Bengidi ba Yehova ba Nsangaji
Bengidi ba Yehova ba Nsangaji
“Kebo ba nsangaji shabo boba beyukile bisakibwa byabo bya ku mushipiditu.”—MATEO 5:3, NW.
1. Lelo nsangaji ya bine i bika, ne ilombola bika ne bika?
NSANGAJI i kituntwa kilēme ku bantu ba Yehova. Davida mulembi wa mitōto wāelele kabobo amba: “Kebo ba nsangaji yabo, shabo, boba bantu ba Leza wabo i Yehova.” (Mitōto 144:15) Nsangaji i mwiivwanino wa kwikala biyampe! Nsangaji mikatakata—itenga ne muntu wetu wa munda mwine—itambanga ku kuyuka kotuyukile amba twi bantu beselwe na Yehova. (Nkindi 10:22) Ino nsangaji ilombola amba tupwene kipwano kya mushike na Tata wetu wa mūlu ne tuyukile amba tuloñanga kiswa-mutyima kyandi. (Mitōto 112:1; 119:1, 2) Ino kintu kisangaja i kino: Yesu wātelele buluji kitema botukokeja kutelelwa bu ba nsangaji. Kubandaula kotusa kubandaula ino itelwa bu nsangaji nansha tutōkwe (dyese) mu kino kishinte ne mu kilonda’ko, kusa kwitukwasha tuyuke nsangaji yotudi nayo potwingidila Yehova, ‘Leza wa nsangaji,’ na kikōkeji.—1 Temote 1:11.
Kwiyuka Bisakibwa bya ku Mushipiditu
2. Yesu wēsambīle pa mwanda utala nsangaji kwepi, ne wāshilwile na binenwa’ka?
2 Mu mwaka wa 31 K.K., Yesu wānene dishikulu dimo dyendele nkumo pi na pi. Ditelwanga bu Busapudi bwa ku Lūlu mwanda Yesu wādi ushikete ku mutamba wa lūlu, utadidile ku Dijiba dya Ngadilea. Evanjile ya Mateo isekununa’mba: “[Yesu] pa kumona bibumbo penepo nandi wākandila ku lūlu; ebiya pa kushikata, bana bandi ba bwanga bāiya kwadi; nandi wāasama kyakanwa kyandi wāshilula kwibafundija’mba: ‘Kebo ba nsangaji shabo boba beyukile bisakibwa byabo bya ku mushipiditu, mwanda bulopwe bwa mūlu i bwabo.’” Binenwa bya ñanjilo bya Yesu shi byalamunwe pa bute pa bute, bitangwa’mba: “Kebo ba nsangaji shabo balanda ku mushipiditu,” nansha amba “Kebo ba nsangaji shabo boba ba lulombo lwa ku mushipiditu.” (Mateo 5:1-3; Kingdom Interlinear; kunshi kwa dyani) Bible Today’s English Version utangwa’mba: “Dyese dyo dyabo boba beyukile amba i balanda ku mushipiditu.”
3. Le mutyima wa kwityepeja witupanga nsangaji namani?
3 Mu mwisambo wandi wa ku lūlu, Yesu wālombwele amba muntu ukamona nsangaji mikatampe shi wiyukile bisakibwa byandi bya ku mushipiditu. Bene Kidishitu ba kwityepeja, beyukile amba i babipya-mambo, balombanga Yehova ebafwile lusa pa kitapwa kya kikūlwa kya Kidishitu. (1 Yoano 1:9) Ne kusokola basokolanga ndoe ya mutyima ne nsangaji ya bine. “Keye wa katōkwe kandi, shandi! yewa wa lekelwa ku kujilula kwandi, ne bupya-mambo bwandi bubajimankanibwa.”—Mitōto 32:1; 119:165.
4. (a) Tukalombola namani amba tuyukile bisakibwa bya ku mushipiditu byetu ne bya bakwetu? (b) I bika bikavudija nsangaji yetu shi twiyukile bisakibwa byetu bya ku mushipiditu?
