Lelo Wadi Uyukile Kala?

Lelo kusana kwādi kusana muntu bivwalwa byandi ku kusaka, kwādi kushintulula bika mu bitatyi byāsonekelwe Bible?

BISONEKWA bisambila pa bitatyi bivule byāsanine bantu bivwalwa byabo. Kino kilongwa kibwanya kumweka bu kyeni ku batangi ba mu ano etu mafuku, ino ku Bayuda kyādi kilomboji kya bulanda bukatampe bwādi butamba ku kutyumukwa mutyima, njia, kufwijibwa bumvu, bukalabale, nansha madilo.

Kimfwa, Lubeni wāsanine “bivwalwa byandi” kitatyi kyaāmwene amba mpango ya kunyongolola mwanabo Yosefa ibakankalwa pa mwanda wa Yosefa wāpotolojibwe mu bupika. Shabo Yakoba wāsanine “bivwalwa byandi” kitatyi kyaāfwatakenye’mba Yosefa i musasamunwe na nyema wa ntanda. (Ngo. 37:18-35) Yoba wāsanine “mutwelo wandi” pobāmusapwidile amba bandi bana bonso abafu. (Yoba 1:18-20) Mukendi umo “wa bivwalwa byandi bisanwe” wāendele kudi Edi Kitobo Mukatampe kukamulombola’mba bene Isalela abashindwe mu divita, bana babidi ba Edi abaipaibwa, ne amba dikumbo dya kipwano dibakwatwa. (1 Sa. 4:12-17) Yoshia pa kwivwana binenwa bya mu Mukanda wa Bijila byobādi bamutangila ne kuyuka bilubo bya bantu bandi, “wasana bivwalwa byandi.”—2 Ba. 22:8-13.

Kitatyi kyātompelwe Yesu, Kaifasa Kitobo Mukatampe “wāsana ne mitwelo yandi” pa kwivwana’mba i bamubepele bya bubela amba i muntu utuka Leza. (Mat. 26:59-66) Lufundijo lwa balabi lwādi lufundija’mba, muntu yense wivwana dijina dya Leza ditukwa wādi unenwe kusana bivwalwa byandi. Inoko mulangwe mukwabo wāikele na balabi kupwa kwa konakanibwa kwa tempelo ya Yelusalema i wa amba, “yewa wivwana Dijina dya Leza ditukwa mu ano etu mafuku kafwaninwepo kusana bivwalwa byandi, shi bitupu bivwalwa bya uno muntu bikalomba kwela bilaka.”

Na bubine, kilongwa kya muntu kya kusana bivwalwa kekyādipo na mvubu ku meso a Leza poso shi muntu wādi na njia ya binebine. Mu uno muswelo, Yehova wālombwele bantu bandi ‘basane mityima yabo, ke mitwelo yabopo, ehe, ne kuvundamukila kwadi.’—Yoe. 2:13.