Bambutwile baleta kimfwa beendejanga mungya byobafundija. Kimfwa, kubwanyapo kutengela obe mwana ekale unena bya bine shi ukwivwananga kyaba kivule unena’mba, “Mulombole amba i kutupu’ye,” kitatyi kyokusakilepo kwisamba na muntu wakokola ku kibelo.

“Bantu bavule banenanga’mba, ‘Abe longa byonkusapwila, kokalonda byononga.’ Ano ke madingipo mayampe ku bana. Bana badi pamo bwa kikenda-mbaya kibuta byonso byotunena ne byotulonga, kadi baketuvuluja shi kimfwa kyetu kekikwatañenepo na byobya byotwibafundija.”​—David.

MUSOÑANYA WA MU BIBLE: “Abe, usapula’mba “Kokeba,” abe’ko wiba?”​—Loma 2:21.

Kimfwa kya ba mbutwile kidi na lupusa lukatampe pa babo bana banuke nansha batame kupita’ko kya muntu ye-yense​—nansha ke bakwabo ba yabo myaka bene. Nanshi kino kishintulula’mba bambutwile ye bafwaninwe kuludikila babo bana mu dishinda diyampe​—na kwingidija byobya byobebafundija.

“Tubwanya kupituluka mu kintu kimo misunsa mivule ne kwiipangula shi mwana utejanga, inoko kitatyi kyotukalonga bintu bishile na byotunena, mwana uketuvuluja’byo. Bana batanga mutyima ku bintu byonso byotulonga, nansha shi tulanga’mba kebatele’kopo mutyima.”​—Nicole.

MUSOÑANYA WA MU BIBLE: ‘Tunangu tutūka mūlu i twampikwa buzazangi.’​—Yakoba 3:17.

Bandaula bibidiji byobe. Le i bintu’ka byobandilanga shi wipwija mukose? Le umwene mwinē pobe ne bobe bana namani? Le udi na balunda ba muswelo’ka? Lelo ulangilanga bantu bakwabo? Mu kīpi, le udi na bumuntu na bosakila bobe bana?

“Ami ne wami mulume ketuningilangapo betu bana balonde misoñanya yoketulondapo batwe bene.”​—Christine.

Lomba lusa shi ubaluba. Bobe bana bayukile kala’mba kubwanininepo. Ponena’mba “mfwile’ko lusa” shi ubalonga kilubo​—ku mwinē pobe ne ku bobe bana​—nabo bakaboila ñeni ku kimfwa kyobe kya kwityepeja ne kubulwa budimbidimbi.

“Betu bana basakanga kwitumona twitabija kilubo, ne kwitwivwana tulomba lusa pa mwanda wa kilubo kyetu. Shi ketulongapo uno muswelo, nabya nabo bakefunda kufya bilubo byabo.”​—Robin.