Lusa i “bukomo bwa kwitūla pa kyaba kya muntu mukwabo na kufwatakanya mu ñeni motwadi ba kwiivwanina shi twadi mu ngikadilo yadi’mo.” Dokitele Rick Hanson, shayuka umo wa bukomo bwa mu ñeni unena’mba “lusa ludi mu mashi.”

LANGULUKA’PO BIDI: Mwanda waka tudi na bukomo bwa kwivwanina bakwetu lusa, ngikadila ibudilwe bipangwa bikwabo byo-byonso? Bible unena’mba Leza wāpangile bantu mu kyelekejo kyandi. (Ngalwilo 1:26) Kupangwa kotupangilwe mu kyelekejo kya Leza kushintulula’mba tubwanya kwiula bumuntu bwandi ne kumwekeja ngikadila yandi mu ludingo kampanda. Nanshi, lusa polutonona bantu bate bakwabo mutyima, beulanga lusa lukatampe lwa Mupangi wabo, Yehova Leza.​—Nkindi 14:31.

Leza witwivwaninanga lusa kadi kasakengapo kwitumona tususuka. Pa mwanda utala bene Isalela ba pa kala bene bāsuswilwe mu bupika bwa Edipito, kutentekela’po ne masusu a myaka 40 mu ntanda mutuputupu, Bible unena’mba: “Mu tusua twabo tonso, nandi wadi mu tusua.” (Isaya 63:9) Yuka’mba Leza kākadikilepo’tu’nka pa kuyuka tusua twabo kete. Ino wāivwene ne misanshi yabo. Wānenene amba: “Ndyukile biyampe masusu obasusuka.” (Divilu 3:7) Leza unena’mba: “Yewa ense wimutenga, uteñanga nkishi wa mu diso dyami.” (Zekadia 2:8) Nanshi shi muntu wetusanshija, Leza nandi bimusansanga.

Nansha byotubwanya kwitopeka ne kwimona’mba ketufwaninwepo lusa lwa Leza, Bible witukulupija’mba “Leza i mukatampe kupita mityima yetu kadi uyukile bintu byonso.” (1 Yoano 3:19, 20) Leza wituyukile senene kupita ne motwiyukile batwe bene. Uyukile ne pa mfulo ngikadilo yonso yotudi’mo, milangwe yetu, ne mwiivwanino wetu. Witwivwaninanga lusa.

 Bisonekwa bitupa kikulupiji

• “Uketa, Yehova nandi uketaba; ukābija bukwashi, nandi ukanena’mba, ‘Ami uno!’”​—ISAYA 58:9.

• “‘Mwanda ndyukile biyampe milangwe yonemulangila,’ i Yehova unena, ‘milangwe ya ndoe, ke ya kyamalwapo, mwanda wa kwimupa būmi bwa kumeso ne lukulupilo. Mukangitanga kadi mukāya ne kulombela kondi, nami nkemwivwana.’”​—YELEMIA 29:11, 12.

• “Tūla impolo yami mu mutyibi obe wa kiseba. Le keilembelwepo mu mukanda obe?”​—ÑIMBO YA MITŌTO 56:8.

Le kuyuka’mba Leza witwivwaninanga lusa kubwanya kwitukwasha tulwe na makambakano etu? En-en, tala kimfwa kya Maria mwine unena’mba:

“Namwene amba būmi i bukomo kadi buyule bukondame ponadi na bulanda bwa kufwilwa wami mwana mwana-mulume wa myaka 18, wasusukile na misongo ya dyaya mu bula bwa myaka ibidi. Nafītyīlwe Yehova mwanda kalongele’popo kintu ne kumukomeja!

“Myaka isamba pa kupita’po, mulunda nami umo wa buswe ne lusa wa mu kyetu kipwilo wauntejeje ponadi musapwila monadi neivwanina’mba Yehova kansenswepo. Pa kupwa kunteja mu bula bwa mansá mavule pampikwa kuntyiba, wauntelele kisonekwa kimo kyauntengele bininge. Wadi 1 Yoano 3:19, 20, mwine unena’mba: ‘Leza i mukatampe kupita mityima yetu kadi uyukile bintu byonso.’ Waunshintulwidile amba Yehova wivwanijanga mwikadile masusu etu.

“Nansha nankyo, bulobo kebwaumpwilepo! Kupwa natanga Ñimbo ya Mitōto 94:19, mine inena’mba: ‘Kuzumbazumba pokwandēmenene, waunsengele ne kuntalaja.’ Neivwene amba ano mavese āunembelwe ami! Ku mfulo, neivwana biyampe, naikala na bukomo bwa kulombola Yehova masusu ami, koku nkulupile amba untejanga kadi wivwanije ngikadilo yondi’mo.”

Bine bisenga’po kashā pa kuyuka’mba Leza wivwanijanga ngikadilo yotudi’mo ne kwitwivwanina lusa! Ino mwanda waka kudi masusu mavule? Le masusu i mfuto itupa Leza pa mwanda wa bilongwa byetu bibi? Lelo Leza usa kulonga’po kintu mwanda wa kupwija ano masusu? Ino myanda isa kubandaulwa mu bishinte bilonda’ko.