Le Ubwanya Kulonga Bivule Mwanda wa Kudyumuna Bakwenu?

Filime imo yakubulwa binenwa (A Trip Down Market Street), yakokele milangwe ya bantu beitadile mwanda yālombwele mwikadile būmi bwa mu San Francisco, États-Unis, ku ngalwilo kwa myaka 1900. Bantu balongele ino filime bātūdile kamera peulu pa motoka wendanga na nshinga kūlu (téléphérique) ne kutadija kano kamera ku dishinda diyule bantu. Ino filime yalombwele bintu bivule, kimfwa bampunda bakoka makudiye, myotoka ya mu kine kitatyi’kya, muswelo wadi wiya bantu kupota bintu ku mangajini, ne bankasampe babidi bapoteja majulunale badi bendelela kwingila mingilo yabo ya difuku ne difuku.

Bintu byalengeje ino filime ikale ya bulanda, i mafoto akwetwe mu Kweji wa buná 1906, kumeso’tu kwa kutenkana kwa ntanda ne mudilo wātemene mu mafuku 18 Kweji wa buná, obanenanga’mba waipaile bantu tununu na tununu ne konakanya kubwipi kwa kino kipindi kya kibundi. Padi mapala amo adi amweka mu filime adi a bantu bafwile ku kino kimpengele. Scott Miles, umo wa mu kisaka kya bano balongele filime unena amba: “Bantu bonadi mwene pa kine kifuko’kya kebadipo bayukile bintu byadi bya kwibafikila. Kadi kubwanyapo kwibakwasha ino enka kwibevwanina bulanda.”

Padi kukwatañana kukatampe na ano etu mafuku. Netu ketubwanyapo padi kukwasha bakwetu ino enka kwibevwanina bulanda. Bantu bendanga ku mingilo yabo ya difuku ne difuku pampikwa kuyuka kyamalwa kibatengele kumeso​—konakanibwa kwa ngikadilo mibi ya bintu ne būmi bwabo kumo. Inoko, kwishila na kutenkana kwa ntanda kwa mu kitulumukila, kudi mukenga mutyetye wa kudyumuna nyeke bakwetu pa mwanda utala difuku dya butyibi dya Yehova. Bidi pamo’nka na abe wilamija’ko kitatyi yenga ne yenga kya kusapula ku njibo ne njibo, ino le ubwanya kulonga bivule mwanda wa kudyumuna bakwenu?

YESU WĀDI MUVUDILWE BYA KULONGA

Kimfwa kya Yesu kyāmwekele mu kuvudilwa kwaādi uvudilwe bya kulonga. Wādi usapwila muntu yense waādi utana, kimfwa musonkeji wa musonko waātene paādi upita mu dishinda ne mwana-mukaji obetene nandi ku mushimwa paādi witūkija dyuba mu mitwe. (Luka 19:1-5; Yoa. 4:5-10, 21-24) Nansha ke kitatyi kyaādi witūdila’ko mwanda wa kololokwa, Yesu wādi uleka ne mutyima tō bintu byaādi upangile kulonga mwanda wa kufundija bakwabo. Lusa lwaādi wivwanina bakwabo lwāmutonwene ebasapwile bukamoni ne pa mfulo. (Mako 6:30-34) Le i muswelo’ka otubwanya dyalelo kwiula mumweno wādi umwene Yesu kampeja-bukidi ka bitatyi?

 BALONDELONDELE MUKENGA O-ONSO

Melika ushikatanga mu njibo mikatampe ilaminwe na ba lupusa. Balondakani nandi bavule i bana ba masomo ba ntanda ya bweni bengidijanga telefone ya ku makasa kadi kebalembelwepo majina abo ku mukanda wa bakulama ku mulango mukatampe. Wasangedile mukenga wa pa bula waamwene wa kwisamba myanda ya ku mushipiditu na bantu bashikete ku mulango mukatampe ne ku kikwepa. Unena’mba, “kyaba kimo monanga kino kifuko bu wami mwaba.” Melika uselanga mabuku mavule mu ndimi palapala, kadi bantu bavule betabijanga matrakte ne mapepala. Kadi ukokela milangwe yetu pa diteba dya jw.org. Washilwile bifundwa bya Bible bivule.

Sonia nandi utele mutyima ku kusapwila muntu yense wabwanya kusapwila. Wingilanga ku lupitalo lwa dokitele, kadi i mwitungile kitungo kya kusapwila mwingidi-nandi ye-yense. Dibajinji, witūdilanga’ko kitatyi kya kuyuka bisakibwa bya muntu ne muntu ne tumweno twandi. Kupwa, kaesambe na umo ne umo mu kitatyi kya kukōkolokwa mwanda wa kudya bidibwa. Mfulo mfulō, Sonia wabwenye kushilula bifundwa bibidi bya Bible. Kadi wakwete’ko mpangiko ya kwingidija kitatyi kimo kya kukōkolokwa na kushikata pa kibelo kikatampe kya lupitalo mwanda wa kwisamba na bonso batengēle kwimona na muñanga.

KWATAKANYA MIKENGA YOBE

Muntu umo wapandile ku kutenkana kwa ntanda kwa mu 1906, waityile kuno kutenkana bu “kimpengele kibikibi kekyalongekele kashā mu ntanda nansha mu kibundi.” Inoko, kudi bimpengele bidingakene na difuku dya kinongo bisa panopano ponka kufikila “boba bampikwa kuyūka Leza.” (2 Tes. 1:8) Yehova usakanga bantu bashinte milangwe ne mityima yabo kadi betabije musapu wa kidyumu usapulwa na batumoni bandi.​—2 Pet. 3:9; Kus. 14:6, 7.

Udi na dyese dya kupūtula bantu meso mu bitatyi bibi byotudi’mo ne kwibakwasha baleke kukimba tumweno twa kwisakila amba bakimbe Yehova. (Zef. 2:2, 3) Ubulwe’po kukwatakanya mukenga o-onso mwanda wa kusapwila bomwingilanga nabo, balondakani, ne boba botananga kitatyi kyoenda mu mingilo yobe ya bukile bukya? Le ukalonga bivule mwanda wa kudyumuna bakwenu?