana malondololo a ‘mwa’ kushikatyila, pano tujokolokelwe na bintu bilumbuluke byoketwadipo tulanga—bingidilwa bitweja luvula mu mobo, byombanwa bya mawi mayampe, ne bidibwa bya bushipo ne buyo—o mwanda tufwaninwe kwiipangula ‘kine’ kyotwikadile’ko. Le kyotufwila i kika? Ne kyotukimba i kika?” —David G. Myers, polofesele wa bwifundi bwa muntu ku Hope College, Holland, Michigan, États-Unis

LELO ubwanya kulondolola namani bino bipangujo bya uno polofesele? Bamo kebamwenepo mvubu ya kwelela kitatyi mu kukimba malondololo. Inoko, kulengwa bino bipangujo kudi pamo bwa kulengwa lubweyele ludi mu bilato byovwele—shako usa kwenda, ino lwendo lobe kelukekalapo lusangaja.

Shi kodi mwiipangule kine kyotwikadile’ko bōmi, nabya yuka amba kudipo bunka bobe. Mungya kitango kya Bwipangudi bwa Mwikadila wa Ntanda, bwifundi bukatampe bwa mwikadile bantu, kibalwa kikande kya bantu ba matanda mavule balangulukilanga pa “buluji ne kitungo kine kikadile’ko būmi.”

Shi ukimba kwikala na ndoe ya mutyima, nabya ufwaninwe kutana malondololo asatu a bino bipangujo.

Lelo kotutambile i kwepi?

I kitungo’ka kine kikadile’ko būmi?

Le i bika bitutengele kumeso?

Le i kwepi kokasokola malondololo akulupilwa a bino bipangujo bya kamweno? Pa kyaba kya kufwikila nansha kulonda mafilozofi, usa kutana mu mapaje alonda’ko malondololo aleta’po Bible, Kinenwa kya Leza. Tukwita upūtule Bible obe ne kwimwena abe mwine byanena.