4 Kwiyuka bisakibwa byetu bya ku mushipiditu kwitutononanga tutange Bible difuku ne difuku ne kudya bidibwa bya ku mushipiditu bileta “umpika wa binebine ne wa manwa” pa “kitatyi kifwaninwe,” ne kutanwa kitatyi ne kitatyi ku kupwila kwa bwine Kidishitu. (Mateo 24:45, NW; Mitōto 1:1, 2; 119:111; Bahebelu 10:25) Buswe botuswele bantu netu bo bwituyukija bisakibwa byabo bya ku mushipiditu, ne kwitupa bupyasakane bwa kusapula ne kufundija myanda miyampe ya Bulopwe. (Mako 13:10; Loma 1:14-16) Nanshi kufundija bakwetu bubinebine bwa mu Bible kuletanga nsangaji. (Bilongwa 20:20, 35) Kadi nsangaji yetu ivulanga ponso potulangulukila pa lukulupilo lwetu lwa kutendelwa lwa Bulopwe ne pa madyese akaleta buno Bulopwe. Ku “kaluombe katyetye” ka bene Kidishitu bashingwe māni, lukulupilo lwabo lwa bulopwe i būmi bwakubulwa kufwa momwa mūlu mu umbikalo wa Bulopwe bwa Kidishitu. (Luka 12:32; 1 Kodinda 15:50, 54) Ino ku “mikōko mikwabo” i būmi bwa nyeke mu paladisa pano pa ntanda mu bwendeji bwa umbikalo wa Bulopwe.—Yoano 10:16; Mitōto 37:11; Mateo 25:34, 46.
Badila Madilo Mobakokeja Kwikadila ba Nsangaji
5. (a) Le binenwa “boba badila madilo” bishintulula namani? (b) Boba badila ano madilo basengibwanga muswelo’ka?
5 Binenwa bya nsangaji ilonda’po byānene Yesu bimweka bu bīpatanya. Wānene amba: “Kebo ba nsangaji yabo boba badila madilo, ke-bantu nabo bakasengibwa biyampe.” (Mateo 5:4, NW) Le muntu ubwanya namani kudila madilo koku kadi wikele wa nsangaji? Pa kwivwanija senene bisaka kunena Yesu, i biyampe tubandaule bidi i madilo’ka aisambila’po. Mwanā bwanga Yakoba ushintulula amba tufwaninwe kudila pangala pa mwikadilo wetu wa bubi. Wāsonekele amba: “Oījai maboko enu bānwe babipya-mambo; mutōkeje ne mityima yenu bānwe ba mityima ībidi. Shotokwai, ne kuyoyokota, ne kudila; tusepo twenu tufulamuke ke miyoa, ne kusepelela kwenu nako kwalamuke fututu ku mutyima. Kadi fwilai bumvu pa mpala ya Mfumwetu, nandi ukemuzunzula.” (Yakoba 4:8-10) Boba bafityilwe mityima pangala pa bubi bwabo basengibwanga pa kuyuka amba bubi bwabo bukokeja kwibalekelwa shi bekale na lwitabijo mu kitapwa kya kikūlwa kya Kidishitu ne shi besāse bya bine ne kulonga kiswa-mutyima kya Yehova. (Yoano 3:16; 2 Kodinda 7:9, 10) O mwanda bakokeja kupwana kipwano kilēme na Yehova ne kwikala na lukulupilo lwa kwikala bōmi nyeke koku bamutendela. Kino kyo kibapanga nsangaji ya mushike munda mwabo.—Loma 4:7, 8.
6. Bamo badilanga mu buluji’ka, ne basengibwanga muswelo’ka?
6 Bino binena bya Yesu bitala ne boba badila mwanda wa bya munyanji bilongeka pano pa ntanda. Yesu aye mwine wētelele bupolofeto bwa Isaya 61:1, 2, bunena’mba: “Mushipiditu wa Mfumwetu Leza udi po ndi; ke-muntu Yehova wanshingile māni kusapwila myanda-miyampe ku bimonyamalwa; wantuma kūndapa ba mityima mityumuke, ne . . . kusenga bonsololo badila.” Uno mwingilo o onka upelwe ne bene Kidishitu bashingwe māni bakidi pano panshi, bengila’o pamo na bapwani nabo, “mikōko mikwabo.” Abo bonso bengilanga mwingilo wa kutūla mu kyelekejo kiyukeno pa mapala a “bantu babinza ne badila mwanda wa byamunyanji byonso byalongwa umbukata [mwa Yelusalema mupondoke, kyelekejo kya Bipwilo bya Kine Kidishitu].” (Ezekyele 9:4) Bano badila madilo basengibwanga na “myanda-miyampe ya buno bulopwe.” (Mateo 24:14) Badi na nsangaji pa kuyuka amba ngikadilo imbi ya bintu ya Satana keisa kupingakanibwa na ntanda impya myoloke ya Yehova.
Ba Nsangaji I Boba Batalala
7. Kishima “kutalala” kekishintululapo bika?
7 Yesu wāendelele na kunena Busapudi bwa ku Lūlu amba: “Kebo ba nsangaji shabo boba batalala, mwanda bakapyananga ntanda.” (Mateo 5:5, NW) Kutalala kumonwanga kyaba kimo bu buzoze. Inoko, ke amopo. Mubandaudi umo wa Bible pa kushintulula buluji bwa kishima kyalamwinwe bu “kutalala,” usoneka’mba: “Mwikadilo wa peulu wa muntu [utalala] i uno wa kuyuka amba aye mwine wikontololanga senene. Kutalala ke buyampepo bwakubulwa bukomo, na kiswelelela, nansha na katalela, mhm. Ino i bukomo bwa kwibeja.” Yesu wētelele aye mwine amba: “Nne muntu utalala, mutuke pa mucima.” (Mateo 11:29, BB) Inoko Yesu wādi na kininga mu kulwila misoñanya myoloke.—Mateo 21:12, 13; 23:13-33.
8. Le kutalala i kukwatañane mpata na bika, ne mwanda waka tusakilwa ino ngikadilo mu kipwano kyetu na bakwetu?
8 Nanshi kutalala i kukwatañane mpata na kwīfula. Bine, kutalala ne kwīfula i bīlondakane mu mulongo wātelele’mo mutumibwa Polo “kipa kya mushipiditu.” (Ngalatea 5:22, 23, NW) Nanshi kutalala kutamijibwanga na bukwashi bwa mushipiditu sandu. Yo ngikadilo ya bwine Kidishitu ileta ndoe na badi panja ne na badi mu kipwilo. Polo wāsonekele amba: “Vwalai pamo bwa batongibwe ba Leza, bapandulwemo, baswedibwe, mutyima wa lusalusa ne kanye, ne bumvu, ne kikōkeji [“kutalala,” NW], ne kutūkija mutyima; kadi ne kwifudila bānwe bene na bene, ne kwilekela bitupu bānwe bene.”—Kolose 3:12, 13.
9. (a) Mwanda waka kutalala kekwimaninepo enka pa kipwano kyetu na bantu netu? (b) Batalala “bakapyananga ntanda” muswelo’ka?
9 Inoko kutalala kekwimaninepo enka pa kipwano kyetu na bantu netu, mhm. Shi tukōkela na mutyima umo ku bubikadi bwa Yehova nabya tubelombola amba twi babijiba-ntalela. Mu uno mwanda, kimfwa kipityile byonso i Yesu Kidishitu, wāile pano panshi ne kwikala utalala koku kasha ukōkela ne pa mfulo ku kiswa-mutyima kya Shandi. (Yoano 5:19, 30) Yesu ye umbajinjibajinji kupyana ntanda, mwanda ye utongelwe kwikala Mulopwe wayo. (Mitōto 2:6-8; Danyele 7:13, 14) Ukeabila kino kipyanwa na “bampyana” 144 000, batongelwe mu “bantu bonso” amba bekale ‘balopwe ba kubikala pano pa ntanda.’ (Loma 8:17; Kusokwelwa 5:9, 10; 14:1, 3, 4; Danyele 7:27) Kadi Kidishitu ne baludiki nandi bakabikala pa midiyo ne midiyo ya bana-balume ne bana-bakaji badingakene na mikōko, bakemwena kufikidila kwa nsangaji kwa bupolofeto bwa mitōto bunena’mba: “Bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:11; Mateo 25:33, 34, 46.
Ba Nsangaji I Boba Badi na Nzala ya Boloke
10. I muswelo’ka umo wikutanga boba badi ‘na nzala ne kyumwa kya boloke’?
10 Nsangaji ilonda’ko itelelwe na Yesu paādi wisamba pa lūlu lwa Ngadilea i ino: “Kebo ba nsangaji yabo shabo boba badi na nzala ne kyumwa kya boloke, mwanda bakekutanga.” (Mateo 5:6, NW) Yehova upele bene Kidishitu misoñanya ya boloke. O mwanda boba badi na nzala ne kyumwa kya boloke na bubine badi na nzala ne kyumwa kya buludiki bwa Leza. Bano bantu beyukile amba i babipya-mambo, bakubulwa kubwaninina, ne babilanga kwitabijibwa na Yehova. Bine, bekalanga na nsangaji pa kuyuka mu Kinenwa kya Leza amba shi abesāsa ne kukimba kulekelwa pa kitapwa kya kikūlwa kya Kidishitu, bakafikila pa kwikala boloke ku meso a Leza!—Bilongwa 2:38; 10:43; 13:38, 39; Loma 5:19.
11, 12. (a) Bene Kidishitu bashingwe māni bafikilanga namani pa boloke? (b) Le kyumwa kya boloke kya bapwani na bashingwe māni kikapwa muswelo’ka?
11 Yesu wānene amba bano bantu i ba nsangaji mwanda “bakekutanga.” (Mateo 5:6) Bene Kidishitu bashingwe māni “bakabikalanga” bu balopwe na Kidishitu mūlu babingijibwanga “bubinga bwa būmi.” (Loma 5:1, 9, 16-18) Yehova i mwibabutule, ko kunena’mba wibatambula bu bandi bana ba bulelwa ku mushipiditu. I bampyana ba kupyana pamo na Kidishitu, kadi i balopwe babitobo mu umbikalo wa Bulopwe momwa mūlu.—Yoano 3:3; 1 Petelo 2:9.
12 Bapwani na bashingwe māni abo kebabingile bubinga bwa kumona būmi. Inoko batelwanga na Yehova bu boloke mu ludingo kampanda kupityila ku lwitabijo lobetabije mu mashi āmwangile Kidishitu. (Yakoba 2:22-25; Kusokwelwa 7:9, 10) Batelwanga bu boloke mwanda i balunda na Yehova bakapanda pa oa “malwa makatakata.” (Kusokwelwa 7:14) Kyumwa kyabo kya boloke kikapwa pobakabikalwa na “madiulu mapya” mu ntanda impya ‘mukekalanga boloke.’—2 Petelo 3:13; Mitōto 37:29.
Ba Nsangaji I ba Lusa
13, 14. I mu miswelo’ka myendele’mo motukokeja kwikala ba lusa, ne i byabuyabuya’ka byotukamwena’mo?
13 Yesu wāendelele na Busapudi bwandi bwa ku Lūlu amba: “Kebo ba nsangaji yabo ba lusa, mwanda nabo bakafwilwanga lusa.” (Mateo 5:7, NW) Mungya bijila, lusa i mutyima wikalanga na mutyibi wa kulekela kupa nonga-bibi mfuto yonso ilombwa mu bijila. Inoko Bible wingidije kishima kibajinjibajinji kyalamwinwe bu “lusa” mwanda wa kwisambila pa kanye ka kulangila muntu, nansha pa lusa lwa kusaka kunyongolola boba bafudilwe. Nanshi, ba lusa i boba badi na mutyima wa kulangila bakwabo. Pa kino, kyelekejo kya Yesu kya mwine Samadia muyampe, kilombola senene muntu ‘ufwila lusa’ mufudilwe.—Luka 10:29-37.
14 Pa kumona nsangaji itamba mu kwikala na lusa, tufwaninwe kwipāna mu kulonga bilongwa bya kanye ku boba bafudilwe. (Ngalatea 6:10) Yesu wādi ukwatyilwa bantu baādi umona lusa. “Ponkapo webafwila lusa ke-bantu badi badingakene bwa mikōko ya kubulwa mukumbi, penepo kebafundija bingi bingi.” (Mako 6:34) Yesu wādi uyukile amba bintu binebine bisakilwa bantu i bya ku mushipiditu. Netu tulombolei amba tudi na mutyima wa lusa na kupa bakwetu byobya bine bibasakilwa kutabuka—ke “myanda-miyampe ya buno bulopwe” kadi. (Mateo 24:14) Kadi tukokeja kukwasha banabetu bene Kidishitu banunu, bakishala, bana ba nshiye ne ‘kukankamika bampungiji ya ku mutyima.’ (1 Tesalonika 5:14; Nkindi 12:25; Yakoba 1:27) Kino kekiketuletelapo enka nsangaji kete, mhm, ino kikalengeja ne Yehova nandi etufwile lusa.—Bilongwa 20:35; Yakoba 2:13.
Ba Mutyima Utōka ne ba Ndoe
15. Tukokeja kwikala batōka mu mutyima ne ba kupwanya muswelo’ka?
15 Yesu wātelele nsangaji ya busamba ne ya busamba-bubidi amba: “Kebo ba nsangaji yabo shabo boba batōka mu mutyima, ke-bantu bakamonanga Leza. Kebo ba nsangaji yabo shabo ba kupwanya, mwanda bakatelwa bu ‘bana ba Leza.’” (Mateo 5:8, 9, NW) Muntu wa mutyima utōka ke enkapo yewa wilamine utōka mu mwikadilo, ino i ne wambulwa kiko ku mushipiditu, kadi utōta Yehova na mutyima umo. (1 Bilongwa 28:9; Mitōto 86:11) Kishima kya mu ludimi lubajinjibajinji kyalamwinwe bu “kupwanya” kishintulula pa bute pa bute amba “balonga bileta ndoe.” Ba kupwanya bekalanga mu ndoe na banababo bene Kidishitu kadi, ku wabo mutamba, badi mu ndoe na balondakani nabo. (Loma 12:17-21) Basakanga “ndoe, ne kulonda’yo.”—1 Petelo 3:11.
16, 17. (a) Mwanda waka bashingwe māni batelwa bu “bana ba Leza,” ne ‘bamonanga Leza’ muswelo’ka? (b) “Mikōko mikwabo” nayo ‘imonanga Leza’ muswelo’ka? (c) I muswelo’ka ne i kitatyi’ka kikekadidila “mikōko mikwabo” bu “bāna ba Leza”?
16 Boba ba kupwanya badi na mutyima utōka i balaibwe amba bakatelwa bu “bana ba Leza” ne amba “bakamonanga Leza.” Bene Kidishitu bashingwe māni i babutulwe ku mushipiditu ne kwitabijibwa na Leza bu bandi “bāna” abo papo bakidi pano panshi. (Loma 8:14-17) Kitatyi kyobasangulwa ne kwenda kukekala pamo na Kidishitu mūlu, bengidilanga mu kifuko kya Leza, bamumona ne kumumona.—1 Yoano 3:1, 2; Kusokwelwa 4:9-11.
17 Ba kupwanya ba mu “mikōko mikwabo” nabo bengidilanga Yehova koku bendejibwa na Kidishitu Yesu, Mukumbi Muyampe, ‘Shabo wa myaka yonso nyeke.’ (Yoano 10:14, 16; Isaya 9:6) Boba bakapita pa ditompo dya mfulo pa kupwa kwa Umbikalo wa Myaka Kanunu wa Kidishitu bo baketabijibwa na Yehova bu bandi bana ba pano panshi ne kwikala “byana bya bene bya ntumbo bwa bāna ba Leza.” (Loma 8:21; Kusokwelwa 20:7, 9) Byobatengele kino, babadikilanga kutela Yehova bu Shabo, mwanda bapānanga būmi bwabo kwadi, ne kumuyuka bu Mwine wibapele būmi. (Isaya 64:8) Nabo bakokeja ‘kumona Leza’ na meso a lwitabijo mwāmumwenine ba Yoba ne Mosesa. (Yoba 42:5; Bahebelu 11:27) Bajingululanga ngikadilo ya Yehova ya kutendelwa na ‘meso abo a mutyima’ ne kupityila ku buyuki bwa binebine bwa Leza, kadi bekankilanga’ko kumwiula na kulonga kiswa-mutyima kyandi.—Efisesa 1:18; Loma 1:19, 20; 3 Yoano 11.
18. Mungya nsangaji isamba-ibidi imbajinji itelelwe na Yesu, i bāni badi na nsangaji ya binebine dyalelo?
18 Tubamone amba boba beyukile bisakibwa byabo bya ku mushipiditu, boba badila madilo, batalala, boba badi na nzala ne kyumwa kya boloke, ba lusa, ba mutyima utōka, ne ba kupwanya batananga nsangaji ya bine mu kwingidila Yehova. Inoko balondwalondwanga nyeke, pakwabo bapangwapangwa. Lelo kino kivutakanyanga nsangaji yabo? Kino kipangujo kikabandaulwa mu kishinte kilonda’ko.
Kupituluka’mo
• I nsangaji’ka imonanga boba beyuka amba basakilwa bintu bya ku mushipiditu?
• Boba badila madilo basengibwanga namani?
• Tukelombola namani amba twi bantu batalala?
• Mwanda waka tufwaninwe kwikala ba lusa, batōka mu mutyima, ne ba kupwanya?
[Bipangujo bya Kifundwa]
[Kifwatulo pa paje 23]
“Kebo ba nsangaji yabo shabo boba beyukile bisakibwa byabo bya ku mushipiditu”
[Bifwatulo pa paje 23]
“ Kebo ba nsangaji yabo shabo boba badi na nzala ne kyumwa kya boloke”
[Kifwatulo pa paje 23]
“Kebo ba nsangaji yabo shabo ba lusa”